தமிழ்நாட்டை சேர்ந்த அமெரிக்க தொழிலதிபரும், அவரது மனைவியும் மாறி மாறி குற்றச்சாட்டு- என்ன பிரச்னை?

அந்தப் பதிவில் தானும் தனது மனைவியும் காதலித்துத் திருமணம் செய்துகொண்டதாகவும் ஆனால், தனது மனைவிக்கு திருமணத்தைத் தாண்டிய உறவு இருப்பதாகத் தெரியவந்ததையடுத்து, இருவரும் விவாகரத்து பெரும் முயற்சியில் இருப்பதாகவும் கூறியிருக்கிறார்.

மேலும், விவாகரத்து பெற்றால் மனைவிக்கு தான் எவ்வளவு பணம் கொடுக்க வேண்டும் என பேச்சு வார்த்தை நடந்து கொண்டிருந்த நிலையில், அதில் திருப்தியடையாத மனைவி, தான் அவரைத் தாக்கியதாகவும் அவரைப் பாலியல் ரீதியாக துன்புறுத்தியதாகவும் நிர்வாண வீடியோக்களை வெளியிட்டதாகவும் புகார் அளித்தார் எனவும் பிரசன்னா தெரிவித்திருக்கிறார்.

“இந்தப் புகாரை விசாரித்த சிங்கப்பூர் காவல்துறை, இவை அடிப்படை ஆதாரமில்லாத குற்றச்சாட்டுகள் என்று கூறி குற்றச்சாட்டுகளில் இருந்து விடுவித்தது. நான் இந்தியாவில் விவாகரத்திற்காக விண்ணப்பித்தேன். மனைவி அமெரிக்காவில் விவாகரத்திற்காக விண்ணப்பித்தார். இந்த வழக்கை வைத்து என் மகனை அமெரிக்காவுக்கு கடத்திச் செல்ல முயற்சித்தார். இதனால் சர்வதேச குழந்தை கடத்தல் வழக்கு ஒன்றை நான் அமெரிக்காவில் பதிவுசெய்தேன். குழந்தையை என்னிடம் ஒப்படைக்கும்படி நீதிமன்றம் உத்தரவிட்டது”, என்றும் பிரசன்னா எக்ஸ் தளத்தில் பதிவிட்டுள்ளார்.

மேலும் அந்த பதிவில், “எங்களது ஊரான சென்னைக்கு வரும்படி மனைவி சொன்னார். நாங்கள் இருவரும் ஒரு புரிந்துணர்வு ஒப்பந்தத்தில் கையெழுத்திட்டோம். நான் 9 கோடி ரூபாய் கொடுப்பதாகவும் மாதம் 4.3 லட்ச ரூபாய் கொடுப்பதாகவும் ஒப்புக்கொண்டேன். குழந்தையை இருவரும் பாதி – பாதி நேரம் வைத்துக்கொள்வதாக ஒப்புக்கொண்டோம். சிறிது காலம் இப்படிச் சென்றது. ஆனால் எங்கள் ஒப்பந்தப்படி, மகனின் பாஸ்போர்ட்டை ஒரு பொதுவான லாக்கரில் வைக்கவில்லை. பிறகு அந்த புரிந்துணர்வு ஒப்பந்தம் செல்லாது எனச் சொல்லிவிட்டு, அமெரிக்காவில் விவாரத்திற்கு மனு செய்யப்போவதாகச் சொன்னார்”, என்றும் அவர் குறிப்பிட்டிருந்தார்.

மேலும், ”பிறகு காவல்துறையிடம் புகார் அளித்து, குழந்தையை மீட்டுத் தரும்படி சொன்னார். நான் காவல்துறைக்கு என் தரப்பு விளக்கத்தை அளித்தேன். என் மகன் என்னுடன் சந்தோஷமாக இருப்பதை வீடியோ காலிலும் காண்பித்தேன். ஆனால், காவல்துறை என் வீட்டிற்குச் சென்று எனது தாயாரிடம் என்னைப் பற்றி விசாரித்திருக்கிறார்கள். எனது நண்பர் கோகுலை மூன்று நாட்களாக வழக்குப் பதிவுசெய்யாமல் பிடித்து வைத்திருக்கிறார்கள்.” எனது தனது பதிவில் குறிப்பிட்டிருந்தார்.

இதற்குப் பிறகு, பிரசன்னாவின் மனைவி வெளியிட்ட வீடியோ ஒன்று ஊடகங்களில் வெளியானது. அந்த வீடியோவில் தன் கணவர், மகனை வலுக்கட்டாயமாக தூக்கிச் சென்றுவிட்டதாக குற்றம்சாட்டியதோடு, வேறு பல தீவிரமான குற்றச்சாட்டுகளையும் சுமத்தினார்.

“என்னுடைய 9 வயது மகனை மூன்று வாரங்களாகக் காணவில்லை. நானும் என் மகனும் அமெரிக்க குடிமக்கள். மூன்று வாரங்களுக்கு முன்பாக என்னையையும் என் மகனையும் ஒரு சொத்து விவகாரம் தொடர்பாக, எனது கணவர் வலுக்கட்டாயமாக இங்கே வரவழைத்தார். எனக்கும் எனது கணவருக்கும் இடையில் திருமணம் தொடர்பான பிரச்னை சென்றுகொண்டிருக்கிறது. இதற்கு நடுவில், எனது கணவரின் பி.ஏ. எனக் கூறிக்கொண்டுவந்த கோகுலகிருஷ்ணன் என்பவர், என் மகனை வலுக்கட்டாயமாக தூக்கிக்கொண்டுபோய்விட்டார். அவர் எனது மகனை, எனது கணவரிடம் விட்டாரா அல்லது எங்கே வைத்திருக்கிறார் என்பது தெரியாமல் தவித்துக்கொண்டிருக்கிறேன்”, என்று பிரசன்னாவின் மனைவி அந்த வீடியோ பதிவில் கூறியுள்ளார்.

தொடர்ந்து பேசிய அவர், “இதனால்தான் காவல்துறையில் புகார் அளித்து, அவர்கள் என் மகனைக் கண்டுபிடித்துக் கொடுக்க வேண்டுமெனக் கேட்டேன். அவருடைய பி.ஏ. என் மகனை அழைத்துச் சென்று, எங்கே வைத்திருக்கிறார், காசுக்காக மிரட்டுகிறார்களா என்பதெல்லாம் தெரியவில்லை. எனக்குப் பயமாக இருக்கிறது. அமெரிக்கத் தூதரகமும் சென்னை நகரக் காவல்துறையும் எனக்கு உதவிசெய்ய முயல்கிறார்கள். கடந்த இரண்டாண்டுகளாக நாங்கள் அமெரிக்காவிலிருந்து வந்து சிங்கப்பூரில் இருந்தோம். என் மகனின் பாஸ்போர்ட்டை எடுத்துக்கொண்டு என் கணவர் சிங்கப்பூரை விட்டு ஓடிவிட்டார். அதனால், என் மகனை எங்காவது கடத்திக்கொண்டு போய்விடுவாரோ என்ற பயமும் இருக்கிறது”, என்று குறிப்பிட்டார்.

“பிரசன்னாவின் பாலியல் தாக்குதல்களுக்கு நான் ஆளாகியிருக்கிறேன். இது தொடர்பாக சிங்கப்பூர் காவல்துறை அவரைக் கைதுசெய்து, நிபந்தனை ஜாமீனில் விடுவித்தது. அவரிடம் நிறைய காசு இருப்பதால் என்ன வேண்டுமானாலும் செய்யலாம் என நினைக்கக்கூடாது. நான் ஒரு அமெரிக்க குடிமகள். நீதிமன்றத்தில் வழக்குத் தொடர்ந்து, அமெரிக்காவில் நான் வழக்குத் தொடரக்கூடாது என ஆர்டர் வாங்குகிறார்கள். சில வருடங்களுக்கு முன்பாக, சான் பிரான்சிஸ்கோவில் பாலியல் தொழிலுக்கு அழைத்ததாக ஒரு ரகசிய நடவடிக்கையில் கைதாகியிருக்கிறார். அதனால்தான் கம்பனியில் அவருடைய பதவியை இழந்தார். சென்னை நகரக் காவல்துறையிடமிருந்து உதவி தேவை. என் மகனை அவர்கள் மீட்டுத் தர வேண்டும்” என்று அந்த வீடியோவில் பிரசன்னாவின் மனைவி கூறியிருந்தார்.

இதேபோல பிரசன்னாவும் ஒரு வீடியோ பதிவை எக்ஸ் தளத்தில் வெளியிட்டுள்ளார். அந்தப் பதிவில் அவர் தன் மகனுடன் இருக்கும் காட்சிகள் இருந்தன.

இதற்குப் பிறகு மீண்டும் எக்ஸ் தளத்தில் பதிவிட்ட பிரசன்னா, காவல்துறையின் பிடியில் இருக்கும் தன்னுடைய நண்பரை விடுவிக்க வேண்டுமென்றால் திருமங்கலம் காவல்துறை 25 லட்ச ரூபாய் பணம் கேட்டு மிரட்டுவதாகவும் குற்றம்சாட்டியிருந்தார்.