அண்ணா பல்கலை. மாணவி வழக்கு: சிறப்பு புலனாய்வுக் குழுவுக்கு எதிராக போராட்டம் ஏன்?

“சிறப்பு புலனாய்வுக் குழுவுக்கு சில அதிகாரங்கள் உள்ளன. வழக்குக்கு தொடர்பில்லாத கேள்விகளைக் கேட்பதில் தவறு எதுவும் இல்லை. அவர்களுக்குக் கிடைத்த தகவல்களின் அடிப்படையில் அவை இருக்கலாம்” என்றார் ஓய்வுபெற்ற காவல் கண்காணிப்பாளர் கருணாநிதி

இந்தக் குழுவின் விசாரணை தொடர்பாக சந்தேகத்தை எழுப்புவது குற்றம் சுமத்தப்பட்டவர்களுக்கு சாதகமாக மாறிவிடும் என்கிறார் அவர்.

அதோடு, “சில நேரங்களில் சம்மனுக்கு ஆஜரான நபரிடம் தொடர்பில்லாத கேள்விகளைக் கேட்டு திசை திருப்புவது வழக்கம். இவ்வாறு மடைமாற்றுவதன் மூலம் வழக்குக்குத் தேவையான தகவல்களைப் பெற முடியும். இது விசாரணை நடைமுறை. அதைத் தவறு என்று கூற முடியாது” என்றார்.

”பாரதிய நியாய சன்ஹிதா (BNS) சட்டப் பிரிவு 72ன்படி பாலியல்ரீதியான சம்பவங்களால் பாதிக்கப்பட்ட பெண்களை பொதுவெளியில் அடையாளப்படுத்தக் கூடாது. அதையும் மீறி அடையாளப்படுத்தும் நபர்கள் மீது முதல் தகவல் அறிக்கையைப் பதிவு செய்து இரண்டு ஆண்டுகள் வரை சிறையில் அடைக்கலாம். இது தண்டனைக்குரிய குற்றம். இது சட்டம் என்பதால் செய்தியாளர்களையும் இது கட்டுப்படுத்தும்” என்கிறார் மூத்த வழக்கறிஞர் ராமமூர்த்தி.

”பெயரை வெளியில் கசியவிட்டால் தண்டனை வழங்குவதை புதிய சட்டம் உறுதிப்படுத்துகிறது. பழைய சட்டங்களில் இதுபோன்ற தண்டனை விவரங்கள் குறிப்பிடப்படவில்லை” எனக் கூறுகிறார் அவர்.

“அண்ணா பல்கலைக்கழக மாணவி வழக்கின் எஃப்.ஐ.ஆரை சிசிடிஎன்எஸ் தளத்தில் 11 பேர் திறந்து பார்த்துள்ளனர். அதில் மூன்று பேர் காவல்துறையைச் சேர்ந்தவர்கள். சந்தேகத்துக்கு உரியவர்கள் என்று பார்த்தால் எட்டு பேர் வருகின்றனர்” எனக் கூறுகிறார் பெயர் கூற விரும்பாத காவல்துறை அதிகாரி ஒருவர்.

“யாருடைய செல்போன் மூலம் எஃப்.ஐ.ஆர் பரவியது என்பது தொடர்பாகவே சிறப்பு புலனாய்வுக் குழு விசாரித்து வருகிறது. நீதிமன்றத்துக்குப் பதில் சொல்ல வேண்டிய தேவை இருப்பதால் செல்போன்கள் பறிமுதல் செய்யப்படுகின்றன” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு