ஈரோடு கிழக்கு தொகுதி இடைத்தேர்தல் அதிமுகவின் சார்பில் கூடுதலாக 5 பொறுப்பாளர்கள் நியமனம்: எடப்பாடி பழனிசாமி அறிவிப்பு

சென்னை: ஈரோடு கிழக்கு தொகுதி இடைத்தேர்தலுக்காக அதிமுக சார்பில் கூடுதலாக 5 தேர்தல் பணிக்குழு பொறுப்பாளர்களை நியமனம் செய்து எடப்பாடி பழனிசாமி அறிவித்துள்ளார். இதுகுறித்து, அவர் விடுத்துள்ள அறிக்கையில் கூறியிருப்பதாவது: ஈரோடு கிழக்கு சட்டமன்றத் தொகுதிக்கான இடைத்தேர்தல் வரும் பிப்.27ம் தேதி நடைபெற உள்ளதை முன்னிட்டு, அதிமுக சார்பில் போட்டியிடும் வேட்பாளருக்கு ஆதரவாக தேர்தல் பணிகளை மேற்கொள்வதற்காக, ஏற்கனவே அறிவிக்கப்பட்டுள்ள தேர்தல் பணிக்குழு பொறுப்பாளர்களுடன் கூடுதலாக 5 தேர்தல் பணிக்குழு பொறுப்பாளர்கள் நியமிக்கப்படுகிறார்கள். அதன்படி, அமைப்பு செயலாளர் முன்னாள் எம்.பி. கே.கோபால், முன்னாள் அமைச்சர் வளர்மதி, முன்னாள் எம்.பி. ரத்தினவேல், முன்னாள் சட்டமன்ற உறுப்பினர் ஆசைமணி, அமைப்புச்செயலாளர் சிவா.ராஜமாணிக்கம் மற்றும் முன்னாள் அமைச்சர் பாஸ்கரன் நியமிக்கப்படுகின்றனர். இவ்வாறு அவர் தெரிவித்துள்ளார்.