ஐபிஎல் டி20: CSK vs RCB: டு பிளெசி, மேக்ஸ்வெல்லின் அதிரடியை கட்டுப்படுத்தி சென்னையை வெற்றி பாதைக்கு அழைத்து சென்ற கேப்டன் தோனி

இறுதியில் பெங்களூரு அணிக்கு வெற்றியை பெற்றுத் தர களமிறக்கப்பட்ட இம்பாக்ட் பிளேயரால் அந்த அணிக்கு வெற்றியை பெற்றுத் தர முடியாமல் போனது.

ஐபிஎல் தொடரின் 24வது லீக் ஆட்டத்தில் சென்னை சூப்பர் கிங்ஸ் அணி ராயல் சேலஞ்சர்ஸ் பெங்களூரு அணியை எதிர்கொண்டது. கர்நாடக மாநிலம் பெங்களூருவில் உள்ள சின்னசாமி ஸ்டேடியத்தில் இந்த போட்டி நடைபெற்றது.

டாஸ் வென்ற பெங்களூரு அணியின் கேப்டன் டு பிளெசி பந்துவீச்சை தேர்வு செய்தார்.

சென்னை அணி 20 ஓவர் முடிவில், 6 விக்கெட் இழப்பிற்கு 226 ரன்கள் குவித்தது. சென்னை அணிக்காக கான்வே 83 ரன்கள் குவித்து இருந்தார்.

227 ரன்கள் என்ற இலக்குடன் தனது இன்னிங்சை தொடங்கியது ராயல் சேலஞ்சர்ஸ் பெங்களூரு அணி. தொடக்க ஆட்டக்காரர்களாக விராட் கோலியும், டு பிளெசியும் களமிறங்கினார்கள்.

சென்னை அணியில் அம்பதி ராயுடுவுக்கு பதிலாக இம்பாக்ட் பிளேயராக ஆகாஷ் சிங் உள்ளே வந்தார். அவரே முதல் ஓவரை சென்னை அணிக்காக வீசினார். ஆகாஷ் வீசிய இரண்டாவது பந்தை பவுண்டரிக்கு வீளாசினார் கோலி.

ஆனால் அந்த ஓவரின் நான்காவது பந்திலேயே கோலியை போல்டாக்கி, தான் உள்ளே அழைத்து வரப்பட்ட இம்பாக்டை ஏற்படுத்தினார் ஆகாஷ். அதனால் முதல் ஓவரிலேயே 6 ரன்களுடன் பெவிலியனுக்கு நடையைக் கட்டினார் கோலி.

கோலியின் விக்கெட்டை இழந்த சில நிமிடத்திலேயே ஒன்டவுனாக வந்த லோம்ரோரை அவுட்டாக்க வாய்ப்பு கிடைத்தது. முதல் ஓவரின் கடைசிப் பந்தில் லோம்ரோர் கொடுத்த கேட்சை தீக்‌ஷனா கோட்டை விட்டார்.

ஆனால் இந்த தவறுக்கு சென்னை அதிக விலை கொடுக்கும் முன்பே அடுத்த ஓவரிலேயே லோம்ரோர் வெளியேற்றப்பட்டார். துஷர் தேஷ்பாண்டே வீசிய அந்த ஓவரின் கடைசிப் பந்தில் தூக்கி அடிக்கபட்ட ஷாட்டை ரித்துராஜ் பிடித்தார்.

ஆரம்பத்திலேயே கோலியின் விக்கெட்டை காலி செய்து, பெங்களூருவை கட்டுப்படுத்தலாம் என கணக்கு போட்டு இருந்த சென்னை அணிக்கு சிம்ம சொப்பனமாக மேக்ஸ்வெல்லும், டு பிளெசியும் மாறினார்கள்.

3வது விக்கெட்டுக்கு பார்ட்னர்ஷிப் அமைத்த இந்த ஜோடி சென்னையை புரட்டி எடுத்தது. முதல் 2 ஓவரில் 15 ரன்கள் எடுத்திருந்த பெங்களூருவின் ரன்ரேட்டை மிக வேகமாக உயர்த்த உதவியது இந்த இணை.

