இந்தியா – பிரிட்டன் தடையற்ற வர்த்தக ஒப்பந்தம் தமிழ்நாட்டின் கோவை, திருப்பூர், கரூருக்கு எவ்வாறு சாதகம்?

வேளாண் விளைபொருட்களுடன், இந்திய ஜவுளிகள், பொறியியல் சார்ந்த உற்பத்திப் பொருட்கள் துறைக்கு பிரிட்டனில் உள்ள சந்தை விரிவடையும் என்றும் அவர் கூறியுள்ளார். இதே கருத்தை பிரிட்டன் பிரதமர் ஸ்டாமரும் வெளிப்படுத்தியுள்ளார்.

இந்த ஒப்பந்தம், இந்திய தொழில்துறையினரிடையே குறிப்பாக ஜவுளித்துறை மற்றும் பொறியியல் துறையில் முன்னிலை வகிக்கும் தமிழகத்தில் பெரும் எதிர்பார்ப்புகளை ஏற்படுத்தியுள்ளன.

கோவை, திருப்பூர் மற்றும் கரூர் உள்ளிட்ட தமிழகத்தைச் சேர்ந்த ஜவுளித்தொழில் சார்ந்த அமைப்பினர் பலரும் இந்த ஒப்பந்தத்துக்கு பெரும் வரவேற்பு தெரிவித்துள்ளனர்.

பிரிட்டனுக்கான ஆடை ஏற்றுமதியில் இந்தியாவின் பங்களிப்பு, முக்கியமாக தமிழகத்தின் பங்களிப்பு அதிகம் என்பது இதற்கு ஒரு காரணமாகக் கருதப்படுகிறது.

பிரிட்டன், உலகின் முக்கிய ஃபேஷன் மையங்களில் ஒன்றாகவும், ஆடை இறக்குமதியில் 5வது பெரிய நாடாகவும் இருப்பதாக ஆயத்த ஆடை ஏற்றுமதி மேம்பாட்டுக் குழுவின் (AEPC – Apparel Export Promotion Council) தலைவர் சுதீர் சேக்ரி கூறுகிறார். கடந்த ஆண்டில் 19.7 பில்லியன் டாலர் மதிப்பிலான ஆடைகளை பிரிட்டன் இறக்குமதி செய்துள்ளதாகக் குறிப்பிட்ட அவர், அதில் இந்தியா 1.2 பில்லியன் டாலர் மதிப்பிலான ஆடைகளை ஏற்றுமதி செய்து பிரிட்டனுக்கான முதல் 4 ஏற்றுமதியாளர்களில் ஒன்றாக இருப்பதாக தெரிவித்தார்.

பிரிட்டனுடனான தடையற்ற வர்த்தக ஒப்பந்தத்தால் இந்தியாவிலிருந்து ஜவுளி ஏற்றுமதி இரட்டிப்பாகும் என்பது தமிழக ஜவுளித்துறை அமைப்புகளின் நிர்வாகிகள் நம்பிக்கை தெரிவிக்கின்றனர்.

பிபிசி தமிழிடம் பேசிய ஆயத்த ஆடை ஏற்றுமதி மேம்பாட்டுக்குழுவின் துணைத்தலைவர் ஏ.சக்திவேல், இந்த ஒப்பந்தம், இந்திய ஜவுளித்துறைக்கு திருப்புமுனையாக அமையும் என்று கூறினார்.

”தடையற்ற வர்த்தக ஒப்பந்தத்தால், இங்கிருந்து ஏற்றுமதியாகும் 99 சதவீதப் பொருட்களுக்கு சுங்க வரியில் விலக்கு கிடைக்கும் அல்லது பெருமளவு வரி குறையும். உணவுத்துறை, ஆடைத்துறை, நகைத்தொழில் போன்ற பல துறைகளுக்கு பெரும்பலன் கிடைக்கும். ஜவுளித்துறையில், திருப்பூர், சூரத், லுாதியானா, புனே, சென்னை, குஜராத், மேற்கு வங்கம், அசாம் ஆகிய நாட்டின் முக்கியமான உற்பத்தி மையங்களுக்கு பிரிட்டனில் இருந்து கூடுதல் ஆர்டர்கள் அதிகரிக்கும்.” என்று நம்பிக்கை தெரிவித்தார் ஏ.இ.பி.சி. துணைத்தலைவர் ஏ.சக்திவேல்.

இதுபற்றி மேலும் விளக்கிய அவர், ”சுங்கவரிச் சலுகையால் பிரிட்டன் ஆடைச்சந்தையில், சீனா, வங்கதேசம், வியட்நாம் ஆகிய நாடுகளுடனான இந்தியாவின் போட்டித்திறன் அதிகரிக்கும். முக்கியமாக, தமிழகத்திலிருந்து பிரிட்டனுக்கான ஜவுளி ஏற்றுமதியின் அளவு இரட்டிப்பாகும். இப்போது ஆயத்த ஆடை ஏற்றுமதி 0.8 பில்லியன் டாலர் (ரூ.12,325 கோடி) என்ற அளவில் உள்ளது. இது 2 பில்லியன் டாலராக (ரூ.27,325 கோடி) அதிகரிக்கும். நெசவுத்துணி ஏற்றுமதி, தற்போது ரூ.6800 கோடியாகவுள்ளது. அது ரூ.17 ஆயிரம் கோடியாக அதிகரிக்கும் வாய்ப்புள்ளது” என்றார்.

இதையே எதிரொலிக்கும் விசைத்தறி மேம்பாடு மற்றும் ஏற்றுமதி ஊக்குவிப்புக்குழுவின் தலைவர் கே.சக்திவேல், தமிழகத்திலுள்ள வீட்டு உபயோக ஜவுளித்துறைக்கு இது பெரும் வாய்ப்பை ஏற்படுத்தும் என்று கூறியுள்ளார். படுக்கை விரிப்பு, திரைச்சீலை உள்ளிட்ட மதிப்பு கூட்டப்பட்ட ஜவுளிப்பொருட்களின் உற்பத்தியை அதிகரிப்பதுடன், சிறு, குறு நிறுவனங்களின் ஏற்றுமதியையும் அதிகப்படுத்தி, பிரிட்டனின் பிரீமியம் சந்தைகளில் நுழையும் வாய்ப்பை ஏற்படுத்தும் என்று அவர் நம்பிக்கை தெரிவித்துள்ளார்.

தமிழகத்தில் கரூர், ஈரோடு ஆகிய பகுதிகளில் தான், திரைச்சீலை, படுக்கை விரிப்பு போன்ற வீட்டு உபயோக ஜவுளிகள் உற்பத்தி அதிகளவில் நடக்கிறது. அங்குள்ள பல்வேறு தொழில் அமைப்புகளும் இந்த ஒப்பந்தத்தை வரவேற்றுள்ளன.

பிபிசி தமிழிடம் பேசிய கரூர் ஜவுளி உற்பத்தியாளர்கள் மற்றும் ஏற்றுமதியாளர்கள் சங்கத் தலைவர் கோபாலகிருஷ்ணன், ”தற்போது இந்தியாவிலிருந்து பிரிட்டனுக்கு 1.4 பில்லியன் டாலர் மதிப்பிலான வீட்டு உபயோக துணி மற்றும் ஆயத்த ஆடைகள் ஏற்றுமதி செய்யப்படுகிறது. இது அடுத்து வரும் 5 அல்லது 6 ஆண்டுகளில் இரட்டிப்பாகும். இது பல ஆயிரம் வேலை வாய்ப்புகளை உருவாக்கி, கிராமப்புற தொழிலாளர்களுக்கும் குறு சிறு மற்றும் நடுத்தர நிறுவனங்களுக்கும் புதிய நம்பிக்கையை ஏற்படுத்தும்.” என்றார்.

ஹோம் டெக்ஸ்டைல்ஸ் மையமாக உருவெடுத்துள்ள கரூர், பிரிட்டன் சந்தையில் சுங்கச்சுமையின்றி நுழைய வாய்ப்பு பெறுவதால் ஏற்றுமதி, முதலீட்டு விரிவாக்கம் மற்றும் வேலைவாய்ப்பில் பெரிதும் முன்னேற்றத்தை கொண்டு வரும் என்று கூறும் கோபாலகிருஷ்ணன், இதனால் வர்த்தக வளர்ச்சி மட்டுமின்றி இருநாடுகளுக்கும் இடையிலான ஒருங்கிணைந்த பொருளாதார கூட்டாண்மையும் மேலும் மேம்படுமென்றும் தெரிவித்தார்.

இதேபோன்று பொறியியல் துறை சார்ந்த பொருட்கள் ஏற்றுமதிக்கும் இந்த ஒப்பந்தம் பெரிதும் உதவும் என்று பொறியியல் ஏற்றுமதி மேம்பாட்டுக்குழுவும் (EEPC – Engineering Export Promotion Council) நம்பிக்கை தெரிவித்துள்ளது. தற்போதுள்ள ஏற்றுமதி அளவு 4.3 பில்லியன் டாலரிலிருந்து 7.5 பில்லியன் டாலராக அதிகரிக்குமென்று இந்த அமைப்பின் தேசியத்தலைவர் பங்கஜ் சடா தெரிவித்திருக்கிறார்.

இந்தியாவின் பொறியியல் ஏற்றுமதி சந்தைகளில் பிரிட்டன் ஆறாவது இடத்தில் இருப்பதாகக் கூறியுள்ள பங்கஜ், கடந்த நிதியாண்டில் இரு நாடுகளுக்கிடையிலான வர்த்தகம் 11.7 சதவீதம் அதிகரித்து இருந்தாலும் பொறியியல் ஏற்றுமதி 4.28 பில்லியன் டாலராகவே உள்ளது, இது பிரிட்டனின் மொத்த பொறியியல் ஏற்றுமதியில் 2.2 சதவீதத்திற்கும் குறைவான அளவு என்று கூறியுள்ளார்.

