இஸ்ரேல்: பெஞ்சமின் நெதன்யாகு மீது நடந்த கொலை முயற்சியின் பின்னணி என்ன? யார் காரணம்?

இஸ்ரேல் ராணுவம் சனிக்கிழமை அன்று, மூன்று ஆளில்லா விமானங்கள் லெபனான் நாட்டில் இருந்து இஸ்ரேலுக்குள் அனுப்பப்பட்டது என்றும், அதில் ஒரு ஆளில்லா விமானம் செசரியாவில் உள்ள கட்டடத்தைத் தாக்கியதாகவும் அறிக்கை வெளியிட்ட சில மணிநேரங்களில் பிரதமர் அலுவலகத்தில் இருந்து பிரதமர் வீடு தாக்குதல் தொடர்பான அறிக்கை வெளியிடப்பட்டது.

என் மீதும் என் மனைவி மீதும் கொலை முயற்சி மேற்கொண்டு, இரானின் கூட்டாளிகள் பெரும் தவறிழைத்துவிட்டதாக நெதன்யாகு பேசியுள்ளார்.

மேலும், “இஸ்ரேலின் எதிர்காலத்தைத் தீர்மானிக்கும் வகையில் எங்கள் எதிராளிகள் மீது நாங்கள் நடத்தி வரும் போரை இந்தத் தாக்குதல் தடுக்காது,” என்று தனது எக்ஸ் பக்கத்தில் பதிவிட்டுள்ளார்.

“இரான் மற்றும் அதன் கூட்டாளிகளுக்கு இதை கூறிக் கொள்கிறேன். என்னுடைய மக்களைக் காயப்படுத்த யாராவது முயற்சி செய்தால் அதற்கு அவர்கள் பெரும் விலையைத் தர நேரிடும்.

நாங்கள் பயங்கரவாதிகளைத் தொடர்ந்து அழித்து வருகிறோம். காஸாவில் பணயக் கைதிகளாக இருக்கும் இஸ்ரேல் மக்களைத் திருப்பி அழைத்து வருவோம்.

கடவுளின் உதவியுடன் நாங்கள் சண்டையிட்டு அதில் வெற்றி அடைவோம்,” என்று அவருடைய பதிவில் குறிப்பிட்டிருந்தார்.

ஹமாஸுக்கு எதிரான போரில் வெற்றி கிடைக்கும் வரை போர் தொடர்வதை செசரியா தாக்குதல் மூலம் தடுத்து நிறுத்திவிட இயலாது என்றும் அவர் தெரிவித்தார்.

சமீபத்தில், “யாஹ்யா சின்வாரை நாங்கள் கொன்றுவிட்டோம்,” என்று கூறி வீடியோ ஒன்றை அவர் வெளியிட்டிருந்தார். அதில், மீண்டு எழுவதற்காக நாங்கள் போரிடுகிறோம், அதன் முடிவு வரை நாங்கள் போராடுவோம் என்றும் அவர் குறிப்பிட்டிருந்தார்.

பிபிசி செய்தியாளர் டாம் பென்னெட்டை பொறுத்தவரை நெதன்யாகு இரண்டு வீடுகளில் வசித்து வருகிறார். ஒன்று செசரியாவில் அமைந்துள்ளது. மற்றொன்று ஜெருசலேமில் அமைந்துள்ளது.

சில நேரங்களில் ஜெருசலேமில் அமைந்துள்ள பிரதமரின் அதிகாரப்பூர்வ இல்லமான பைட் அகியனிலும் அவர் வசிப்பதுண்டு. தற்போது அந்த இல்லத்தைப் புதுப்பிக்கும் பணி நடைபெற்று வருகிறது.