சென்னையின் பவுலர்களான ஆகாஷ் சிங், துஷர் தேஷ்பாண்டே, தீக்‌ஷனாவின் பந்துகளை மைதானம் முழுவதும் விரட்டி அடித்தனர் பெங்களூருவின் இந்த பேட்டர்கள்.

தொடர்ந்து ஃபோரும், சிக்சருமாக அடித்து சென்னைக்கு பிரச்னையாக மாறினார்கள். ஒன்பதாவது ஓவரில் டு பிளெசியும், பத்தாவது ஓவரில் மேக்ஸ்வெல்லும் அரை சதத்தை அடித்தனர்.

பத்து ஓவர் முடிவில் பெங்களூரு அணி 2 விக்கெட் இழப்பிற்கு 121 ரன்கள் குவித்தது. சென்னை அணி பத்து ஓவர் முடிவில் 97 ரன்கள் மட்டுமே குவித்திருந்தது.

11வது ஓவரை வீசிய சென்னையின் சுழற்பந்து வீச்சாளரான தீக்‌ஷனா, இரண்டாவது முறையாக ஒரு கேட்சை தவறவிட்டார். டு பிளெசி கொடுத்த கேட்ச் வாய்ப்பை தட்டுத்தடுமாறி தவறவிட்டார் தீக்‌ஷனா.

ஆனால் தன் தவறுக்கு பொறுப்பு ஏற்கும் வகையில் தன்னுடைய அடுத்த ஓவரிலேயே சென்னைக்கு தேவைப்பட்ட விக்கெட்டை வீழ்த்தினார் தீக்‌ஷனா.

மேக்ஸ்வெல் அடித்த பந்து உயரத்தில் மேலே எழ, அதை நோக்கி தீக்‌ஷனா வர வேண்டாம் என்று கூறியபடியே ஓடிச்சென்று கேட்சை பிடித்தார் சென்னையின் கேப்டன் தோனி. அதையடுத்து 36 பந்துகளில் 76 ரன்களை குவித்து வெளியேறினார் மேக்ஸ்வெல். தன்னுடைய இன்னிங்சில் மொத்த 8 சிக்ஸ், 3 ஃபோர்களை விளாசினார் மேக்ஸ்வெல்.

அந்த ஓவரிலேயே டு பிளெசிக்கு எதிராக எல்.பி.டபுள்யூ அப்பீல் கேட்டார் தீக்‌ஷனா. அனால் நடுவர் அதை தர மறுக்க, பவுலரிடம் கேட்டு ரிவியூ கேட்டார் தோனி.

ஆனால் பந்து ஸ்டம்புக்கு ஆஃப் சைடு பிட்ச் ஆனதால் விக்கெட் வழங்கப்படவில்லை. சென்னைக்கு பயமளிக்கும் வகையில் டு பிளெசி களத்தில் இருந்தார்.

13வது ஓவர் முடிவிலேயே சென்னை, தனது ஸ்பின் பவுலர்களை வைத்து 8 ஓவர்களை வீசிய போதும் டு பிளெசியின் விக்கெட்டை வீழ்த்த முடியவில்லை.

பின்னர் வந்த மொயின் அலி, சென்னைக்கு மிகவும் தேவைபட்ட டு பிளெசியின் விக்கெட்டை வீழ்த்தினார். மேக்ஸ்வெல்லின் கேட்சை போல உயரத்தில் சென்ற பந்தை தோனி விரட்டி சென்று பிடித்தார்.

ஆனால் பெங்களூரு அணிக்கு நல்ல அடித்தளத்தை கொடுத்த டு பிளெசி, 33 பந்துகளில் 62 ரன்களுடன் வெளியேறினார்.

10 ஓவர் முடிவில், 2 விக்கெட்டுகளை இழந்து 121 ரன்களை குவித்து இருந்த பெங்களூரு அணி, 18வது ஓவர் முடிவில் 6 விக்கெட்டுகளை இழந்து 196 ரன்கள் எடுத்திருந்தது.

வெற்றி பெற 12 பந்துகளில் 31 ரன்கள் தேவை என்ற இலக்குடன் ஆடிய பெங்களூரு அணியில் பெரிய ஹிட்டர்கள் யாரும் இல்லாமல் இருந்தனர்.

களத்தில் இம்பாக்ட் பிளேயர் மட்டுமே இருந்த நிலையில், அவருடன் விளையாடிய பர்னெலை 19வது ஓவரில் வீழ்த்தினார் துஷர் தேஷ்பாண்டே.

ஆனால் அதே ஓவரில் ஒரு பந்தை சிக்ஸுக்கு விரட்டி பெங்களூரு ரசிகர்களுக்கு நம்பிக்கை அளித்தார் பிரபுதேசாய்.

19வது ஓவரின் இறுதியில் 7 விக்கெட்டுகளை இழந்து 208 ரன்கள் எடுத்திருந்தது பெங்களூரு.

சென்னை அணிக்காக கடைசி ஓவரை வீச வந்தார் இளம் பவுலரான பதிரானா. வெற்றிக்கு 19 ரன்கள் தேவை என்ற இலக்குடன் இம்பாக்ட் பிளேயரை நம்பி கடைசி ஓவரை எதிர்கொண்டது பெங்களூரு அணி.

ரன்கள் அதிகம் போகதவாறு பீல்டிங்கை கச்சிதமாக செட் செய்திருந்தார் தோனி. கடைசி ஓவரின் முதல் இரண்டு பந்துகளில் தலா 1 ரன் மட்டுமே எடுக்கப்பட்ட நிலையில் மூன்றாவது பந்தை சிக்சராக்கினார் பிரபுதேசாய்.

ஆனால் வெற்றிக்கு தேவைப்பட்ட கூடுதல் 11 ரன்களை எடுக்க முடியாமல் தோற்று போனது பெங்களூரு அணி.

இறுதியாக 20 ஓவர் முடிவில் 8 விக்கெட் இழப்புக்கு பெங்களூர் அணி 218 ரன்கள் மட்டுமே எடுத்ததால், சென்னை அணி 8 ரன்கள் வித்தியாசத்தில் வெற்றி பெற்றது.

டாஸ் வென்ற பெங்களூரு அணி, பீல்டிங் தேர்வு செய்ததையடுத்து சென்னை அணிக்காக ரித்துராஜ் கெய்க்வாட், டெவான் கான்வே தொடக்க ஆட்டக்காரர்களாக களமிறங்கினர். முதல் ஓவரை பெங்களூரு அணியின் சிராஜ் வீசினார். இதில் நான்கு டாட்பால் உட்பட 3 ரன்னை மட்டுமே விட்டுக் கொடுத்தார் சிராஜ்.

சிராஜ் வீசிய அடுத்த ஓவரில் சென்னை அணி தனது முதல் விக்கெட்டை இழந்தது. லெக்சைடில் கெய்க்வாட் தூக்கி அடித்த பந்தை பவுண்டரி லைனுக்கு அருகே கேட்ச் பிடித்தார் பர்னெல். அதிகம் எதிர்பார்க்கப்பட்ட கெய்க்வாட் 3 ரன்னில் அவுட்டாகி ஏமாற்றம் அளித்தார்.

தொடக்கத்திலேயே விக்கெட்டை இழந்த சென்னை நிதானமான ஆட்டத்தை வெளிப்படுத்தியது. 5வது ஓவரில் பந்து வீச வைஷாக் வந்த போது அடித்து ஆட தொடங்கியது சென்னை. அந்த ஓவரில் ஒரு ஃபோர், ஒரு சிக்ஸ் என மொத்தம் 15 ரன்களை குவித்தது ரஹானே, கான்வே ஜோடி.