தக்காளி, தேங்காய் சட்னிலாம் பழசு… இந்த முறை கொய்யா சட்னி செஞ்சு பாருங்க!

இல்லத்தரசிகள் அனைவருக்கும் இருக்கும் ஒரே பிரச்சனை ஒன்றுதான். நாளைக்கு என்ன சமைக்கலாம்… குழம்பு என்ன வைக்கலாம் என்பது தான். ஏனென்றால், தினமும் ஒரே சமையலை செய்தால் வீட்டில் உள்ளவர்களுக்கு சலித்துவிடும். எனவே, நம்மில் பலர் புதிய புதிய விஷயங்களை சமையலில் முயற்சிப்போம்.

இட்லி, தோசை என்றாலே நமது நினைவுக்கு வருவது தேங்காய் சட்னி, தக்காளி சட்னி, புதினா சட்னி, சாம்பார் தான் வரும். எப்போதாவது இட்லி, தோசைக்கு ஏற்ற வகையில் கொய்யா காய் வைத்து ஒரு சட்னி வைத்தால் எப்படி இருக்கும் என நினைத்தது உண்டா?  கொய்யா  பயன்படுத்தி சுவையான சட்னி ஒன்றை எப்படி தயார் செய்யலாம் என பார்க்கலாம்.

தேவையான பொருட்கள் :

கொய்யா  – 3.

புதினா – ஒரு கொத்து.

இஞ்சி – 2 இன்ச் அளவு.

சர்க்கரை – 1/2 ஸ்பூன்.

பச்சை மிளகாய் – 2.

சீரகம் – 1/2 ஸ்பூன்.

எலுமிச்சை பழம் – 1.

உப்பு – தேவையான அளவு.

செய்முறை :

முதலில் சட்னி செய்ய எடுத்துக்கொண்ட கொய்யா காயினை நன்கு சுத்தம் செய்து பின் பொடியாக நறுக்கி தனியே எடுத்து வைக்கவும்.

இதை தொடர்ந்து எடுத்து வைத்துள்ள, இஞ்சி மற்றும் பச்சை மிளகாயினை சுத்தம் செய்து, ஒரு மிக்ஸி ஜாரில் சேர்த்து பேஸ்ட் போல் அரைத்து வைத்துக் கொள்ளவும்.

இதனிடையே, எடுத்துக்கொண்ட புதினா இலைகளை தண்டு நீக்கி சுத்தம் செய்து, இலைகளை மட்டும் தனியே (சுத்தம் செய்து) எடுத்து வைத்துக் கொள்ளவும்.

தற்போது மிக்ஸி ஜார் ஒன்று எடுத்து அதில் நறுக்கிய கொய்யா காய், புதினா இலைகள், சீரக விதைகள், உப்பு மற்றும் சர்க்கரை சேர்த்து நன்கு ஒரு முறை அரைக்கவும்.

Also Read | மூட்டு வலிக்கு முடிவுக்கட்டும் ஆட்டுக்கால் சூப் – இதோ செய்முறை!

இப்போது, ஏற்கனவே அரைத்து தனியே எடுத்து வைத்த இஞ்சி – பச்சை மிளகாய் விழுதை சேர்த்து மற்றும் சிறிதளவு தண்ணீர் சேர்த்து சட்னி பதத்திற்கு அரைத்து தனி ஒரு பாத்திரத்திற்கு மாற்றிக் கொள்ளவும்.

பதமாக அரைத்த இந்த சட்னியில் தற்போது போதுமான அளவு எலுமிச்சை சாறு சேர்த்து நன்கு கலந்துக்கொள்ள சுவையான கொய்யா சட்னி தயார். தேவைப்பட்டால், கடுகு மற்றும் கறிவேப்பிலை சேர்த்து தாளித்து அதில் சேர்த்துக்கொள்ளலாம்.

இந்த சுவையான இந்த கொய்யா சட்னியை இட்லி, தோசை என உங்களுக்கு பிடித்தமான உணவு வகையுடன் சேர்த்து சுவையாக பரிமாறலாம்.