சென்னையில் போலீஸ் டிஜிபி காருக்கு அபராதம் விதித்த டிராஃபிக் போலீஸ் – வைரலாகும் படங்களும் கேள்விகளும்

இந்தியாவில் போக்குவரத்து விதிமீறல் வாகனங்களுக்கான அபராதத்தை காவல்துறை மூலமாகவோ https://echallan.parivahan.gov.in/ என்ற இந்திய போக்குவரத்து அமைச்சக அபராதம் செலுத்தும் லிங்க் மூலமாகவோ செலுத்தும் வசதி, கடந்த சில ஆண்டுகளாக அமலில் உள்ளது.

அபராதம் விதிக்கப்படும் வாகனம் அல்லது அது தொடர்புடைய எண் இருந்தால் போதும், இந்த அபராதத் தொகையை சம்பந்தப்பட்ட நபர் நேரடியாக செலுத்தி விடலாம்.

இதையடுத்து சென்னை பெருநகர காவல்துறை அதன் ட்விட்டர் பக்கத்தில் இணைத்திருந்த அபராத ரசீது விவரத்தை இந்த இணையதளத்தில் பதிவிட்டு பார்த்தபோது, அபராதம் செலுத்தப்பட்ட வாகனம், தமிழ்நாடு காவல்துறை தலைமை இயக்குநர் பெயரில் இருந்ததும் திருவான்மியூர் போக்குவரத்து காவல் ஆய்வாளர் அபராதத்தை விதித்திருப்பதும் தெரிய வந்தது.

அந்த அபராதத் தொகை, அபராதம் விதிக்கப்பட்ட நவம்பர் 14ஆம் தேதியே பேடிஎம் மூலம் செலுத்தப்பட்டதற்கான ரசீதும் இந்திய போக்குவரத்துத் துறை இணையதளத்தில் இடம்பெற்றிருந்தது.

இந்த நிலையில், சமூக ஊடகத்தில் பகிரப்பட்ட புகைப்படங்கள் அடிப்படையில் நடவடிக்கை எடுத்துள்ள காவல்துறையை பலரும் பாராட்டி இடுகைகளை பகிர்ந்துள்ளனர். சிலர் அந்த நடவடிக்கை தொடர்பாக கேள்விகளையும் எழுப்பியுள்ளனர்.

“ஒரு டிஜிபி வாகனத்துக்குள் இருக்கும்போது அவரது அனுமதி இல்லாமல் ஓட்டுநரால் பொறுப்பின்றி வாகனத்தை இயக்கி இருக்க முடியுமா? அந்த அதிகாரிக்கும் அபராதம் விதிக்கப்பட்டிருக்க வேண்டும்,” என்று ஒரு ட்விட்டர் பயனர் கருத்து பதிவிட்டிருக்கிறார்.

அதே சமயம், “சம்பந்தப்பட்ட ஓட்டுநர் சரியான நிலையில்தான் வாகனத்தை இயக்கினாரா இல்லை அவர் மது அருந்தியிருந்தாரா என்பது விசாரிக்கப்பட்டதா?” என்று ஒருவர் கேள்வி எழுப்பியிருக்கிறார்.

மற்றொருவர், சமீபத்தில் சென்னை பெரம்பூரில் எதிர்பாதையில் கர்ப்பிணியை ஏற்றிச் சென்ற ஆட்டோ ஓட்டுநருக்கு ரூ. 1,500 அபராதம் விதிக்கப்பட்டதாக இடுகை பகிர்ந்திருந்தார்.

அவருக்கு பதிலளித்துள்ள காவல்துறை, “அந்த ரசீதை பகிருங்கள், கூடுதல் குற்றங்களும் முந்தைய அபராதத்துடன் சேர்க்கப்படலாம்” என்று குறிப்பிட்டிருக்கிறது.

இதற்கு அந்த நபரிடம் இருந்து எந்த பதில் இடுகையும் வரவில்லை.

ஹரிகுமார் என்ஜி என்ற ட்விட்டர் பயனர், “சென்னை கேசினோ சினிமாஸ் அடுத்துள்ள மீரான் சாஹிப் தெருவுக்கு வாருங்கள். அங்கு ‘நோ என்ட்ரி’ பலகையை வைத்திருக்கும் பான் கடை இருக்கும். அங்கு வந்தால் அதிகமாக வசூல் செய்யலாம், விதி மீறலில் ஈடுபடுவோரையும் ஒழுங்குபடுத்தலாம்” என்று கூறியுள்ளார்.

சேகர்பாலா123 என்ற முகவரியைக் கொண்ட ட்விட்டர் பக்கத்தில் “சென்னை போரூரில், போலீஸ் கூடுதல் டிஜிபி வாகனத்தைப் போலவே எதிர்புறத்தில் வந்த போலீஸ் ஜீப் ஒன்றின் படத்தை பகிர்ந்து, இந்த வாகனம் மீதும் ஏதாவது நடவடிக்கை எடுக்கப்படுமா?” என்று சென்னை போக்குவரத்து காவல்துறையை டேக் செய்து கேள்வி கேட்கப்பட்டுள்ளது.

இந்த இடுகைக்கு இதுவரை எந்த பதிலையும் சென்னை போக்குவரத்து காவல்துறை வழங்கவில்லை.

சமூக ஊடகங்களில் பிபிசி தமிழ்: