ஆதிபுருஷ்: திரைப்படமா? வீடியோ கேமா? – நெட்டிசன்கள் கலாய்க்கும் அளவுக்கு என்ன பிரச்னை?

இந்த விமர்சனத்தை ஒட்டியே, மற்ற சில ஊடகங்களும் விமர்சனங்களை வெளியிட்டு வருகின்றன. ஆனால், சமூக ஊடகங்களில் இந்தப் படத்தை மிகக் கடுமையாக கேலி செய்தும் விமர்சித்தும் வருகின்றனர்.

சிலர் தூர்தர்ஷனில் ராமாயணத்தை இயக்கிய ராமானந்த சாகரை நினைவுகூர்ந்து வருகின்றனர்.

இந்தப் படம் வெளியாகும் திரையரங்கில் ஓர் இருக்கையை அனுமனுக்கு ஒதுக்க வேண்டுமென படத்தின் இயக்குநர் வேண்டுகோள் விடுத்திருந்தார்.

இதனால், சில திரையரங்குகளில் ஒரு இருக்கையை அனுமனுக்கு என ஒதுக்கி அவர் படத்தையும் வைத்திருந்தனர். ஆனால், இந்தப் படத்திற்கு வரும் விமர்சனங்களைப் பார்த்தால் 100 சதவீத இடங்களையும் அனுமனுக்குத்தான் ஒதுக்க வேண்டும் போலிருக்கிறது எனக் கூறியிருக்கிறார் ஒருவர்.

மிகவும் எதிர்பார்க்கப்பட்ட இந்தப் படத்திற்கு தமிழ்நாடு முழுவதும் விரல்விட்டு எண்ணக்கூடிய திரையரங்குகளிலேயே காலை 8 மணி காட்சிகள் திரையிடப்பட்டன. ஆனால், முதல் சில காட்சிகளுக்கு பெரிய ரசிகர்களின் வரவேற்பு இல்லை. இதனையும் சிலர் கேலி செய்துள்ளனர்.

மக்களால் மிகவும் அறியப்பட்ட ஒரு கதையை மீண்டும் மீண்டும் படமாக்கும்போது, அந்தக் கதையில் புதிய பரிமாணத்தைக் காட்டுவது, புதிய விளக்கங்களைச் சொல்வது ஆகியவற்றின் மூலமாகவே படத்திற்கு வரும் ரசிகர்களைக் கவர முடியும்.

ஆனால், இந்தியத் திரையுலகில் புகழ்பெற்ற பழங்கதைகளை எடுக்கும்போது, சர்ச்சைகளைத் தவிர்ப்பதற்காக கதையில் எவ்வித மாற்றத்தையும் செய்யாமல் படமாக்குகின்றனர். சமீபத்தில் சமந்தா நடித்து வெளியான சாகுந்தலம் இதேபோன்ற விமர்சனத்தைத்தான் எதிர்கொண்டது.

இந்தப் படத்திலும் ராமாயணக் கதையின் ஒரு பகுதியை அப்படியே சொல்ல முயன்றிருக்கின்றனர். ஆனால், ராமாயணத்தில் உள்ள செவ்வியல் காட்சிகளை நவீனமாகக் காட்டுகிறோம் என்ற பெயரில் வீடியோ கேம்களிலும் ஐரோப்பிய வெப் சீரிஸ்களிலும் வருவதைப் போன்ற கோட்டைகள், ஆடை வடிவமைப்புகள் ஆகியவற்றை உருவாக்கி வைத்திருக்கிறார்கள்.

ராமாயணத்திற்கு சற்றும் பொருந்தாத பேய்க் காட்சிகள், ராவணனுக்கு வவ்வால் வாகனம் என்று இருப்பது, ராமாயணத்தை எதிர்பார்த்து வரும் ரசிகர்களை இன்னும் அன்னியப்படுத்துகிறது.

“எங்கள் பெண்ணைத் தொட்டவனை சும்மா விடமாட்டோம்”, “தர்மத்திற்கும் அதர்மத்திற்கும் இடையிலான போரில் நடுநிலை வகிப்பவன் இன்னும் ஆபத்தானவன்” என்பது போன்ற வசனங்களின் மூலம் ஏதோ சொல்ல முயல்கிறார்கள். ஆனால், எதுவும் சுவாரஸ்யமாக அமையவில்லை.

சுமார் 3 மணி நேரத்திற்கு, நமக்கு ஏற்கெனவே தெரிந்த கதையை, மிக மோசமான காட்சியமைப்புகளோடு, திரைக்கதையோடு சொல்லியிருக்கிறது ‘ஆதிபுருஷ்’.

சமூக ஊடகங்களில் பிபிசி தமிழ்: