இந்தியாவில் ஐபோன் வேண்டாம் என கூறும் டிரம்ப் – இந்தியாவின் வளர்ச்சி பாதிக்கப்படுமா?

தோஹாவில் நடைபெற்ற ஒரு வணிகக் கூட்டத்தில் அவர் பேசும்போது, “டிம் குக்குடன் எனக்கு ஒரு சிறிய பிரச்னை இருந்தது. அவர் இந்தியா முழுவதும் தொழிற்சாலைகளை கட்டி வருகிறார். நீங்கள் இந்தியாவில் கட்டுவதை நான் விரும்பவில்லை என்றேன்” எனக் கூறினார்.

மேலும், “நண்பரே, நான் உங்களை மிகவும் நன்றாக நடத்துகிறேன். நீங்கள் 500 பில்லியன் டாலர் முதலீட்டோடு வருகிறீர்கள், ஆனால் இப்போது நீங்கள் இந்தியா முழுவதும் தொழிற்சாலை அமைப்பதாக கேள்விப்படுகிறேன். அதனை நான் விரும்பவில்லை என்று கூறினேன்” என்றார்.

இந்த உரையாடலுக்கு பின், அமெரிக்காவில் ஆப்பிள் நிறுவனத்தின் உற்பத்தியை கூடுதலாக்க டிம் குக் ஒப்புக் கொண்டதாக டிரம்ப் கூறினார். மேலும் அதிக உற்பத்தி சார்ந்த வேலைகளை அமெரிக்காவுக்கு திரும்பக் கொண்டுவர விரும்புவதாகவும் அவர் கூறினார்.

ஆப்பிள் நிறுவனம் தன்னுடைய ஐபோன்கள் உற்பத்தியை முதன்மையாக சீனாவிலும், இந்தியாவிலுமே மேற்கொள்கிறது.

ஆப்பிளின் மிகப்பெரிய உற்பத்தி மையமாக சீனா இருந்து வருகிறது.

உலக அளவில் விற்கப்படும் ஐபோன்களில் 80 சதவீதம் சீனாவில் உற்பத்தியாகிறது.

இந்தியாவும் அதன் முக்கியமான உற்பத்தித் தளமாக வளந்துள்ளது. உலகளாவிய ஐபோன் உற்பத்தியில் சுமார் 15-20% பங்களிப்பை கொண்டுள்ளது.

இந்தியாவில், 2025 மார்ச் மாதம் முடிவடைந்த கடந்த 12 மாதங்களில் சுமார் 22 பில்லியன் அமெரிக்க டாலர் மதிப்பிலான ஐபோன்கள் அசெம்பிள் செய்யப்பட்டுள்ளன.

முந்தைய ஆண்டினை விடவும் இது 60 சதவீதம் அதிகரிப்பாகும். இந்தியாவில் ஐபோன் உற்பத்தி, தமிழ்நாட்டில் செயல்படும் ஃபாக்ஸ்கான் நிறுவனத்திற்கு சொந்தமான தொழிற்சாலையிலும், டாட்டா எலக்ட்ரானிக்ஸ் மற்றும் பெகட்ரான் நிறுவனத்திலும் நடக்கிறது.

இந்நிலையில், ஆப்பிள் நிறுவனம் இந்தியாவை விட்டு வெளியே செல்லும் சூழல் ஏற்படும் என்று கருதவில்லை என்கிறார் பிபிசி தமிழிடம் பேசிய இந்திய டெலிகாம் கருவிகள் உற்பத்தியாளர்கள் சங்கத்தின் தலைவர், என்.கே.கோயல்.

“ஆப்பிள் இந்தியாவில் மூன்று தொழிற்சாலைகள் கொண்டுள்ளது. மேலும் இரண்டை கொண்டு வர திட்டமிட்டுள்ளது. இந்தியாவின் தொழில் செய்ய ஏதுவான கொள்கைகள் காரணமாக இந்தியாவில் தொழில் செய்வது இன்று விருப்பமான தேர்வு அல்ல, கட்டாயமாகும். ஆப்பிள் நிறுவனம், அரசியல் ஸ்திரத்தன்மை, பொருளாதார விளைவுகள் எல்லாவற்றையும் கணக்கில் எடுத்துக்கொண்டு முடிவு எடுக்கும்.

இந்தியாவில் உற்பத்தி என்பது சீனாவிலிருந்து வேலை வாய்ப்புகள் இந்தியாவுக்கு வருகின்றன என்றுதான் அர்த்தம், அமெரிக்காவிலிருந்து வருகின்றன என இல்லை. இதை அமெரிக்கா உணரும். அப்போது இந்தியாவை தேர்ந்தெடுப்பார்களா? அல்லது சீனாவிடம் செல்வார்களா?” என்கிறார் அவர்.

ஃபாக்ஸ்கான் நிறுவனம் மட்டும் இந்த ஆண்டுக்குள் இந்தியாவில் ஐபோன் உற்பத்திச் செயல்பாடுகளை இரட்டிப்பாக்கி, 25-30 மில்லியன் யூனிட் என்ற எண்ணிக்கைக்கு உயர்த்திட திட்டமிட்டுள்ளது.

இருப்பினும் சீனாவே உற்பத்தி எண்ணிக்கையில் இன்னும் ஆதிக்கம் செலுத்தி வருகிறது. சுமார் 80 சதவீத ஐபோன்கள் இன்னும் அங்கேதான் தயாரிக்கப்படுகின்றன.

புவிசார் அரசியல் பதற்றங்களும், வரி விதிப்பில் ஏற்படும் மாற்றங்களும் காரணமாக தனது விநியோகச் சங்கிலியை பன்முகப்படுத்திட ஆப்பிள் நிறுவனம் இந்தியாவை நோக்கி மாறுவதை துரிதமாக்கி வருகிறது.

இந்திய டெலிகாம் கருவிகள் உற்பத்தியாளர்கள் சங்கத்தின் தலைவர், என்.கே.கோயல், “உற்பத்தி நிறுவனங்கள் தங்கள் உற்பத்தியை பரந்துபட்டதாக ஆக்க வேண்டும் என்று நினைத்தே ‘சீனா பிளஸ்’ என்ற உத்தியை கடைப்பிடிக்கின்றன. சீனாவில் உற்பத்தி செய்வதுடன் வேறு ஒரு நாட்டிலும் உற்பத்தி செய்ய நினைக்கின்றன. இந்தியா மிக வேகமாக வளர்ந்து வரும் நாடு. இங்குள்ள தொழில் கொள்கைகள் குறித்து எந்த குழப்பமும் இல்லை. உற்பத்திக்கு ஏற்ப சலுகைகள் (Production linked incentive) வழங்கப்படுவது இந்தியாவில் முதலீட்டாளர்களுக்கான மிகப்பெரிய உந்துதலாகும்” என்கிறார்.