அமெரிக்கா: இந்தியர்களை கைவிலங்கிடப்பட்டு அனுப்பிய விவகாரத்தில் என்ன நடந்தது? முழு விவரம்

அதைத் தொடர்ந்து, டிரம்ப் கொலம்பியா மீது அதிரடியாக 25% வரிகளை விதித்தார். இந்த விவகாரம் சர்வதேச அளவில் பேசுபொருளானது. பின்னர், கொலம்பியா – அமெரிக்கா இடையே உடன்பாடு எட்டப்பட்டது.

இந்த நிலையில், சட்ட விரோதமாகக் குடியேறியதாகக் கூறப்படும் 104 இந்தியர்களுடன் கூடிய ஒரு அமெரிக்க ராணுவ விமானம் பிப்ரவரி 5ஆம் தேதி இந்தியா வந்தது. அந்த விமானத்தில் இருந்தவர்கள் கைவிலங்கிடப்பட்டிருந்த காணொளி சமூக ஊடகங்களில் வைரலாகியது.

அதனைத் தொடர்ந்து, வியாழக்கிழமை (பிப். 06) கூடிய நாடாளுமன்றத்திலும் இந்த விவகாரத்தை எதிர்க்கட்சிகள் எழுப்ப, மத்திய அரசு விளக்கமளித்தது. இந்த விவகாரத்தில் இதுவரை நடந்தது என்ன என்பதை இதில் விரிவாக பார்க்கலாம்.

செவ்வாய்க்கிழமை இரவு (டிசம்பர் 4) டெக்சாஸ் மாகாணத்திலிருந்து சி17 போர் விமானம் புறப்பட்டது. இந்திய வெளியுறவுத் துறை அமைச்சர் ஜெய்சங்கர் அளித்தத் தகவலின்படி, இந்த விமானத்தில் 104 இந்தியர்கள் திருப்பி அனுப்பப்பட்டனர். பஞ்சாப் மாநிலத்தின் அமிர்தசரஸில் உள்ள குரு ராம் தாஸ்ஜி சர்வதேச விமான நிலையத்தில் இந்த விமானம் புதன்கிழமை தரையிறங்கியது.

அமெரிக்க அதிபராக டிரம்ப் இரண்டாவது முறை பதவியேற்ற பின், அமெரிக்காவில் சட்ட விரோதமாகக் குடியேறியதாக இந்திய குடிமக்கள் நாடு கடத்தப்படுவது இதுவே முதன்முறை. விமானத்தில் இருந்தவர்கள் கைவிலங்கிடப்பட்டு இருந்த காணொளி சமூக ஊடகங்களில் வைரலானது, இந்தியாவில் சர்ச்சையை கிளப்பியது.

அமெரிக்காவிலிருந்து நாடு கடத்தப்பட்டு இந்தியாவுக்கு திருப்பி அனுப்பி வைக்கப்பட்ட இந்தியர்களைக் கைவிலங்கிட்டு அழைத்து வந்த விதம் மனிதத்தன்மையற்றது, இதை பாஜக அரசு தவிர்க்க நடவடிக்கை எடுக்காதது கண்டிக்கத்தக்கது என்று கூறி நாடாளுமன்றம் கூடியபோது எதிர்க்கட்சிகள் அமளியில் ஈடுபட்டன.

காங்கிரஸ், சமாஜ்வாதி, இந்தியக் கம்யூனிஸ்ட் உட்பட பல்வேறு கட்சிகளை சேர்ந்தவர்கள் இந்த விவகாரத்தில் மத்திய அரசு பதிலளிக்க வேண்டும் என்று வலியுறுத்தினர்.

ஆனால் அமளி தொடர்ந்ததால், மக்களவை ஒத்திவைக்கப்பட்டது. பின்னர் மாநிலங்களவையில் இந்த விவகாரம் குறித்து வெளியுறவுத் துறை அமைச்சர் ஜெய்சங்கர் விளக்கமளித்தார்.

மாநிலங்களவையில் விளக்கமளித்த அமைச்சர் ஜெய்சங்கர், நாடு கடத்தல் நடவடிக்கை புதிதல்ல என்றார்.

சமீபத்திய ஆண்டுகளில் அமெரிக்காவில் இருந்து நாடு கடத்தப்பட்டவர்களின் எண்ணிக்கை எனக் கூறி, ஆண்டுவாரியாக ஜெய்சங்கர் ஒரு பட்டியலை வழங்கினார்.

அதன்படி, 2009ல் 734 பேர், 2010ல் 799 பேர், 2011ல் 599 பேர், 2012ல் 530 பேர், 2013ல் 515 பேர், 2014ல் 591 பேர், 2015ல் 708 பேர், 2016ல் 1303 பேர், 2017ல் 1024 பேர், 2018ல் 1180 பேர், 2019ல் 2042 பேர், 2020ல் 1,889 பேர், 2021ல் 805 பேர், 2022ல் 862 பேர், 2023ல் 617 பேர், 2024ல் 1,368 பேர், 2025ல் 104 பேர் வெளியேற்றப்பட்டுள்ளனர்.

மேலும், கைவிலங்கிடப்பட்டு அழைத்து வரப்படுவது குறித்தும் ஜெய்சங்கர் விளக்கமளித்தார்.

அமெரிக்காவால் மேற்கொள்ளப்படும் நாடு கடத்தலை அந்நாட்டின் குடியேற்றம் மற்றும் சுங்க அமலாக்கத்துறை செய்வதாக குறிப்பிட்ட ஜெய்சங்கர், அதற்கான நிலையான நடைமுறை 2012 முதல் அமலில் இருப்பதாக குறிப்பிட்டார்.

அந்த நடைமுறை நாடு கடத்தப்படுபவர்களைக் கட்டுப்பாடுகளுடன் அழைத்துவர அனுமதி அளிப்பதாக ஜெய்சங்கர் கூறினார்.

குழந்தைகள், பெண்களுக்குக் கட்டுப்பாடுகள் இல்லை, கைவிலங்கிடப்பட்டு அழைத்து வரப்படுவோருக்கு உணவு, மருத்துவத் தேவை, கழிவறை பயன்படுத்துதல் உள்ளிட்ட அவசரத் தேவைகளின்போது தற்காலிகமாகக் கட்டுப்பாடுகள் தளர்த்தப்படும் என அமெரிக்கா தெரிவித்ததாகவும் ஜெய்சங்கர் கூறினார்.

பிப்ரவரி 5ஆம் தேதி அமெரிக்கா அனுப்பிய விமானத்தில் கடந்த கால செயல்முறை தவிர்த்து எந்த மாற்றங்களும் இல்லை எனக் குறிப்பிட்ட ஜெய்சங்கர், எனினும் திருப்பி அனுப்பப்பட்ட இந்தியர்கள் எந்த வகையிலும் தவறாக நடத்தப்படாமல் இருப்பதை உறுதி செய்ய அமெரிக்க அரசாங்கத்துடன் இணைந்து செயல்பட்டு வருகிறோம் என்றும் கூறினார்.