சைஃப்-உல்-அசாம்: அரபு போரில் இஸ்ரேலை திணறவைத்த பாகிஸ்தான் விமானி

” இந்தத் தாக்குதலில் பல போக்குவரத்து விமானங்களும், ஹெலிகாப்டர்களும் அழிக்கப்பட்டன. இந்தச் சம்பவங்களைப் பற்றி விவாதிக்க விமானிகள் அம்மானில் உள்ள செயல்பாட்டுத் தலைமையகத்தில் கூடினர்” என்று கைசர் துஃபைல் தனது புத்தகத்தில் குறிப்பிட்டுள்ளார்.

“சுமார் ஒரு மணி நேரத்திற்குப் பிறகு, ஜோர்டான் மன்னர் ஹுசைனும் அந்தக் கூட்டத்தில் கலந்து கொண்டார். முதன் முதலாக ஜோர்டான் ஈடுபட்டுள்ள பெரிய வான்வழிப் போரில் பங்கேற்ற தனது விமானிகளைப் பாராட்ட அவர் அங்கு வந்தார்.”

அந்த சமயத்தில், ஜோர்டான் தனது விமானிகளின் சேவைகளை இராக்கிற்கு வழங்கியதாகவும், விரைவில் அவர்களை இராக்கிற்கு அனுப்ப உத்தரவு பிறப்பிக்கப்பட்டதாகவும் கைசர் துஃபைல் குறிப்பிட்டுள்ளார்.

“ஜூன் 6 ஆம் தேதி, அந்த விமானங்கள் இரவு 9 மணிக்கு இராக்கில் உள்ள ஹபானியா விமானத் தளத்தை அடைந்தன. அங்கு மூன்று ஹண்டர் படைப்பிரிவுகள் இருந்தன.”

“ஜூன் 7 ஆம் தேதி காலை, மென்மையான தட்டும் ஓசையும், அதைவிட மென்மையான குரலும் சைஃப்பை எழுப்பின. ‘முதல் விமானத்தை இயக்க நான்கு விமானிகள் முன்வர வேண்டும் என்றும், நீங்கள் தலைமை தாங்குமாறு கேட்டுக் கொள்ளப்பட்டீர்கள்’ என்றும் கூறி, ஒரு இளம் இராக்கிய அதிகாரி அந்தத் தளத்தின் தளபதியிடமிருந்து வந்த செய்தியை அவரிடம் வழங்கினார்” என கைசர் துஃபைல் தனது நூலில் குறிப்பிடுகிறார்.

விரைவில், நான்கு ஹண்டர் விமானங்களின் ஒரு படைப்பிரிவு, இராக்கின் மேற்கு பாலைவனத்தின் தொலைதூரப் பகுதியில் பாக்தாத்திலிருந்து மேற்கே சுமார் 435 கிலோமீட்டர் தொலைவில் அமைந்துள்ள ஏர்பேஸ் H-3 நோக்கி பறந்து கொண்டிருந்தது.

“25,000 அடி உயரத்தில் பறந்தபோது, கட்டுப்பாட்டாளர் சைஃப்பை அழைத்து, ‘தலைவரே, ஹெச் 3 மீது ஒரு பெரிய தாக்குதல் நடக்கிறது. கீழே சென்று அதை சமாளிக்கவும்’ என அறிவித்தார்.”

“இஸ்ரேலிய படை ஆறு விமானங்களைக் கொண்டிருந்தது. அதில் நான்கு வால்டர் விமானங்களை துணைப் படைத் தளபதி கேப்டன் ஷோலோமன் கரண் வழிநடத்தினார்.

அவருடன், இரண்டு இருக்கைகள் கொண்ட விமானத்தில் நேவிகேட்டராக கேப்டன் அலெக்சாண்டர் அன்பர் மெலிட்சரும் இருந்தார்” என்று கைசர் துஃபைல் தனது நூலில் குறிப்பிடுகிறார்.

மற்ற உறுப்பினர்களில், ராமத் டேவிட் விமானப்படைத் தளத்தின் தளபதி கர்னல் யெசிகல் சௌமிக், கேப்டன் ஐசக் கலென்டிஸ்-கோலன் மற்றும் லெப்டினன்ட் ஓஷலோம் ஃப்ரீட்மேன் ஆகியோர் இருந்தனர். அவர்கள் ஒற்றை இருக்கை கொண்ட விமானங்களில் பறந்தனர்.

“சைஃப்-உல்-அசாம் தலைமையிலான இராக்கிய ஹண்டர் விமானங்கள் ஹெச் -3 விமான தளத்திலிருந்து ஐந்து மைல் தொலைவில் இருந்தபோது, மேற்கிலிருந்து இரண்டு வால்டர் விமானங்கள் வருவதைக் கண்டனர். சைஃப் அந்த விமானங்களில் ஒன்றைத் துரத்தத் தயாராகியபோது, ‘இரண்டு மிராஜ் விமானங்கள் உங்கள் பின்னால் உள்ளன'” என்று விமானி சமீர் அவரை எச்சரித்தார்.

“செய்தியைக் கேட்ட உடனேயே, சைஃப் தனது படையைப் பிரிக்க முடிவு செய்தார். அங்கு அவரும் எஹ்சனும் மிராஜ் ஜெட் விமானங்களைச் சமாளிப்பார்கள் என்றும், அதே நேரத்தில் சமீர் மற்றும் காலிப் வால்டரைப் பின்தொடர்வார்கள்” என்றும் தீர்மானிக்கப்பட்டது.