சில முக்கிய பொறியியல் பொருட்களுக்கு 18 சதவீதம் வரி விதிக்கப்பட்டதாகவும், இந்த ஒப்பந்தத்தால் அது முற்றிலும் நீக்கப்படும் என்பதால் பொறியியல் பொருட்கள் ஏற்றுமதியில் பெரிய வளர்ச்சி ஏற்படுமென்று அவர் தெரிவித்துள்ளார்.

இதில் தமிழகத்திற்கான பலன் குறித்து பொறியியல் ஏற்றுமதி மேம்பாட்டுக்குழுவின் (EEPC) கோவை கிளையின் தலைவரும், ஏழு மாநிலங்களுக்கான ஒருங்கிணைப்பாளருமான சந்திரசேகர் விரிவாக விளக்கினார். இந்தியாவில் தேசிய தலைநகர மண்டலத்திலுள்ள (NCR) காசியாபாத்துக்கு அடுத்ததாக 800க்கும் மேற்பட்ட உறுப்பினர்களைக் கொண்ட இரண்டாவது பெரிய கிளையாக கோவை கிளை இருப்பதாகக் கூறும் இவ்வமைப்பினர் அதற்கு இங்குள்ள திறன்மிகு பொறியியல் உற்பத்தி நிறுவனங்களே காரணமென்கின்றனர்.

பிபிசி தமிழிடம் பேசிய சந்திரசேகர், ”தமிழகத்திலிருந்து ஆட்டோமொபைல் உதிரிபாகங்கள் அதிகளவில் ஏற்றுமதி செய்யப்படுகின்றன. கோவையில் இந்த நிறுவனங்கள் மிக அதிகம். அதேபோன்று பலவிதமான வால்வுகள், இயந்திர உதிரி பாகங்கள் இங்கே உற்பத்தியாகின்றன. ஆனால் பொறியியல் பொருட்களுக்கு பிரிட்டன் ஒரு பெரிய சந்தை என்று சொல்ல முடியாது. ஐரோப்பிய யூனியனுடன் ஒப்பந்தம் போடப்பட்டால் அதன் பலன் இன்னும் அதிகமாக இருக்கும்.” என்றார்.

”பொறியியல் பொருட்களுக்கு தற்போது 7.5 சதவீதத்திலிருந்து 12.5 சதவீதம் வரை அங்கு சுங்க வரி விதிக்கப்படுகிறது. இப்போது 4 பில்லியன் யூரோ டாலர் அளவுக்கு பொறியியல் பொருட்கள் பிரிட்டனுக்கு ஏற்றுமதியாகின்றன. சுங்கவரி குறைவதாலும், பல பொருட்களுக்கு முற்றிலும் நீக்கப்படுவதாலும் இன்னும் ஆறேழு ஆண்டுகளில் 7.5 பில்லியன் டாலர் அளவுக்கு ஏற்றுமதி அதிகரிக்கும். அதேநேரத்தில் ஒப்பந்தத்தில் பல விஷயங்களைக் கவனிக்க வேண்டும். முக்கியமாக ஹெச்.எஸ் குறியீடு (HS code- Harmonized System code) பார்த்து வரி விதிக்கப்படும். அதைப் புரிந்து கொண்டு வர்த்தகம் செய்வதும் முக்கியம்.” என்கிறார் சந்திரசேகர்.

இந்த ஹெச்.எஸ் குறியீடு என்பது ஒரு குறிப்பிட்ட பொருளை உலகளாவிய அளவில் வர்த்தகம் செய்வதற்கான 11 எண்களைக் கொண்ட ஒரு பொதுக்குறியீடு ஆகும். உதாரணமாக ஒரு 100 சிசி மோட்டார் சைக்கிளுக்கு உலகம் முழுவதற்கும் ஒரு ஹெச்.எஸ் குறியீடு இருக்கும். அதேபோன்று 1000 சிசி பெட்ரோல் கார், ஆண்ட்ராய்டு போன், டிஜிட்டல் வாட்ச் என ஒவ்வொரு பொருளுக்கும் ஒரு ஹெச்.எஸ் குறியீடு இருக்கும் என்கின்றனர். அதைத் தனியாகவும், ஒரு குரூப்பிங் ஆகவும் பிரித்து அதன்படி வரி விதிக்கப்படும். இதைக் கவனிப்பது அவசியம் என்று துறைசார் நிபுணர்கள் கூறுகின்றனர்.

அதனால் எந்தெந்தப் பொறியியல் பொருளுக்கு அதாவது எந்தெந்த ஹெச்.எஸ் குறியீடு உள்ள பொருட்களுக்கு எவ்வளவு வரி விதிக்கப்பட்டுள்ளது என்பதைப் பார்த்தே உற்பத்தியை மேற்கொள்ள வேண்டுமென்று கூறும் சந்திரசேகர், ஏற்றுமதி இரட்டிப்பாகும் என்று நம்பி சிறு,குறுந்தொழில் முனைவோர் நவீன இயந்திரங்களை வாங்கிப் போட்டு அதற்கேற்ப ஆர்டர் கிடைக்காவிட்டால் கடனாகிவிடும் வாய்ப்பும் உள்ளது என்கிறார்.