அன்புமணி மீது ராமதாஸ் அடுக்கிய குற்றச்சாட்டுகள் பாமக-வை எந்த அளவுக்கு பாதிக்கும்?

செய்தியாளர்கள் மத்தியில் பேசிய ராமதாஸ், “எனக்கு 14 ‘பஞ்சாயத்துக்கள்’ வைக்கப்பட்டன. நான் 34 அமைப்புகளை உருவாக்கியிருக்கிறேன். எனக்கு பஞ்சாயத்து வைக்கப்பட்டது. அவர்கள் அனைவரும் கட்சியை அய்யா பார்த்துக் கொள்ளட்டும், நீங்கள் மக்களை பாருங்கள் என்றனர். ஆனால் அவர் கேட்டை சாத்திக் கொண்டு மக்களை பார்க்காமல் உள்ளேயே இருக்க வேண்டும் என்று நினைத்தார்” என்றார்.

அன்புமணி பொய் பேசுவார் என்று குற்றம்சாட்டிய ராமதாஸ் அதில் இரண்டு பொய்களை மட்டும் இப்போது கூறுகிறேன் என்றார். ” 108 மாவட்டச் செயலாளர்களில் 100 பேருக்கு நேரடியாக கால் செய்து மாவட்டச் செயலாளர் கூட்டத்துக்கு போகாதீர்கள், என்னை அடிப்படை உறுப்பினர் பொறுப்பிலிருந்து எடுக்கப் போகிறார்கள் என்று அன்புமணி கூறியுள்ளார். அப்படி கூறியதால் 100 பேர் கூட்டத்துக்கு வரவில்லை.” என்றார்.

மேலும், “ஆறு பேர் அடியாட்களை கொண்டு நான் அடிக்கப் போகிறேன் என்று சமூக ஊடகப் பேரவைக் கூட்டத்தில் பங்கேற்க வருபவர்களிடம் கூறியுள்ளார். இது மற்றொரு பொய். ஆனால் 100 பேர் கூட்டத்துக்கு வந்துவிட்டனர்” என்றார்.

எட்டு நாட்களில் அன்புமணியை தலைவராக்க வேண்டும் என்ற கோரிக்கையுடன் மருமகள் சௌம்யா அன்புமணி தன்னை வந்து சந்தித்ததாக ராமதாஸ் கூறினார். சௌம்யா கூறிய உடன், அப்போது தலைவராக இருந்த ஜி கே மணியிடம் தெரிவித்ததாகவும், ஜி கே மணி ஒன்றரை மாத காலம் அவகாசம் கேட்டதாகவும் ராமதாஸ் தெரிவித்தார். “தனியார் நிறுவனத்தில் வேலை செய்தால் கூட ஒரு பொறுப்பிலிருந்து விலக ஒரு மாதம் காலம் வழங்கப்படும். ஆனால் எட்டு நாட்களில் தலைவராக்க வேண்டும் என்று கேட்டனர். மண்டபம் எல்லாம் பார்த்துவிட்டேன் என்று சௌம்யா கூறினார்” என்றார்.

அன்புமணி தலைவராக நியமிக்கப்பட்ட கூட்டத்தை நினைவு கூர்ந்து பேசிய ராமதாஸ், “பிறகு பட்டாபிஷேகம் செய்து கட்டி பிடித்து கண்ணீர் வடித்தேன். என் குடும்பத்தை சேர்ந்தவர்கள் யாரும் பொறுப்புகளுக்கு வர மாட்டார்கள் என்று சத்தியம் செய்திருந்தேன். ஆனால் மத்திய அமைச்சர் பொறுப்பை அன்புமணிக்கு தர வேண்டும் என்று என் குடும்பத்தில் இருப்பவர்கள் என்னை வறுத்து எடுத்தார்கள், ஜி கே மணியும் வலியுறுத்தினார்” என்றார்.

இந்த பிரச்னைகாளுக்கான தீர்வு, “நிறுவனர் கொடுத்த செயல் தலைவர் பதவியை சந்தோசமாக ஏற்று பணி செய்வேன், செயல் தலைவர் இல்லை என்றாலும் கூட தொண்டனாக இருந்து கூட கட்சி வளர்ப்பேன் என்று கூறுவதே” என்றார்.

