அரிசிக்கொம்பன் யானையை அடிக்கடி இடமாற்றம் செய்வது சரியா? என்ன பாதிப்பு ஏற்படும்?

அரிக்கொம்பன் யானையை காட்டுக்குள் விரட்ட வனத்துறையினர் நடவடிக்கை எடுத்தனர், கம்பம் பகுதியைச் சுற்றி 144 தடை உத்தரவும் பிறப்பிக்கப்பட்டது. கடந்த சில நாட்களாக சண்முகாநதி, சின்னஓவுலாபுரம் பகுதி வனப்பகுதியில் அரிக் கொம்பன் யானை சுற்றி வந்தது. யானையைப் பிடிக்க 3 கும்கி யானைகளும் கொண்டு வரப்பட்டன.

இந்நிலையில் திங்கள்கிழமை அதிகாலை வனத்துறையினர், மருத்துவக் குழுவினர் ஆகியோர் அரிக் கொம்பன் யானையை பிடிக்கும் முயற்சியில் ஈடுபட்டனர். யானைக்கு மயக்க ஊசி செலுத்தி, கும்கி யானைகள் உதவியுடன் பிடிக்கப்பட்டது.

வனத்துறையினரால் பிடிக்கப்பட்ட இந்த அரிக்கொம்பன் யானை, பாதுகாப்பாக திருநெல்வேலி மாவட்டம், அகஸ்திய மலையில் உள்ள முத்துக் குழி பகுதியில் விடப்பட்டுள்ளதாக வனத்துறையினர் தெரிவித்துள்ளனர்.

இந்த அரிக்கொம்பன் யானையை கடந்த 3 மாதங்களில் மட்டும் இடுக்கி மாவட்டம், கோட்டயம் மாவட்டத்திலிருந்து தேனி மாவட்டம், மற்றும் திருநெல்வேலி மாவட்டம் என 4 இடங்களுக்கு இடமாறுதல் அடைந்துள்ளது. இந்த இடமாற்றம் யானையின் வாழ்வியல் சூழலைப் பாதிக்கும் என்று விமர்சனங்கள் வைக்கப்படுகின்றன.

இது குறித்து ஆனைமலை புலிகள் காப்பகத்தின் உயிரியியலாளர் பீட்டர் பிரேம் சக்கரவர்த்தி பிபிசி செய்திகளிடம் கூறுகையில் “ அரிக் கொம்பன் இடமாற்றம் அதன் வாழ்வியல் சூழலை எந்தவிதத்திலும் பாதிக்காது. அரிக் கொம்பன் யானை வாழப் பழகிய அதே வாழ்வியல் சூழல் இருக்கும் இடத்தில்தான் கொண்டுவிடப்பட்டுள்ளது. அதேசமயம், புதிய வனப்பகுதிக்குள் வந்துள்ளதால், யானைக்கு ஒரு பயம் இருக்கும். அதுவும் விரைவில் பழகிவிடும்.

யானையை வேறு இடத்துக்கு மாற்றுவதற்கு முக்கியக் காரணமே, மக்கள் வாழுமிடங்களில் யானை வந்து பழகி, அவர்களின் உணவுகளை குறிப்பாக அரிசியை சாப்பிடப் பழகிவிட்டது. இப்படியே தொடர்ந்தால் குறிப்பிட்ட இடத்துக்குள் யானை அடைபட்டுவிடும், அதன் வாழியல் சூழல் மாறிவிடும் என்பதற்காகவே யானை மாற்றப்பட்டுள்ளது. பொதுவாக மனிதர்களைக் கண்டால் யானைக்கு பயம் அதிகம். அந்த பயத்தோடு யானை இருக்க வேண்டும், அந்த பயம் தெளிந்துவிட்டால் மனிதர்களுக்கு ஆபத்தாகிவிடும்.

யானை விடப்பட்டுள்ள அடர்ந்த வனப்பகுதியில் நல்ல வாழ்வியல் சூழல், தண்ணீர் வசதி, உணவுகள் கிடைக்கும் பகுதியாகவே தேர்ந்தெடுக்கப்படும், அவ்வாறு இருக்கும்பட்சத்தில் அந்தப் பகுதியிலேயே நிரந்தரமாக அரிக் கொம்பன் யானை தங்கிவிடவும் வாய்ப்புள்ளது. அங்கு யானைக்குத் தேவையான புதிய சூழல், வேறு யானைகளுடன் பழக்கம் போன்றவற்றுக்கு பழகி மனிதர்கள் வாழும்பகுதிக்கு மீண்டும் வராது” எனத் தெரிவித்தார்.

மீண்டும் கேரளப் பகுதிக்கு அரிக் கொம்பன் யானை செல்ல வாய்ப்புள்ளதா என்ற கேள்விக்கு, பீட்டர் பிரேம் பதில் அளிக்கையில் “அரிசி சாப்பிட்டு ருசி கண்ட யானை மீண்டும் செல்லாது என்று முற்றிலும் கூற முடியாது. அவ்வாறு மீண்டும் செல்லக்கூடாது என்பதற்காகவே அடர்ந்த வனப்பகுதிக்குள் யானை கொண்டு செல்லப்பட்டுள்ளது.அதிலும் திருநெல்வேலி வனப்பகுதியிலிருந்து மீண்டும் தேனி மாவட்ட வனப்பகுதிக்கு வருவது கடினம், அதற்கான வலசைப் பாதை இருந்தால்தான் யானை இறங்க முடியும் இல்லாவிட்டால் இப்போதுள்ள வனப்பகுதியிலேயே தங்கிவிடும்” எனத் தெரிவித்தார்.

“அது மட்டுமல்லாமல் யானை மிகுந்த மருத்துவப் பாதுகாப்புடன்தான் கொண்டு செல்லப்பட்டுள்ளது. மருத்துவ வல்லுநர்கள் குழுவினர் யானையின் உடல்நலம், எடை, உயரம் ஆகியவற்றை ஆய்வு செய்துதான் மயக்க மருந்து செலுத்துவார்கள். மயக்க மருந்தால் எந்தப் பாதிப்பும் எதிர்காலத்தில் வராது. இந்த மயக்க மருந்து சில மணிநேரத்தில் செயல் இழந்துவிடும். ஆதலால் அது குறித்து அச்சம் தேவையில்லை. யானை லேசான மயக்கத்தில் வைக்க மட்டுமே மயக்க மருந்து கொடுக்கப்படும், யானை கீழே விழாமல் மட்டும் பாதுகாக்க வேண்டும். யானையின் பாதுகாப்பில் வனத்துறையினர், மருத்துவர்கள் குழு, வன அலுவலர்ககள் பணி மகத்தானது” என பீட்டர் தெரிவித்தார்.

யானை-மக்கள் இடையே தொடர்ந்து வாழ்வியல் மோதல் வரக் காரணம் குறித்து பீ்ட்டர் கூறுகையில் “ யானைகள் வாழ்விடங்களை மனிதர்கள் ஆக்கிரமித்துவிட்டனர். அதன் பாதைகளில் வேலி அமைக்கும்போது, கட்டடங்கள் கட்டும்போது யானை அத்து மீறுகிறது. முதலில் மக்களுக்கு யானை குறித்து நேர்மறையான விழிப்புணர்வு மக்களிடம் கொண்டுவர வேண்டும். யானைக்கு பசியெடுத்து ஓரளவு சாப்பிட்டுவிட்டாலே அதன்போக்கில் சென்றுவிடும், அதைத் தடுக்கும்போதுதான் தொடர்ந்து யானை-மனிதர்கள் மோதல் நடக்கிறது” எனத் தெரிவித்தார்.

அரிக்கொம்பன் யானையை இடமாற்றியதால் பெரிதாக வாழ்வியல் பாதிப்பு வராது என்று வனஉயிரின ஆர்வலர் டிஎஸ் ராஜா தெரிவித்தார்.

அவர் பிபிசி தமிழ் செய்தியிடம் அளித்த பேட்டியில் “ அரிக்கொம்பன் யானையை முழுமையாக ஆய்வு செய்தபின்புதான் இடமாற்றம் செய்யப்பட்டுள்ளது. புதிய வாழிடத்துக்குள் செல்லும் போது அரிக் கொம்பன் யானை மட்டுமல்ல எந்த யானைக்கும் அச்சம் என்பது இருக்கும். எங்கு செல்வது, எந்த ஆபத்து இருக்கிறது, வேறு என்ன மிருகங்கள் உள்ளன என்பதைப் பார்த்து ஒரு பயம் இருப்பது இயற்கைதான். சில நாட்களில் பழகிவிடும். மனிதர்களின் வாழிடத்தில் பழகிவிடக்கூடாது. தினசரி யானை 20 மணிநேரம் அலைந்தால்தான் 200 கிலோ உணவை உண்ணும். ஆனால், மனிதர்கள் வாழ்விடத்துக்குள் வந்தால் எளிதாக 200 கிலோ உணவு கிடைத்துவிட்டால், அந்த இடத்தைவிட்டு யானை செல்லுமா, அதன் வாழ்வியல்தான் மாறிவிடும். அவ்வாறு மாறக்கூடாது என்பதற்காகவே இடமாற்றம். வேறு ஏதும் இல்லை.” என்றார்.