இது தவிர வைரஸ் நுண்கிருமியாலும் வாய்ப் புற்றுநோய் வரலாம். எனினும், அது பெரும்பாலும் நமது கட்டுப்பாட்டில் இல்லை. காரணிகளைப் பார்த்தாயிற்று. இப்போது நம் வாயில் எந்தெந்தப் பகுதியை புற்றுநோய் பாதிக்கும் என்று தெரிந்து கொள்ளலாம். இத்தொடரை தொடங்கும்போது, நம் வாயில் பற்களைத் தவிர, கன்னத்தின் உள்பகுதி (buccal mucosa), நாக்கு, அண்ணம், நாக்கின் கீழ்ப்பகுதி (floor of the mouth), உதடு மற்றும் ஈறு என்ற பகுதிகள் இருக்கின்றன என்று நான் குறிப்பிடது நினைவிருக்கும். எனவே, இதில் பற்களைத் தவிர எல்லா பகுதிகளிலும் வாய்ப் புற்றுநோய் வரலாம். இந்தப் பகுதிகளிலெல்லாம் Pre-Cancerous lesions-ம் வரலாம். Cancer என்றால் புற்றுநோய். அது என்ன Pre-cancerous lesions? இது புற்றுநோய்க்கு முந்தைய நிலை. இதுவும் பற்களைத் தவிர, வாயின் மற்ற அனைத்துப் பகுதிகளிலும் வரலாம். இந்த நிலையிலேயே கண்டுபிடித்துவிட்டால் கட்டாயம் அது புற்றுநோயாக மாறாமல் தடுத்துவிட முடியும்.
இதுவரை புற்றுநோய்க்கு முந்தைய நிலையைப் பார்த்தோம். இப்போது புற்றுநோய் குறித்து பார்ப்போம். இதுவும் வாயின் அனைத்துப் பகுதிகளிலும் வரலாம். ஆனால் நாக்கு மற்றும் அதன் கீழ்ப் பகுதி ( floor of the mouth) – இந்த இரண்டிலும், இரண்டு வாரங்களுக்கு மேல் ஆறாமல் ஏதாவது புண் இருந்தால், அது சந்தேகத்திற்குரியதாகவே பார்க்கப்பட வேண்டும். உடனே மருத்துவரை அணுகியே ஆகவேண்டும். இந்தப் பகுதிகளில் ஏற்படும் புற்றுநோய், வேகமாக உடலின் மற்ற பகுதிகளுக்கும் பரவும் தன்மை உடையது.
நாக்கில் ஏற்படும் புற்றுநோய் பெரும்பாலும் கூர்மையான பற்கள் மற்றும் செயற்கைப் பற்களில் உள்ள கம்பிகள் தொடர்ந்து உரசிக் கொண்டே இருப்பதால், சிறு புண்ணாகத்தான் ஆரம்பிக்கும். அப்போதே கவனித்து விட்டால் சிறிய புண்ணோடு தப்பித்து விடலாம். இல்லாவிட்டால், நாம் நமது கவனக்குறைவுக்கு பெரிய விலையைக் கொடுக்க நேரிடும். இதை அவசியம் மனதில் கொள்ளுங்கள்.
