‘சாய் சுதர்ஷன் சதம் வீண்’ – கோலி அதிரடியால் பெங்களூரு வென்றது எப்படி?

பவர்பிளே முடிந்தும் கூட சாய் சுதர்ஷன் தன் அதிரடியைத் தொடர்ந்தார். ரொமாரியோ ஷெபர்ட் வீசிய எட்டாவது ஓவரில் சிக்ஸர் விளாசி 33 பந்துகளில் தன் அரைசதத்தை நிறைவு செய்தார் சாய் சுதர்ஷன். இந்தப் போட்டியில் 72 ரன்கள் எடுத்தபோது ஐபிஎல் தொடரில் 2000 ரன்களைக் கடந்தார் அவர். ஐபிஎல் வரலாற்றில் அதிவேகமாக (47 இன்னிங்ஸ்) 2000 ரன்களைக் கடந்த வீரர் என்ற சாதனையையும் அவர் படைத்தார்.

கில் – சாய் சுதர்ஷன் ஜோடி முதல் விக்கெட்டுக்கு 12.4 ஓவர்களில் 128 ரன்கள் எடுத்தது. 24 பந்துகளில் 32 ரன்கள் எடுத்து ஆட்டமிழந்தார் கில்.

அதன்பிறகும் தன் சிறப்பான ஆட்டத்தைத் தொடர்ந்த சாய் சுதர்ஷன் 57 பந்துகளில் தன் சதத்தை நிறைவு செய்தார். ஐபிஎல் தொடரில் அவர் அடிக்கும் 3வது சதம் இது.

ஜாஸ் பட்லர் 16 பந்துகளில் 25 ரன்கள் எடுத்து அவுட் ஆனார். கடைசி கட்டத்தில் ஜேசன் ஹோல்டர் அதிரடி காட்டி ஆட்டமிழக்காமல் 10 பந்துகளில் 23 ரன்கள் எடுத்தார். வாஷிங்டன் சுந்தர் ஆட்டமிழக்காமல் 19 ரன்கள் எடுத்தார். அதனால் 20 ஓவர்கள் முடிவில் 3 விக்கெட்டுகள் இழப்புக்கு 205 ரன்கள் எடுத்தது குஜராத் டைட்டன்ஸ்.

குஜராத் டைட்டன்ஸ் இன்னிங்ஸ் முடிந்ததும் தன் சதம் பற்றிப் பேசிய சாய் சுதர்ஷன், “இது நீண்ட காலமாக எதிர்பார்க்கப்பட்ட ஒன்று. கடந்த சில இன்னிங்ஸ்களாகவே நான் பந்தை நன்றாக எதிர்கொண்டு வருகிறேன். இதற்கு இறைவனுக்கு நன்றி தெரிவித்துக்கொள்கிறேன். அணிக்கு நல்ல பங்களிப்பைக் கொடுத்ததில் எனக்கு மிக்க மகிழ்ச்சி. எங்களுக்கிடையேயான இந்த ஆடுகளம் சற்று மெதுவாகவும், பந்து வெவ்வேறு வேகத்திலும் வருவதை நாங்கள் புரிந்துகொண்டோம். எனவே, ஆட்டத்தை இறுதிவரை எடுத்துச் செல்வது என்பது இயல்பான உள்ளுணர்வாக அமைந்தது.” என்று கூறினார்.

ஃபில் சால்ட் இந்தப் போட்டியில் இல்லாததால் கோலியோடு ஓப்பனராகக் களமிறங்கினார் பெதெல்.

சிராஜ் வீசிய முதல் ஓவரிலேயே விராட் கோலியை அவுட்டாக்கும் மிகப் பெரிய வாய்ப்பு டைட்டன்ஸ் அணிக்குக் கிடைத்தது. ரன் ஏதும் எடுக்காத நிலையில் கோலி கொடுத்த கேட்சை மிட் விக்கெட் திசையில் இருந்த வாஷிங்டன் சுந்தர் தவறவிட்டார். அந்த வாய்ப்பைப் பயன்படுத்திக்கொண்ட விராட் கோலி அதன்பின் போட்டியையே மாற்றினார்.

ககிஸோ ரபாடா வீசிய இரண்டாவது ஓவரில் இருந்தே ஆர்சிபி பேட்டர்களின் அதிரடி தொடங்கியது. பெதெல் 14 ரன்களில் அவுட் ஆகினாலும், அதன்பின் ஜோடி சேர்ந்த தேவ்தத் படிக்கல், கோலியோடு சேர்ந்து அதிரடியைத் தொடர்ந்தார்.

பவர்பிளேவில் 1 விக்கெட்டை இழந்து 58 ரன்கள் எடுத்தது ஆர்சிபி. அதன்பிறகும் கோலி, படிக்கல் இருவரும் தங்கள் வேகத்தைக் கூட்டிக்கொண்டே இருந்தார்கள். குறிப்பாக ரஷீத் கான் பந்துவீச்சை ஆரம்பத்தில் இருந்தே அடித்து ஆடினார்கள். ரஷீத் கானின் முதலிரு ஓவர்களில் ஒரு பவுண்டரியும், 3 சிக்ஸர்களும் அடித்தது அந்தக் கூட்டணி.

படிக்கல் முதலில் 20 பந்துகளில் அரைசதம் அடிக்க, 30 பந்துகளில் தன் அரைசதத்தை நிறைவு செய்தார் விராட் கோலி.

55 ரன்கள் எடுத்த படிக்கல் விக்கெட்டை வீழ்த்தினார் ரஷீத் கான். 81 ரன்கள் எடுத்திருந்த விராட் கோலியின் விக்கெட்டை அதற்கடுத்த ஓவரிலேயே வீழ்த்தினார் ஜேசன் ஹோல்டர்.

அடுத்ததாக ஆர்சிபி கேப்டன் ரஜத் பட்டிதார் 8 ரன்களிலும், ஜித்தேஷ் ஷர்மா 10 ரன்களிலும் அடுத்தடுத்து அவுட்டாக ஆட்டத்தில் சற்று பரபரப்பு கூடியது. இருந்தாலும் குருனால் பாண்டியா – டிம் டேவிட் கூட்டணி 33 ரன்கள் எடுத்து அந்த அணியின் வெற்றியை உறுதி செய்தது. குருனால் பாண்டியா ஆட்டமிழக்காமல் 23 ரன்கள் எடுத்து ஆர்சிபி அணியின் வெற்றியை உறுதி செய்தார்.

இதன்மூலம் தங்கள் ஐந்தாவது வெற்றியைப் பதிவு செய்து புள்ளிப் பட்டியலில் இரண்டாவது இடத்துக்கு முன்னேறியது ஆர்சிபி.

ராயல் சேலஞ்சர்ஸ் பெங்களூரு

ஓப்பனர் ஃபில் சால்ட் காயமடைந்ததால், அவருக்குப் பதில் ஜேக்கப் பெதெல் சேர்க்கப்பட்டிருக்கிறார்.

பிளேயிங் லெவன்: விராட் கோலி, தேவ்தத் படிக்கல், ரஜத் பட்டிதார், ஜித்தேஷ் ஷர்மா, டிம் டேவிட், ரொமாரியோ ஷெபர்ட், குருனால் பாண்டியா, புவனேஷ்வர் குமார், ஜாஷ் ஹேசில்வுட், சுயாஷ் ஷர்மா, ராஷிக் தார்.

சப்ஸ்டிட்யூட் வீரர்கள்: ஜேக்கப் பெதெல், ஜோர்டன் காக்ஸ், மங்கேஷ் யாதவ், வெங்கடேஷ் ஐயர், விக்கி ஓஸ்ட்வால்.

குஜராத் டைட்டன்ஸ்

குஜராத் அணியில் 2 மாற்றங்கள் செய்யப்பட்டன. கிளென் ஃபிலிப்ஸ், அஷோக் ஷர்மா ஆகியோருக்குப் பிறகு ஜேசன் ஹோல்டன் மற்றும் மானவ் சூதர் பிளேயிங் லெவனில் சேர்க்கப்பட்டனர்.

பிளேயிங் லெவன்: ஷுப்மன் கில், சாய் சுதர்ஷன், ஜாஸ் பட்லர், வாஷிங்டன் சுந்தர், ஜேசன் ஹோல்டர், ஷாரூக் கான், ராகுல் திவேதியா, ரஷீத் கான், மானவ் சூதர், ககிஸோ ரபாடா, மொஹம்மது சிராஜ்.

சப்ஸ்டிட்யூட் வீரர்கள்: பிரசித் கிருஷ்ணா, அனுஜ் ராவத், கிளென் ஃபிலிப்ஸ், நிஷாந்த் சிந்து, அர்ஷத் கான்.