ஸ்டீவ் ரோசன்பெர்க்: இரான் போரில் ரஷ்யா தேடும் ஆதாயம் என்ன?

திங்களன்று அமெரிக்க அதிபர் டொனால்ட் டிரம்ப்புடன் நடத்திய தொலைபேசி உரையாடலில், ரஷ்யாவின் கூற்றுப்படி, புதின் “இரான் மோதலுக்கு விரைவான இராஜதந்திரத் தீர்வை நோக்கமாகக் கொண்ட பல கருத்துக்களைத் தெரிவித்தார்; இது வளைகுடா நாடுகளின் தலைவர்கள், இரான் அதிபர் மற்றும் பிற நாடுகளின் தலைவர்களுடனான தொடர்புகளின் அடிப்படையில் அமைந்தது”.

ரஷ்யாவைப் பொறுத்தவரை, இது வளைகுடா மற்றும் மத்திய கிழக்கில் தனது நற்பெயரை உயர்த்துவதற்கும் – செல்வாக்கு மிக்க ஒரு சக்தியாகத் தன்னை நிலைநிறுத்திக் கொள்வதற்கும் ஒரு வாய்ப்பாகும்.

அமெரிக்காவுடனான தனது உறவை ஆழப்படுத்தவும் இது ஒரு வாய்ப்பு.

டிரம்ப்புடன் நல்ல உறவுகளைத் தக்க வைத்துக் கொள்ள ரஷ்யா ஆர்வமாக உள்ளது. டிரம்ப் நிர்வாகத்துடனான தனது உறவு, யுக்ரேனில் ரஷ்யாவின் போர் நோக்கங்களுக்குப் பயனுள்ளதாக இருக்கும் என்று அது கருதுகிறது.

அதனால்தான் இரான் போர் தொடர்பாக டிரம்ப்பை தனிப்பட்ட முறையிலும் பகிரங்கமாகவும் விமர்சிக்காமல் புதின் கவனமாக இருந்து வருகிறார்.

“புதின் உதவியாக இருக்க விரும்புகிறார்,” என்று புதினுடனான தனது தொலைபேசி உரையாடலுக்குப் பிறகு திங்களன்று டிரம்ப் கூறினார்.

“நான் சொன்னேன், ‘யுக்ரேன்-ரஷ்யா போரை முடிவுக்குக் கொண்டு வருவதன் மூலம் நீங்கள் இன்னும் உதவியாக இருக்க முடியும். அதுதான் அதிக உதவியாக இருக்கும்’ என்று சொன்னேன்.” என்றார் டிரம்ப்.

இரான் விவகாரத்தில் ‘பதற்றக் குறைப்புக்கு’ ரஷ்யா அழைப்பு விடுத்தாலும், இந்த மோதல் ரஷ்யாவிற்கு பிற வாய்ப்புகளை வழங்குகிறது.

முதலாவது பொருளாதார வாய்ப்புகள்.

உலகளாவிய எண்ணெய் விலையில் சமீபத்திய உயர்வு ரஷ்ய அரசு வருவாய்க்கு மிகவும் தேவையான ஊக்கத்தை அளிக்கிறது மற்றும் – நீண்ட கால உயர் விலைச் சூழலில் – ரஷ்யா யுக்ரேன் மீதான தனது போருக்குத் தொடர்ந்து நிதி திரட்ட இது உதவும்.

ரஷ்யாவின் மத்திய பட்ஜெட், நாடு ஒரு பேரல் எண்ணெயை 59 டாலருக்கு ஏற்றுமதி செய்வதை அடிப்படையாகக் கொண்டது.

சமீபத்திய மாதங்களில் எண்ணெய் விலை அந்த மட்டத்திற்கு கீழே சரிந்தது. இந்த வாரம், கச்சா எண்ணெய் விலை வியக்கத்தக்க வகையில் ஒரு பேரல் கிட்டத்தட்ட 120 டாலராக உயர்ந்தது. அவை அதன்பிறகு குறைந்துவிட்டன, ஆனால் எண்ணெய் விலைகள் இன்னும் 59 டாலர் என்ற அளவுக்கு மேலேயே உள்ளன.

அதுமட்டுமின்றி, இரான் போரினால் ஏற்பட்டுள்ள தட்டுப்பாட்டைப் போக்க “சில நாடுகளுக்கு” எண்ணெய் தொடர்பான தடைகளிலிருந்து அமெரிக்கா விலக்கு அளிக்கும் என்று டிரம்ப் தெரிவித்துள்ளார்.

ரஷ்யா மீதான எண்ணெய் தடைகள் தளர்த்தப்பட்டால், ரஷ்யா இன்னும் பெரிய நிதி லாபத்தை எதிர்பார்க்கலாம். யுக்ரேன் அதிபர் வோலோடிமிர் ஜெலென்ஸ்கி இது யுக்ரேனுக்கு ஒரு “கடுமையான அடியாக” இருக்கும் என்று கூறினார் மற்றும் அதற்கு எதிராக இருக்குமாறு டிரம்ப்பை வலியுறுத்தினார்.

ரஷ்ய ஆதரவு செய்தித்தாளான ‘கொம்சோமோல்ஸ்காயா பிராவ்தா’ நம்பிக்கையுடன் செய்தி ஒன்றை வெளியிட்டுள்ளது.

“மேற்கு நாடுகள் ரஷ்யா மீதான தடைகளை ரத்து செய்வதற்கு எண்ணெய் விலை உயர்வு ஒரு காரணமாகும்,” என்று அதன் தலைப்பு அறிவித்தது.

புதின் அல்லது ரஷ்ய அரசு நேரடியாக அமெரிக்க அதிபரை விமர்சிக்காமல் இருக்கலாம், ஆனால் சில ரஷ்ய செய்தித்தாள்கள் டிரம்ப்பையும் இரான் போரையும் கடுமையாகச் சாடி வருகின்றன.

“‘அமைதி அதிபர்’ புத்தி சுவாதீனத்தை இழந்துவிட்டார்,” என்று செவ்வாயன்று வெளியான ‘மாஸ்கோவ்ஸ்கி கொம்சோமோலெட்ஸ்’ என்ற செய்தித்தாள் எழுதியிருக்கிறது.

– இது, பிபிசிக்காக கலெக்டிவ் நியூஸ்ரூம் வெளியீடு