கனடாவில், மனித இதயத்தின் ஒரு பகுதியை ஆய்வகத்தில் செயற்கையாக உருவாக்கி, விஞ்ஞானிகள் பரிசோதனைகளை மேற்கொண்டுள்ளனர்.
மனித உறுப்புகளை செயற்கையாக உருவாக்குவதில் விஞ்ஞானிகள் தீவிர ஆர்வம் காட்டி வருகின்றனர். நுரையீரல், சிறுநீரகங்கள் வரிசையில், மனித இதயத்தை செயற்கையாக ஆய்வகத்தில் உருவாக்கும் முயற்சிகள் நடைபெற்று வருகின்றன. தற்போது வரை, இதய திசுக்களின் தட்டையான தாள்களுக்கு மாற்றாக, வென்ட்ரிக்கிளின் உண்மையான 3டி மாதிரியை உருவாக்க ஒரு சில முயற்சிகள் மட்டுமே நடந்துள்ள நிலையில், துடிக்கக்கூடிய செயற்கை இதயத்தின் ஒரு பகுதி, கனடாவில் வடிவமைக்கப்பட்டுள்ளது.
கனடாவின் டொரன்டோ பல்கலைக்கழகம் மற்றும் மான்ட்ரீல் பல்கலைக்கழகதின் பயோமெடிக்கல் இன்ஜினீயரிங் ஆராய்ச்சியாளர்கள், மனித இதயத்தின் முக்கிய அறையான இடது பக்க வென்ட்ரிக்கிளின் சிறிய அளவிலான மாதிரியை ஆய்வகத்தில் வளர்த்துள்ளனர். விஞ்ஞானிகளால் வடிவமைக்கப்பட்ட, மில்லிமீட்டர் நீளமுள்ள நாளம், ரத்த நாளங்களைப் போலவே துடிக்கிறது.
இந்த உறுப்பானது, செயற்கை மற்றும் உயிரியல் பொருள்களின் கலவையைப் பயன்படுத்தி ஆய்வகத்தில் உருவாக்கப்பட்டது. இளம் எலிகளின் இதய திசுக்களில் இருந்து செல்களை எடுத்து, சிந்தெடிக் மற்றும் உயிரி பொருள்களைப் பயன்படுத்தி வடிவமைத்துள்ளனர்.
