இளையராஜா: பண்ணையபுரம் முதல் லண்டன் சிம்ஃபொனி இசை வரை – இன்றும் டிரெண்டில் இருப்பது எப்படி?

கதை, திரைக்கதை மற்றும் நடிகர்களின் பங்களிப்பைத் தாண்டி இசை மூலம் ஒரு படத்திற்கு என்ன செய்ய முடியும் என்பதை 1988இல் வெளியான ‘என் பொம்முக்குட்டி அம்மாவுக்கு’ என்ற திரைப்படம் மூலம் இளையராஜா நிரூபித்திருப்பார்.

இந்தத் திரைப்படம் மலையாள இயக்குநர் ஃபாசில் (நடிகர் பஹத் ஃபாசிலின் தந்தை) இயக்கிய ‘என்டே மாமட்டுக் குட்டியம்மாக்கு’ என்ற படத்தின் ரீமேக். தமிழிலும் அவரே இயக்கியிருப்பார். அதே கதை, அதே திரைக்கதை, அதே இயக்குநர். ஆனால் மலையாளத்தில் வேறொரு இசையமைப்பாளர். தமிழுக்கு இளையராஜா இசையமைத்திருப்பார்.

தமிழில் வரும் பின்னணி இசை, குறிப்பாக இறுதிக் காட்சியில் வரும் இசையை, மலையாள படத்தோடு ஒப்பிட்டால் இளையராஜா ஏன் இன்றும் கொண்டாடப்படுகிறார் என்பது புரிந்துவிடும். ஒரு குழந்தையைப் பிரிந்து செல்லும் தாயின் உணர்வுகளை மிக அழகாகத் தனது இசையின் வாயிலாகக் கடத்தியிருப்பார்.

கடந்த 1970களின் இறுதியில் தொடங்கி, 1990களின் தொடக்கம் வரை தமிழ் சினிமாவின் பாடல்களில் இருந்து ஏதேனும் ஒரு பிரபலமான பாடலை போட்டுக் காட்டி, இதற்கு யார் இசையமைப்பாளர் எனக் கேட்டால், யோசிக்காமல் பலரும் கூறும் பதில் ‘இளையராஜா’.

உதாரணமாக ரஜினிகாந்த் நடித்து 1980களில் வெளியான மனிதன், ராஜா சின்ன ரோஜா, ஊர்க்காவலன், தாய் வீடு போன்ற படங்களின் பாடல்களைக் கேட்கும் பலர், இளையராஜாதான் இசையமைப்பாளர் என்றே நினைப்பார்கள்.

சங்கர்-கணேஷ், சந்திரபோஸ் போன்ற இசையமைப்பாளர்கள் அப்போது பல வெற்றிப் பாடல்களைக் கொடுத்துள்ள போதும், ’80களில் தமிழ் சினிமாவில் இளையராஜா மட்டுமே இசையமைப்பாளராக இருந்தார் அல்லது ஒரு நல்ல ரெட்ரோ தமிழ்ப் பாடல் என்றால் ராஜாவின் இசையாகவே இருக்கும்’ என்ற பிம்பம் உருவாகும் அளவுக்கு அவரது பாடல்கள் பெருமளவில் தாக்கம் செலுத்தின.

அதன் தாக்கம் குறித்த ஒரு பிரபலமான உதாரணம்தான், தமிழ்நாட்டின் சிறுநகரங்கள், சிற்றூர்கள் மற்றும் கிராமங்களின் பேருந்துகளில் இன்றும் ஒலிக்கும் ‘இளையராஜா பாடல்கள்’.

நாளை (மார்ச் 8) லண்டனில், வேலியன்ட் (Valiant) என்ற பெயரில், இளையராஜா உருவாக்கிய முதல் சிம்ஃபொனி வெளியிடப்பட இருக்கிறது. சிம்ஃபொனிகள் மிகச் சிக்கலான இசை வடிவமாகக் கருதப்படும் நிலையில், இதை வெறும் 34 நாட்களில் எழுதி முடித்ததாக இளையராஜா தெரிவித்துள்ளார்.

இதற்காகக் கடந்த சில நாட்களாக, தமிழ்நாட்டின் முதலமைச்சர் உள்படப் பல அரசியல் தலைவர்கள் மற்றும் நடிகர்கள் அவரை நேரில் சந்தித்தும், சமூக ஊடகங்கள் மூலமும் தங்கள் வாழ்த்துகளைத் தெரிவித்தனர்.