“ஆன்லைன் விளையாட்டில் ரூ.1 கோடி இழந்தேன்” : சட்டவிரோத செயலிகளால் பறிபோகும் இளைஞர்களின் வாழ்க்கை

இதில், கரே குடும்பத்தின் சொத்துக்களான ஆறு ஏக்கர் நிலம், ஐந்து தோலா தங்கம், ஒரு டிராக்டர் மற்றும் 22 ஜெர்சி பசுக்கள் ஆகியவற்றை அவர் இழந்துள்ளார்.

வெற்றிலை பாக்கு போடும் பழக்கம் கூட இல்லாத பாலாஜி, இந்த விளையாட்டுக்கு எப்படி அடிமையானார் என்பதை அறிந்து அவரது குடும்பத்தினர் ஆச்சர்யத்தில் உள்ளனர்.

பாலாஜி இனிமேல் எந்த ஆன்லைன் பந்தயம் அல்லது சூதாட்ட விளையாட்டுகளையும் விளையாடுவதில்லை என்று கூறுகிறார்.

இந்த வழியில் சென்று மற்றவர்களும் ஏமாற வேண்டாம் என்றும், ஏற்கனவே இதில் சிக்கியுள்ள இளைஞர்கள் விரைவில் நிறுத்த வேண்டும் என்றும் பாலாஜி மனதார வேண்டுகோள் விடுக்கிறார்.

“அரசாங்கம் இந்த விளையாட்டுகளை நிறுத்த வேண்டும். குருதுவாடியைச் சேர்ந்த எழுநூறு முதல் எண்ணூறு இளம் விவசாயிகள் இதில் சிக்கிக் கொண்டுள்ளனர்.

எனது சொந்த உதாரணத்தையே எடுத்துக்கொள்ளுங்கள். நான் இவ்வளவு பணம் முதலீடு செய்தேன், ஆனால் எனக்கு எதுவும் கிடைக்கவில்லை. அப்படியானால் மற்றவர்களுக்கு எப்படி கிடைக்கும்?

இந்த விளையாட்டில் ஈடுபடாமல் இருங்கள், ஒருவேளை இதில் சிக்கிக்கொண்டால், ஒரு கணம் கூட யோசிக்காமல் அங்கேயே நிறுத்துங்கள்” என்று பாலாஜி கூறினார்.

பாலாஜிக்கு ஆன்லைன் சூதாட்டத்தில் விளையாடும் பழக்கம் உண்டு.

இந்த விளையாட்டுக்கான செயலி ஸ்மார்ட்போன்களில் உள்ள பிளே ஸ்டோரில் கிடைக்கவில்லை. மாறாக, இந்த செயலிக்கான இணைப்பு வாட்ஸ்அப் மூலம் வழங்கப்படுகிறது.

இதற்காக, சோலாப்பூரில் உள்ள ஒவ்வொரு கிராமத்திலும் முகவர்களின் எண்ணிக்கை அதிகரித்துள்ளது.

இந்த முகவர்கள் கிராம சுவர்களில் அமர்ந்திருக்கும் இளைஞர்களை உளவு பார்க்கிறார்கள். பிறகு, இந்த விளையாட்டின் செயலியைப் பதிவிறக்கம் செய்ய அவர்களை ஊக்குவிக்கிறார்கள்.

ஆரம்பத்தில் இந்த விளையாட்டிலிருந்து தனக்கு பணம் கிடைத்ததாகக் கூறுகிறார் பாலாஜி.

ஆனால் பின்னர், இதிலிருந்து எந்தப் பணத்தையும் வெல்ல முடியாது. சம்பந்தப்பட்ட நபர் முன்பு இழந்த பணத்தைத் திரும்பப் பெறுவதற்காக லட்சக்கணக்கான ரூபாயை வீணடிக்கிறார்.

தற்போது, ஆன்லைன் கேமிங் மற்றும் பந்தயம் கட்டுவதற்கான ஒரு மறைந்திருக்கும் மோகம் மகாராஷ்டிராவில் மட்டுமல்ல, இந்தியா முழுவதும் ஆயிரக்கணக்கான இளைஞர்களிடையேயும் பரவியுள்ளது.

நேரத்தை கடத்தலாம் அல்லது விரைவாக பணம் சம்பாதிக்கலாம் என்ற மோகத்துடன் தொடங்கும் இந்த விளையாட்டு, இளைய தலைமுறையினருக்கு நீண்டகால பாதிப்புகளை ஏற்படுத்துகிறது.

பாலாஜி வழங்கிய தகவலின்படி, இந்த சட்டவிரோத ஆன்லைன் செயலியை விளம்பரப்படுத்த முகவர்கள் லால் கிராமத்திற்கு தொடர்ந்து வருகை தருவார்கள் என அறியப்படுகிறது.

இதில் சில நண்பர்கள் பணம் முதலீடு செய்வதை அவர் பார்த்துள்ளார்.

ஆரம்பத்தில், சிலர் பணம் பெறுவதைக் கண்டதும், பாலாஜி இரண்டாயிரம் ரூபாய் முதலீடு செய்து அதைத் தொடங்கினார். ஆனால் இறுதியில், அவருக்கு எதுவும் கிடைக்கவில்லை.

பின்னர் தைரியத்தை வரவழைத்துக்கொண்டு காவல்துறையில் புகார் அளித்துள்ளார்.

அந்த செயலி சட்டவிரோதமானது என்பதால், சோலாப்பூர் காவல்துறை நடவடிக்கை எடுத்து, சந்தேகத்துக்குரிய சில நபர்களை கைது செய்துள்ளது.

இந்த வகையான மோசடியால் பாலாஜி மட்டும் பாதிக்கப்படவில்லை.

இந்தியாவில் ஆயிரக்கணக்கான பாலாஜிகள் ஆன்லைன் சூதாட்டத்திற்கு பலியாகி வருகின்றனர்.

அவர்களில் சிலர் தங்கள் உயிரை மாய்த்துக் கொண்டதாகக் கூட காவல்துறை விசாரணையில் தெரியவந்துள்ளது.

சமீபத்தில் நடந்து முடிந்த சட்டமன்ற மழைக்கால கூட்டத்தொடரில் பேசிய காங்கிரஸ் எம்எல்ஏ ஜோதி கெய்க்வாட் முக்கியமான தகவல்களை வெளிச்சத்திற்கு கொண்டு வந்துள்ளார்.

“தற்போது இளைஞர்களுக்கு வேலை இல்லை. எனவே, அவர்கள் எளிதாக பணம் சம்பாதிப்பதற்காக ஆன்லைன் கேமிங்கைத் தொடர்கின்றனர். ஆன்லைன் கேமிங் என்பது சூதாட்டத்தின் ஒரு வடிவம், “ஒரு விளையாட்டு, திறமையின் அடிப்படையிலானது என்பதை நிரூபித்தால், அது சட்டபூர்வமாக அமையலாம்” என்று கூறிய அவர்,

“அரசாங்கம் இதிலிருந்து ஜிஎஸ்டி வரியைப் பெறுகிறது. ஆனால் பெரும்பங்கு அந்த நிறுவனத்திற்கே செல்கிறது. இந்த நிறுவனம் அரசாங்கத்திற்கு வழங்கிய வருவாய் ரூ. 6,384 கோடி. ஆனால் இதில் வெற்றி பெறும் வாய்ப்பு வெறும் 0.000006 சதவீதம் மட்டுமே”என்றும் குறிப்பிட்டார்.