நாடாளுமன்றத்தில் வக்ஃப் சட்டத் திருத்த மசோதா – மத்திய அமைச்சருக்கு ஆ. ராசா சவால்

திருத்த மசோதாவில் வக்ஃப் சொத்து கணக்கெடுப்பு என குறிப்பிடப்பட்டுள்ளதும் தவறானது என குறிப்பிட்ட அவர், ஏற்கெனவே 90% சொத்துக்கள் கணக்கெடுக்கப்பட்டு விட்டதாக, உச்ச நீதிமன்றத்தில் மத்திய அரசு பிரமாணப் பத்திரம் தாக்கல் செய்துள்ளதாக தெரிவித்தார்.

வக்ஃப் வாரியத்தின் அதிகாரங்கள், பதிவு செய்தல், சொத்துக்கள் கணக்கெடுப்பு, ஆக்கிரமிப்புகளை அகற்றுதல், வக்ஃப் வரையறை என ஐந்து திருத்தங்களிலும் 2013ல் செய்யப்பட்ட திருத்தத்திலிருந்து ஏதேனும் புதிதாக மேம்படுத்தப்பட்டுள்ளதா என காட்டினால், நான் உங்களுக்கு ‘சல்யூட்’ செய்கிறேன், ஆனால் உங்களால் காட்ட முடியாது” என அவர் மத்திய அமைச்சரை நோக்கி தெரிவித்தார்.

1995, 2013 ஆகிய ஆண்டுகளில் மேற்கொள்ளப்பட்ட திருத்தங்கள் முழுவதுமாக இந்த திருத்த மசோதாவில் நீக்கப்பட்டுள்ளதாக அவர் தெரிவித்தார்.

சமாஜ்வாதி எம்.பி. அகிலேஷ் யாதவ், “தனது தோல்வியை மறைக்கும் போதெல்லாம், பாஜக சட்டத் திருத்தத்தைக் கொண்டு வருகிறது. முஸ்லிம் சகோதரர்களின் நிலங்களை கணக்கெடுப்பது குறித்து பாஜக பேசுவதன் மூலம், மகா கும்பமேளாவில் இந்துக்கள் இறந்ததை மூடி மறைக்க பார்க்கிறது,” என குற்றம் சாட்டினார்.

மேலும், காங்கிரஸ் எம்.பி. கௌரவ் கோகாய் உள்ளிட்ட எதிர்க்கட்சியினரும் இந்த மசோதாவுக்கு எதிராக பேசினர்.

வக்ஃப் திருத்த மசோதா பற்றிய எதிர்க்கட்சியினரின் எதிர்ப்புகள் குறித்து மத்திய உள்துறை அமைச்சர் அமித் ஷா பதிலளித்தார்.

“இந்த மசோதா குறித்து அறியாமலோ அல்லது அரசியல் காரணங்களுக்காகவோ (எதிர்க்கட்சி) உறுப்பினர்களின் மனதில் தவறான புரிதல்கள் உள்ளன, நாடாளுமன்றம் மூலமாக இதுகுறித்து நாடு முழுவதும் தவறான புரிதல்களை ஏற்படுத்த முயற்சிகள் மேற்கொள்ளப்படுகின்றன. சில விஷயங்களை தெளிவுபடுத்த நான் முயற்சிக்கிறேன்” என்றார்.

“முஸ்லிம் அல்லாத யாரும் வக்ஃப் வாரியத்துக்குள் வர மாட்டார்கள். இதை தெளிவாக புரிந்துகொள்ளுங்கள். எந்தவொரு முத்தவல்லியோ (வக்ஃப் சொத்துக்களை நிர்வகிப்பவர்கள்), வக்ஃப் வாரியத்தில் உள்ளவர்களோ முஸ்லிம் அல்லாதவர்களாக இருக்க மாட்டார்கள்.” என தெரிவித்தார்.

“மத நிறுவனங்களில் முஸ்லிம் அல்லாதவர்களை சேர்க்க எந்த ஏற்பாடும் இல்லை, நாங்கள் அவ்வாறு செய்ய விரும்பவில்லை.”

“எனவே, சமத்துவ உரிமை போய்விட்டது, இரண்டு மதங்களுக்கு இடையில் சமத்துவம் இல்லை, முஸ்லிம்களின் மத உரிமைகளில் அரசு தலையிடும் என்று பெரியளவில் பேசுகின்றனர். ஆனால், எதுவும் நடக்கப் போவதில்லை” என்று அமித் ஷா கூறினார்.

