ஆப்கானிஸ்தான்: 90,000 கேமராக்கள் மூலம் காபூல் மக்களை கண்காணிக்கும் தாலிபன்கள் – எதற்காக?

முந்தைய அரசாங்கத்தின் கீழ், தாலிபன்கள் மற்றும் இஸ்லாமிய அரசு போராளிகள் என அழைக்கப்படுவோரின் தாக்குதல்கள், கடத்தல் சம்பவங்கள் மற்றும் கார் திருட்டுகளால் காபூல் தினமும் அச்சுறுத்தலுக்கு ஆளானது.

கடந்த 2021இல் தாலிபன்கள் மீண்டும் ஆட்சியைக் கைப்பற்றியபோது, ​​குற்றங்களை ஒடுக்குவதாக அவர்கள் உறுதியளித்தனர்.

ஆப்கானிஸ்தான் தலைநகரில் கண்காணிப்பு கேமராக்களின் எண்ணிக்கையை அதிகப்படுத்தியிருப்பது, சட்டம் மற்றும் ஒழுங்கை அமல்படுத்தும் விதத்தில், தாலிபான்கள் முன்னேறி வருவதன் அறிகுறியாகும்.

அவர்கள் மீண்டும் ஆட்சிக்கு வருவதற்கு முன்பு, தலைநகரில் 850 கேமராக்கள் மட்டுமே இருந்தன என்று அதிகாரத்தில் இருந்து விரட்டப்பட்ட பாதுகாப்புப் படைகளின் செய்தித் தொடர்பாளர் ஒருவர் தெரிவித்தார்.

இருப்பினும் கடந்த மூன்று ஆண்டுகளில், மக்களின் உரிமைகள் மற்றும் சுதந்திரங்களை, குறிப்பாக பெண்களின் உரிமைகளைக் கட்டுப்படுத்தும் பல்வேறு கடுமையான நடவடிக்கைகளை தாலிபன் அதிகாரிகள் அறிமுகப்படுத்தியுள்ளனர். தாலிபன் அரசாங்கத்தை வேறு எந்த நாடும் முறையாக அங்கீகரிக்கவில்லை.

காபூலில் பிபிசிக்கு காட்டப்பட்ட கண்காணிப்பு அமைப்பில் முக அடையாளங்களைக் கண்டறியும் தொழில்நுட்பத்தின் மூலம் மக்களைக் கண்காணிக்கும் வசதி உள்ளது. ஒரு திரையின் மூலையில் வயது வரம்பு, பாலினம் மற்றும் ஒருவர் தாடி வைத்திருக்கிறாரா அல்லது முகமூடி அணிந்திருக்கிறாரா என்பதைப் பொறுத்து ஒவ்வொரு முகமும் வகைப்படுத்தப்பட்ட படங்களாகத் தோன்றும்.

“தெளிவான வானிலை இருக்கும் நாட்களில், ஒரு கிலோமீட்டர் தொலைவில் உள்ள நபர்களைக்கூட ஸூம் (Zoom) செய்து பார்க்க முடியும்,” என்று கூறும் சத்ரான், ஒரு பரபரப்பான போக்குவரத்து சந்திப்பில் வைக்கப்பட்டுள்ள ஒரு கேமராவை உதாரணமாகக் காட்டுகிறார்.

தாலிபன்கள் தங்கள் சொந்த ஊழியர்களைக்கூட கண்காணிக்கிறார்கள். ஒரு சோதனைச் சாவடியில், வீரர்கள் ஒரு காரின் டிக்கியை திறந்து சோதனை செய்யும்போது, ​​கட்டுப்பாட்டு மைய ஆபரேட்டர்கள் ஸூம் செய்து அதைப் பார்க்கிறார்கள்.

“பாதுகாப்பை மேம்படுத்துவதற்கும், குற்ற விகிதங்களைக் கட்டுப்படுத்துவதற்கும், குற்றவாளிகளை விரைவாகப் பிடிப்பதற்கும்” இந்த கேமராக்கள் குறிப்பிடத்தக்க பங்களிப்பைச் செய்துள்ளதாக உள்துறை அமைச்சகம் கூறுகிறது.

சிசிடிவி மற்றும் மோட்டார் சைக்கிள் கட்டுப்பாடுகள் அறிமுகப்படுத்தப்பட்டதன் மூலம் 2023 மற்றும் 2024க்கு இடையில் குற்ற விகிதங்கள் 30% குறைந்துள்ளன என்றும் உள்துறை அமைச்சகம் சுட்டிக்காட்டியது. ஆனால் இந்தப் புள்ளிவிவரங்களை பிபிசியால் சுயாதீனமாகச் சரிபார்க்க முடியவில்லை.