பாஜக கூட்டணி குறித்து கேட்ட போது, பாஜக கூட்டணியில் இருக்கிறதா இல்லையா என கூறுவதில் சில சங்கடங்கள் உள்ளன என்றார். மாநிலங்களவைத் தேர்தலில் யாருக்கு ஆதரவு என்று கேட்டபோது, உறுப்பினர் தேர்தலில் நாங்கள் சீட்டு கேட்க கூடாதா நானே கூட தான் போட்டியிடுவேன் என்று பதிலளித்தார்.

மூன்று மாதங்களாக பாமகவில் ராமதாஸ் – அன்புமணி இடையே நடக்கும் சண்டையால் எவ்வித தாக்கமும் இருப்பதாகத் தெரியவில்லை என்கிறார், மூத்த பத்திரிகையாளர் ஏ.எஸ். பன்னீர்செல்வம்.

“நடைபெறவுள்ள மாநிலங்களவை தேர்தலில் அதிமுக சார்பாக பாமகவுக்கு ஒரு சீட் வழங்கப்படுமா என்பதைப் பொறுத்தே பாமகவுக்கு அரசியலில் என்ன எதிர்காலம் இருக்கும் என்பதைக் கணிக்க முடியும். ஒருவேளை அவர்களுக்குக் கொடுக்கவில்லை என்றால், பாஜகவுக்கு பாமக மீது நல்ல அபிப்ராயம் இல்லை என்பது தெரிந்துவிடும்” என்றார் பிபிசி தமிழிடம் பேசிய பன்னீர்செல்வம்.

நாடாளுமன்றத் தேர்தலில் பாஜகவுடன் கூட்டணி வேண்டாம் என ராமதாஸ் கூறியதற்கு சாதகமாகவே தேர்தல் முடிவுகளும் வந்ததால் அவருக்கு அவை ஆதாரங்களாக ஆகிவிட்டதாகக் கூறுகிறார் அவர்.

பாஜகவுடன் கூட்டணி வைத்ததால் தங்கள் கட்சிக்கு எந்தவித பயனும் கிடைக்கவில்லை என்பதும் ராமதாஸ் தரப்பில் வலுவான காரணமாக உள்ளதாகக் கூறுகிறார் ஏ.எஸ். பன்னீர்செல்வம்.

அதோடு, “பாமகவை வன்னியர் சங்கத்துடன் இணைத்துதான் பார்க்க வேண்டும். வன்னியர் சங்கம் யாருக்கு ஆதரவாக இருக்கிறதோ அது கட்சிக்குள்ளும் எதிரொலிக்கும்” என்கிறார் அவர்.

தன்னால் கட்சியை சமநிலையில் வைத்திருக்க முடியும் என அன்புமணி நினைப்பதாகக் கூறும் ஏ.எஸ். பன்னீர்செல்வம், ஆனால் அவர் தொடர் தோல்விகளைச் சந்தித்து இருப்பதாகவும் குறிப்பிடுகிறார்.

“தருமபுரி தொகுதியில் அன்புமணி தோற்று பின்னர் அவருடைய மனைவி சௌமியாவும் தோல்வியடைந்தார். முகுந்தனை கட்சிப் பதவியில் அமர்த்தியதில் இருந்தே அன்புமணி கட்சிக் கூட்டங்களில் வியூகரீதியாகச் செயல்படவில்லை. இவை நிச்சயம் வன்னியர் சங்கத்தில் தாக்கத்தை ஏற்படுத்தும்.”

இருப்பினும், மாநிலங்களவை தேர்தலில் பாமக தொடர்பாக அதிமுக என்ன முடிவெடுக்கிறது என்பதைப் பொறுத்தே கட்சிக்குள் யாருக்கு செல்வாக்கு அதிகம் என்பதை வெளிப்படுத்தும் முதல் புள்ளியாக இருக்கும் என்றார் ஏ.எஸ்.பன்னீர்செல்வம்.

– இது, பிபிசிக்காக கலெக்டிவ் நியூஸ்ரூம் வெளியீடு