நாய்க்கடி: ரேபிஸ் நோய்க்கு தமிழகத்தில் இரு மடங்கு மக்கள் பலி – ஆபத்து அதிகரிப்பது ஏன்?

“நாய், எலி, பூனை, குரங்கு உள்பட எந்த விலங்கு கடித்தாலும் கடிபட்ட இடத்தில் ஓடும் நீரில் சோப் போட்டுக் கழுவ வேண்டும். தடுப்பு மருந்தை எடுத்துக் கொள்ள வேண்டும்” எனக் கூறுகிறார் குழந்தைசாமி.

நாய்க்கடிக்கு ரேபிஸ் தடுப்பூசி (ARV) மற்றும் இம்யுனோகுளோபுலின் (Immunoglobulin) ஆகிய மருந்துகள் மிகப் பாதுகாப்பானவை எனக் கூறும் அவர், “கை, கால் ஆகியவற்றில் கொடுங்காயம் ஏற்பட்டால் மட்டுமே இம்யுனோகுளோபுலின் ஊசி போடப்படுகிறது” என்றார்.

இம்யுனோகுளோபலின் என்ற மருந்து சந்தையில் சுமார் நாற்பதாயிரம் ரூபாய்க்கு மேல் விற்கப்படுகிறது. “விலை அதிகமாக இருந்தாலும் 30 படுக்கைகள் கொண்ட அரசு மருத்துவமனைகளில் விலையில்லாமல் இந்த மருந்து செலுத்தப்படுகிறது” என்கிறார் குழந்தைசாமி.

தொடர்ந்து பேசிய அவர், “ஊசியைப் போட்டுக் கொண்டால் ரேபிஸ் பாதிப்பில் இருந்து தப்பித்துக் கொள்ளலாம். ரேபிஸ் வந்துவிட்டால் உயிர் இழப்பைத் தவிர வேறு வழியில்லை” எனவும் அவர் கூறுகிறார்.

நாய் கடித்த நாளை பூஜ்ஜிய நாளாகக் குறிப்பிட்டு அரசு மருத்துவமனைகளில் முதல் ஊசி செலுத்தப்படுவதாகக் கூறும் குழந்தைசாமி, “மூன்றாவது நாள், ஏழாவது நாள், 28வது நாள் எனக் கணக்கிட்டு ஊசி செலுத்தப்படுகிறது. தாமதமாகச் சென்று ஊசி போடுவதால் பலன் இல்லை” என்றும் அவர் தெரிவித்தார்.

“நாய் கடித்த பிறகு பத்து நாளில் இருந்து மூன்று மாதங்கள் கழித்துக்கூட ரேபிஸ் பாதிப்பு வரலாம்” எனக் கூறும் குழந்தைசாமி, நாய் கடித்த பிறகு மருத்துவமனைக்குச் செல்வதில் ஏற்படும் தாமதம், வளர்ப்பு நாய் குறித்த அலட்சியம் ஆகியவை ரேபிஸ் பாதிப்பு ஏற்படக் காரணமாக உள்ளதாகவும் குறிப்பிட்டார்.