தரங்கம்பாடி டேனிஷ் கோட்டை எதற்காக கட்டப்பட்டது? அதன் தனிச்சிறப்புகள் என்ன? ஒரு வரலாற்றுப் பார்வை

இக்கோட்டை டேனிஷ் பாணியில், பெரிய அரங்குகள், உயர் கூரைகளுடன் கட்டப்பட்டுள்ளது. கடற்கரையை ஒட்டிய இந்தக் கோட்டையின் நீளம் 60 மீட்டராகவும் அகலம் சுமார் 11 மீட்டராகவும் இருக்கிறது.

இந்தக் கோட்டை சுமார் இரண்டரை ஏக்கர் நிலப்பரப்பில் அமைந்துள்ளது. கோட்டையின் முதல் சுற்றுக்கு வெளியில் பெரிய அகழி இருந்தது. இந்த அகழிக்கு வேண்டிய தண்ணீர் உப்பனாற்றில் இருந்து கொண்டுவரப்பட்டது. இந்த ஆற்றில் ஒரு கால்வாய் வெட்டி, கோட்டையின் தென்மேற்கு மூலையில் இருந்த மதகு வழியாக அகழியில் தண்ணீர் பாயும் படி செய்யப்பட்டிருந்தது. இந்த அகழியை அடுத்து பெரிய மதில் ஒன்றும் இருந்தது. இந்த வெளிமதில் தற்போதுள்ள அணிவகுப்பு மைதானத்தின் நடுப்பகுதியில் அமைந்திருந்தது. இந்த மதிலில் இருந்து கோட்டைக்குச் செல்ல பாலம் அமைக்கப்பட்டிருந்தது.

கி.பி. 1800ஆம் ஆண்டு இந்தக் கோட்டை திருத்தி அமைக்கப்பட்ட போது வடக்கு மற்றும் மேற்கு பகுதிகளில் இருந்த 16 அறைகளும் நான்கு மூலைகளில் இருந்த தாமரை மொட்டு போன்ற மதில் பகுதியும் அகற்றப்பட்டன. அப்போதுதான் கோட்டையின் மதில், சதுர வடிவமாக மாற்றி அமைக்கப்பட்டது.

கைதிகளை அடைக்க கிழக்கு – மேற்கு திசைகளில் சிறைச்சாலைகள் அமைக்கப்பட்டிருந்தன. மரண தண்டனைக் கைதிகளுக்கு, அந்த தண்டனையை நிறைவேற்றுவதற்காக சிறைச்சாலையின் முதல் தளத்தின் மையத்தில் தூக்கு மேடை அமைக்கப்பட்டது. அதன் தரை தளத்தில் ஒரு கிணறு அமைக்கப்பட்டது. முதல் தளத்தில் கைதியின் கழுத்தில் தூக்கு கயிறு கட்டப்பட்டு, அவரது உடல் தரை தளத்தில் அமைந்துள்ள கிணற்றில் இறங்கும் வகையில் மரண தண்டனை நிறைவேற்றப்பட்டது.