அதிமுக – பாஜக கூட்டணியால் யாருக்கு லாபம்? அண்ணாமலை, ஓபிஎஸ், தினகரன் எதிர்காலம் என்ன? 6 கேள்வி-பதில்கள்

அதிமுக-பாஜக இடையே கூட்டணி உடன்பாடு ஏற்பட வாய்ப்புள்ளதாக கடந்த சில வாரங்களாகவே தமிழக அரசியல் வட்டாரத்தில் பேசப்பட்டு வந்தது. டெல்லியில் கடந்த மாதம் 25 ஆம் தேதி மத்திய உள்துறை அமைச்சர் அமித் ஷாவை, அதிமுக பொதுச்செயலாளர் எடப்பாடி பழனிசாமி சந்தித்துப் பேசினார்.

இதுதொடர்பாக எக்ஸ் தளத்தில் பதிவிட்ட அமித் ஷா, ‘தமிழ்நாட்டில் 2026 ஆம் ஆண்டு தேசிய ஜனநாயக கூட்டணி ஆட்சி மலரும்’ எனப் பதிவிட்டார். ஆனால், கூட்டணி தொடர்பாக எடப்பாடி பழனிசாமி எந்தக் கருத்தையும் தெரிவிக்கவில்லை.

இதையடுத்து, அதிமுக முன்னாள் அமைச்சர் செங்கோட்டையன், முன்னாள் எம்.பி கே.சி பழனிசாமி ஆகியோரை மத்திய நிதி அமைச்சர் நிர்மலா சீதாராமன் சந்தித்துப் பேசினார். இது அதிமுகவில் சலசலப்பை ஏற்படுத்தியது.

இந்தநிலையில், அதிமுக – பாஜக இடையே கூட்டணி ஏற்பட்டுள்ளதாக சென்னையில் அமித் ஷா அறிவித்துள்ளார். “வரும் தேர்தலில் தேசிய ஜனநாயக கூட்டணி பெரும்பான்மையான இடங்களைப் பிடித்து ஆட்சியமைக்கப் போகிறது” எனவும் செய்தியாளர் சந்திப்பில் அவர் தெரிவித்தார்.

பிரதமர் மோதி தனது எக்ஸ் பக்கத்தில், ‘தேசிய ஜனநாயகக் கூட்டணியின் இதர கூட்டாளிகளுடன் ஒன்றிணைந்து, தமிழ்நாட்டை புதிய உச்சங்களுக்குக் கொண்டு செல்வோம்; எம்ஜிஆர், ஜெயலலிதாவின் தொலைநோக்குப் பார்வையை செயல்படுத்தும் ஓர் அரசை நாம் உறுதிசெய்வோம்’ எனப் பதிவிட்டுள்ளார்

“திமுகவை விரைவாக வீழ்த்துவது முக்கியமானது. அதனை நமது கூட்டணி செய்து முடிக்கும்” எனவும் பிரதமர் மோதி குறிப்பிட்டுள்ளார்.

கூட்டணி தொடர்பாக தனது எக்ஸ் பக்கத்தில் பதிவிட்டுள்ள எடப்பாடி பழனிசாமி, ‘திமுக ஆட்சியில் இருந்து தமிழ்நாட்டை விடுவித்து ஒளிமயமான எதிர்காலத்தை அதிமுக – பாஜக கூட்டணி உருவாக்கும். திமுக செய்த தவறுகளை சரிசெய்து தமிழ்நாட்டை வளர்ச்சிப் பாதையில் கொண்டு செல்லும்’ எனக் கூறியுள்ளார்.

“அதிமுகவின் இந்த முடிவு சட்டமன்றத் தேர்தலில் விளைவுகளை ஏற்படுத்தும்” எனக் கூறுகிறார், மூத்த பத்திரிகையாளர் ஜென்ராம்.

பிபிசி தமிழிடம் பேசிய அவர், ” பள்ளிக்கல்வி நிதியை பாஜக அரசு தர மறுப்பது, நீட் தேர்வுக்கு எதிராக இருப்பது ஆகியவற்றைத் தான் தமிழ்நாட்டு மக்கள் கவனிப்பார்கள். அவர்களுடன் அதிமுக கூட்டணி வைத்துள்ளதாகவே பார்க்கப்படும். அதுவே திமுக, அதிமுக இடையில் மட்டும் போட்டி என்றால் மக்கள் மாற்றி ஓட்டுப் போடுவார்கள்” என அவர் தெரிவித்தார்.

இந்தக் கருத்தை மறுத்து பிபிசி தமிழிடம் பேசிய அதிமுக முன்னாள் அமைச்சரும் அமைப்புச் செயலாளருமான அன்வர் ராஜா, ” ஸ்டாலின் ஆட்சி தொடர வேண்டுமா என்பது தான் தேர்தலில் பிரதானமாக பேசப்படும். ஆட்சிக்கு எதிரான மக்களின் மனநிலை அதிகரித்துள்ளது. கூட்டணியை பெரிதாக பார்ப்பதற்கு வாய்ப்பில்லை” எனக் கூறுகிறார்,

தொடர்ந்து பேசிய அவர், “திமுக கூட்டணியில் கம்யூனிஸ்டுகள் இருந்தாலும் தங்கள் கொள்கையில் சமரசம் செய்து கொள்ளாமல் உள்ளனர். அதுபோல தான் நாங்களும்” எனவும் குறிப்பிட்டார்.

தமிழக பாஜக மாநில தலைவர் மாற்றம் தொடர்பாக எக்ஸ் பக்கத்தில் அமித் ஷா பதிவிட்ட பிறகே செய்தியாளர் சந்திப்பில் எடப்பாடி பழனிசாமி கலந்து கொண்டார். அதிமுகவின் அழுத்தம் காரணமாகவே தலைவர் பதவியில் மாற்றம் நடந்ததா? என்ற கேள்வி எழுந்தது.

2021 சட்டமன்றத் தேர்தல் முடிவுகளுக்குப் பிறகு தமிழக பாஜக தலைவராக அண்ணாமலை நியமிக்கப்பட்டார். ஒரு கட்டத்தில் மறைந்த அதிமுக தலைவர்களை அவர் கடுமையாக விமர்சிக்கத் தொடங்கினார்.

‘டிஎம்கே ஃபைல்ஸ்’ (DMK FILES) என்ற பெயரில் தி.மு.க தொடர்பான முறைகேடுகளை வெளியிட்ட அண்ணாமலை, ‘அதிமுக அரசின் ஊழல்களையும் வெளியிடுவேன்’ எனக் கூறினார்.

தொடர்ந்து, முன்னாள் முதலமைச்சர் ஜெயலலிதாவை ஊழல் வழக்கில் சிறை சென்றவர் என்று விமர்சித்தார். இதனால் அதிமுக – பாஜக கூட்டணிக்குள் பிளவு ஏற்பட்டது. ஒருகட்டத்தில், ‘பாஜகவுடன் கூட்டணி இல்லை’ என அதிமுக பொதுச்செயலாளர் எடப்பாடி பழனிசாமி அறிவித்தார். இந்தக் கூட்டணி 2023 ஆம் ஆண்டு செப்டம்பர் மாதம் முடிவுக்கு வந்தது.

அதன் தொடர்ச்சியாக, 2024 நாடாளுமன்றத் தேர்தலில் பாமக, அமமுக, தமாகா ஆகிய கட்சிகளுடன் இணைந்து பாஜக தனி அணியாக போட்டியிட்டது. இந்த தேர்தலில் ஓரிடத்தில் கூட அந்த கூட்டணி வெற்றி பெறவில்லை. ஆனால், கோவை, கன்னியாகுமரி உள்பட ஒன்பது தொகுதிகளில் பாஜக கூட்டணிக்கு இரண்டாம் இடம் கிடைத்தது.

இந்தநிலையில், 2026 சட்டமன்றத் தேர்தலில் மீண்டும் அதிமுக-பாஜக கூட்டணிப் பேச்சுகள் உருவெடுக்கவே, மாநில தலைவராக அண்ணாமலை நீடிப்பாரா? என்ற கேள்வி எழுந்தது.

அதற்கேற்ப, புதிய மாநில தலைவர் பதவிக்கான தேர்தல் தேதியை கடந்த வியாழக்கிழமை அக்கட்சியின் மாநில துணைத் தலைவர் சக்கரவர்த்தி அறிவித்தார்.

தமிழக பாஜகவின் புதிய தலைவராக நயினார் நாகேந்திரன் போட்டியின்றி தேர்வு செய்யப்பட உள்ளார். எடப்பாடி பழனிசாமியின் அழுத்தம் காரணமாகவே மாநில தலைவர் பதவியில் மாற்றம் செய்யப்பட்டதாக பார்க்கப்பட்டது.