“இந்தச் சட்டம் முஸ்லிம் சகோதரர்களின் மத நடவடிக்கைகளிலும், அவர்கள் நன்கொடையாக அளித்த சொத்துக்களிலும் தலையிடுவதற்காகவே உருவாக்கப்படுகிறது என்பது தவறான கருத்து. சிறுபான்மையினரை பயமுறுத்தி ஒரு பெரிய தவறான கருத்தைப் பரப்புவதன் மூலம் வாக்கு வங்கியை உருவாக்க இது செய்யப்படுகிறது.”

“முஸ்லிம் அல்லாத உறுப்பினர்கள் மத்திய வக்ஃப் கவுன்சிலிலும், வக்ஃப் வாரியத்திலும் எங்கு வைக்கப்படுவார்கள்? அவர்களின் வேலை என்ன? அவர்களின் வேலை, மத நடவடிக்கைகளை நிர்வகிப்பது அல்ல. மாறாக, வக்ஃப் வாரியத்தின் நிர்வாகம் நன்றாக நடக்கிறதா, இல்லையா என்பதைப் பார்ப்பதே அவர்களின் வேலை” என்று அவர் கூறினார்.

இந்த சட்ட மசோதா ஆகஸ்ட், 2024ல் அறிமுகம் செய்யப்பட்டது. அதன்பின், அந்த திருத்த மசோதா நாடாளுமன்ற கூட்டுக் குழுவுக்கு அனுப்பப்பட்டது. இதையடுத்து, அக்குழு அறிக்கை சமர்ப்பித்த நிலையில் இந்த மசோதா இன்று கடும் எதிர்ப்புகளுக்கு மத்தியில் தாக்கலானது.

பாஜக மற்றும் அதன் கூட்டணி கட்சிகளான நிதிஷ் குமாரின் ஐக்கிய ஜனதா தளம், சந்திரபாபு நாயுடுவின் தெலுகு தேசம் கட்சி, சிவசேனா (ஏக்நாத் ஷிண்டே பிரிவு), லோக் ஜனசக்தி தளம் (ராம் விலாஸ் பஸ்வான்) ஆகிய கட்சிகள் இந்த மசோதாவுக்கு ஆதரவு தெரிவித்துள்ளன.

‘இந்தியா’ கூட்டணியில் உள்ள அனைத்துக் கட்சிகளும் இந்த மசோதாவுக்கு எதிர்ப்பு தெரிவித்துள்ளன. காங்கிரஸ், சமாஜ்வாதி, திரிணாமுல் காங்கிரஸ், ஆம் ஆத்மி, தேசியவாத காங்கிரஸ் (சரத்பவார்), தேசிய மாநாட்டு கட்சி, ராஷ்டிரிய ஜனதா தளம், திமுக ஆகிய கட்சிகள் இதற்கு எதிர்ப்பு தெரிவித்துள்ளன.

முதன்மையாக இந்த திருத்த மசோதாவில் மத்திய வக்ஃப் கவுன்சில் மற்றும் வக்ஃப் வாரியங்களில் முஸ்லிம்கள் அல்லாதோரை சேர்ப்பதற்கு கடும் எதிர்ப்பு எழுந்துள்ளது.

இது தவிர, அரசாங்க வசம் உள்ள வக்ஃப் சொத்தின் உரிமை கோரல் குறித்த இறுதி முடிவை மாவட்ட ஆட்சியர் எடுப்பார், மேலும் அவரது அறிக்கையின் அடிப்படையில் சொத்தை அரசு கணக்கில் சேர்க்கலாம் எனும் அம்சத்துக்கும் எதிர்ப்பு எழுந்துள்ளது.

மசோதாவில், கணக்கெடுப்பு நடத்தும் உரிமை வக்ஃப் வாரியத்திலிருந்து மாவட்ட ஆட்சியருக்கு வழங்கப்பட்டுள்ளது.

முன்மொழியப்பட்ட மசோதாவில், மத்திய வக்ஃப் கவுன்சிலில் முஸ்லிம் அல்லாத உறுப்பினர்களும் இரண்டு பெண் உறுப்பினர்களும் இருப்பது கட்டாயமாக்கப்பட்டுள்ளது. ஷியா மற்றும் சுன்னி முஸ்லிம்கள் தவிர, போஹ்ரா மற்றும் ஆககானி பிரிவினருக்கு தனித்தனி வாரியங்களை அமைப்பது குறித்து பேசப்படுகிறது.

– இது, பிபிசிக்காக கலெக்டிவ் நியூஸ்ரூம் வெளியீடு