காக்ரோச் ஜனதா கட்சி பற்றி சர்வதேச ஊடகங்கள் என்ன கூறுகின்றன?

சிஎன்என்-இன் படி, “பொறுப்புக்கூறல் பற்றிய அத்தகைய கோரிக்கை எழுந்து வருகிறது, இதனை இப்போது பலரால் அலட்சியப்படுத்த முடியாது.”

இந்த செய்தியில் “காக்ரோச் ஜனதா கட்சி, இந்தியாவின் தலைமை நீதிபதி சூர்யகாந்தின் ஒரு கருத்தின் காரணமாக உருவானது. பொதுவாக அவர் நாட்டின் வேலையற்ற இளைஞர்களை ‘காக்ரோச்’ (கரப்பான் பூச்சிகள்) என்று அழைத்ததாகக் கருதப்பட்டது. இதனால் பலரும் தங்களது ஆதங்கத்தை வெளிப்படுத்தினர்.” என எழுதப்பட்டுள்ளது.

இருப்பினும், பின்னர் தலைமை நீதிபதி, இத்தொழிலுக்குள் நுழைவதற்காக போலிப் பட்டங்களைப் பயன்படுத்தியவர்களைப் பற்றித்தான் தான் பேசினேன் என்று தெளிவுபடுத்தினார்.

பிரான்ஸ் 24 ஊடகமும் காக்ரோச் ஜனதா கட்சியின் போராட்டம் குறித்து எழுதியுள்ளது. அது தனது ஒரு செய்தியில் “இந்தியாவின் ஜென் ஸீ ‘காக்ரோச்’ கட்சியின் ஆதரவாளர்கள் புது டெல்லியில் தங்களின் முதல் எதிர்ப்பு போராட்டத்தை நடத்தினர்.” என எழுதியுள்ளது.

அதில் “(சிஜேபியின்) ஆதரவாளர்கள் ‘காக்ரோச் வருகிறார்கள், தர்மேந்திர பிரதான் போகிறார்’ என்பது போன்ற முழக்கங்களை எழுப்பினர், மேலும் போராட்டத்தின் போது ஒரு சுவரொட்டியில், கசியாத ஒரு தேர்வுக்காகக் காத்திருக்கிறோம் என்று எழுதப்பட்டிருந்தது.” என குறிப்பிடப்பட்டுள்ளது.

இந்தச் செய்தியை சீனாவின் சவுத் சைனா மார்னிங் போஸ்ட் நாளிதழும் செய்தி நிறுவனமான ஏபி-யை மேற்கோள் காட்டி வெளியிட்டுள்ளது.

இதில் சிஜேபியின் சவால்கள் குறித்தும் விவாதிக்கப்பட்டுள்ளது “(சிஜேபிக்கு) மற்றொரு பெரிய சவால் என்னவென்றால், பிரதமர் நரேந்திர மோதி அரசின் காலத்தில் இதற்கு முந்தைய எதிர்ப்பு இயக்கங்கள் எதிர்கொண்ட எதிர்ப்பை இது எவ்வாறு எதிர்கொள்கிறது என்பதுதான்.” என அது விவரிக்கிறது.

வளைகுடா நாடான கத்தாரின் ஊடகமான அல் ஜசீரா, ‘ஐ அம் காக்ரோச்: இந்தியாவின் தலைநகரை வந்தடைந்தது ஜென் ஸீ-யின் எதிர்ப்பு போராட்டம்’ என்று தலைப்பிட்டுள்ளது.

அல் ஜசீரா வெளியிட்டுள்ள செய்தியில், “இந்தியாவின் ஜென் ஸீ ‘காக்ரோச் இயக்கம்’ தலைநகரில் தனது முதல் எதிர்ப்பு போராட்டத்தை நடத்தியுள்ளது மற்றும் கல்வி அமைச்சர் பதவி விலகக் கோரியுள்ளது. 1.4 பில்லியன் மக்கள் தொகை கொண்ட இந்திய நாட்டின் மக்கள் தொகையில் பாதி பேர் 25 வயதிற்குட்பட்ட இளைஞர்கள் ஆவர், அவா்களிடையே நீண்ட காலமாகவே கோபம் நிலவி வந்தது.” என கூறப்பட்டுள்ளது.

“வினாத்தாள் கசிவு மற்றும் நாட்டின் மிகப்பெரிய பள்ளி வாரியமான சிபிஎஸ்இ-யில் நடந்த முறைகேடுகள் இந்த கோபத்தை மேலும் அதிகரித்தன.” என்றும் அந்த நாளிதழ் மேலும் எழுதுகிறது.

அல் ஜசீராவின் கட்டுரையில் மேலும், “இந்த கோபம் ஒரு சகிப்புத்தன்மையற்ற/பகடி அரசியல் கட்சியாக, அதாவது ‘காக்ரோச் ஜனதா கட்சி’ (சிஜேபி) என்ற பெயரில் திடீரென வெளிவந்தது. இக்கட்சி ஒரு நையாண்டி பிரச்சாரத்தின் மூலம் உருவானது.” என கூறப்பட்டுள்ளது.

“கடந்த மாதம் இந்தியாவின் தலைமை நீதிபதி இளைஞர்களை கரப்பான்களுடன் ஒப்பிட்டார், இது மிகப்பெரிய அளவில் கோபத்தை ஏற்படுத்தியது. இதற்குப் பதிலடியாக, பாஸ்டன் பல்கலைக்கழகத்தில் சமீபத்தில் பட்டம் பெற்ற அபிஜீத் தீப்கே, அந்த நேரத்தில் சமூக ஊடகமான எக்ஸ் தளத்தில், எல்லா காக்ரோச்சுகளும் ஒன்றாக இணைந்தால் என்ன நடக்கும் என்று யோசித்தார்.” என கூறப்பட்டுள்ளது.

அந்த கட்டுரை மேலும், “இந்த விஷயம் இந்திய இணையதளங்களில் பரவி, சிஜேபி தொடங்குவதற்கான வழியை உருவாக்கியது. இந்த பெயர் பிரதமர் நரேந்திர மோதியின் பாஜக பெயரைக் கொண்டு செய்யப்பட்ட ஒரு வேடிக்கையான நையாண்டி ஆகும். தீப்கேவின் இந்த லேசான வேடிக்கை இன்ஸ்டாகிராமில் 22 மில்லியனுக்கும் அதிகமான ஃபாலோயர்களைப் பெற்றுத் தந்தது – இது மோதியின் கட்சியின் ஃபாலோயர்களை விட இரண்டு மடங்கு அதிகம்.” என கூறுகிறது.

அரேபியாவின் மற்றொரு ஊடக இணையதளமான அல் அரபியாவில் “இந்த இயக்கத்தின் மீது சந்தேகம் கொண்ட மக்கள், குறிப்பாக மோதியின் கட்சியின் ஆதரவாளர்கள், இதனை வெறும் சமூக ஊடகத்தின் ஒரு நாடகம் என்றே கருதுகின்றனர்.” என கூறப்பட்டுள்ளது.

“ஆன்லைன் பிரபலம் என்பது இந்த இயக்கத்திற்கு அடிமட்ட அளவிலும் அதே அளவு ஆதரவு கிடைக்கும் என்று அர்த்தமல்ல என்று அவர்கள் கூறுகிறார்கள். இதன் வேகமாக வளர்ந்த பிரபலம் நீண்ட காலத்திற்கு நிலைத்து நிற்காது என்றும் அவர்கள் நம்புகிறார்கள்.” என கூறுகிறது.

கல்ஃப் நியூஸ், பாகிஸ்தான் மற்றும் வங்காளதேசத்தின் செய்தித்தாள்களிலும் இந்த போராட்டத்திற்கு முக்கியத்துவம் கொடுக்கப்பட்டது.

தி டான் செய்தித்தாள் இந்த போராட்டத்தின் புகைப்படத் தொகுப்பை வெளியிட்டு, இதற்கு வைரல் காக்ரோச் கட்சி என்று பெயரிட்டது.

அந்த நாளிதழின் கட்டுரையில் “அரசியல் ஆய்வாளர்கள் கூறுகையில், முக்கிய மாநிலங்களின் சமீபத்திய தேர்தல்களில் அவர்களின் கட்சி வெற்றி பெற்ற போதிலும், இந்த குழுவின் பிரபலம் பிரதமர் மோதியின் இமேஜை பாதிக்கத் தொடங்கியுள்ளது. அதே நேரத்தில், இரான் போர் காரணமாக அதிகரித்து வரும் எரிபொருள் விலைகள் மற்றும் எரிவாயு தட்டுப்பாடு குறித்து மக்களிடையே அதிருப்தியும் அதிகரித்து வருகிறது.” என எழுதப்பட்டுள்ளது.

ஜெர்மன் ஊடகமான டிடபிள்யூ (DW)வில் “டெல்லியின் ஜந்தர் மந்தரில் போராட்டக்காரர்களின் பெரும் கூட்டம் கூடியது. இங்கு ‘காக்ரோச் ஜனதா கட்சி’ என்ற பெயரிலான ஒரு நையாண்டி அமைப்பு எதிர்ப்பு போராட்டம் நடத்தியது, மேலும் சமீபத்திய தேர்வுகளில் நடந்த முறைகேடு புகார்களுக்கு மத்தியில் கல்வி அமைச்சர் தர்மேந்திர பிரதான் பதவி விலக வேண்டும் என்று கோரியது.” என எழுதப்பட்டுள்ளது.

போராட்டக்காரர்கள் காக்ரோச் மாஸ்க்குகளை அணிந்திருந்தனர் மற்றும் பொறுப்புக்கூறலைக் கோரும் துண்டுப் பிரசுரங்களைக் கைகளில் ஏந்தியிருந்தனர். அவர்கள் அரசுக்கு நாடு முழுவதும் போராட்டம் நடத்துவோம் என்றும் எச்சரிக்கை விடுத்தனர்.

மேலும் “இந்திய ஊடகங்கள் நீட் தேர்வில் நடந்த முறைகேடு செய்திகளை வெளியிட்டுள்ளன. நீட் நாட்டின் மிகக் கடினமான தேர்வுகளில் ஒன்றாகும், இது மருத்துவக் கல்லூரிகளில் சேர்க்கைக்கு அவசியமானது.” என டிடபிள்யூ குறிப்பிடுகிறது.

பிரிட்டன் செய்தித்தாளான தி சண்டே கார்டியன் எழுதியுள்ள கட்டுரையில், “ஆன்லைனில் 2.2 கோடிக்கும் அதிகமான ஃபாலோயர்கள் இருப்பதாகக் கூறிக்கொண்ட போதிலும், ஜந்தர் மந்தரில் ‘காக்ரோச் ஜனதா கட்சி’ நடத்திய முதல் பெரிய எதிர்ப்பு போராட்டத்தில் வெறும் இரண்டாயிரம் மக்கள் மட்டுமே கலந்து கொண்டனர், இது டிஜிட்டல் பிரபலத்திற்கும் நிஜ உலகத்தில் மக்களைத் திரட்டும் திறனுக்கும் இடையே உள்ள வித்தியாசத்தைத் தெளிவாகக் காட்டுகிறது.”

மேலும் அந்த செய்தித்தாளின் கட்டுரையில் “காக்ரோச் ஜனதா கட்சி சமூக ஊடகங்களில் பாஜகவைப் பின்னுக்குத் தள்ளிவிட்டு வெறும் நான்கே நாட்களில் ஒரு பெரிய ஆன்லைன் ஃபேன் ஃபாலோயிங்கை உருவாக்கியது. சிஜேபியின் இன்ஸ்டாகிராம் கணக்கில் வெறும் ஐந்து நாட்களில் 2 கோடிக்கும் அதிகமான ஃபாலோயர்கள் சேர்ந்தனர்… ஆனால் அடிமட்ட அளவில், எதிர்ப்பு போராட்டம் எதிர்பார்த்தபடி அமையவில்லை.” என கூறப்பட்டுள்ளது.

சனிக்கிழமையன்று நடந்த போராட்டத்திற்குப் பிறகு, சிஜேபி தரப்பிலிருந்து, ஏழு நாட்களுக்குள் கல்வி அமைச்சர் பதவி விலகாவிட்டால் மீண்டும் போராட்டம் நடத்தப்படும் என்று எச்சரிக்கை விடுக்கப்பட்டுள்ளது.

சிஜேபி நிறுவனர் அபிஜீத் தீப்கே போராட்டத்திற்குப் பிறகு எக்ஸ் தளத்தில் வெளியிட்ட பதிவு ஒன்றில் “இன்றைய போராட்டம் என்பது வெறும் ஒரு ட்ரெய்லர் தான்.” என குறிப்பிட்டுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு