PBKS vs GT: கடைசி நேரத்தில் ‘பயங்காட்டிய’ பஞ்சாப்; த்ரில் வெற்றிபெற்ற குஜராத் டைடன்ஸ்

மிடில் ஆர்டர் பேட்ஸ்மேன்கள் நிதானமாகவே ஆடிக்கொண்டிருந்தனர். ராஜபக்‌ஷ 1 பவுண்டரி மட்டுமே விளாசினார். 26 பந்துகளை எதிர்கொண்ட அவரது பேட்டில் இருந்து 20 ரன்கள் மட்டுமே கிடைத்தன. ஜிதேஷ் சர்மாவும் சாம் கரனும் அவ்வளவு பெரிய ஷாட்கள் ஏதும் ஆடவில்லை.

ஒருபக்கம் தடுமாறிக்கொண்டிருந்த பஞ்சாப்பை தனது அதிரடியான பேட்டிங் மூலம் ஸ்கோர் போர்டில் ரன்கள் எகிற உதவினார் ஷாருக்கான். 9 பந்துகளில் 2 சிக்சர்கள், 1 பவுண்டரி என மொத்தம் 22 ரன்களை எடுத்திருந்த ஷாருக்கான் கடைசி ஓவரில் டேவிட் மில்லரால் ரன் அவுட்டானார். 20 ஓவர்கள் முடிவில் பஞ்சாப் கிங்ஸ் 8 விக்கெட் இழப்பிற்கு 153 ரன்கள் மட்டுமே சேர்த்தது.

குஜராத் அணியில் முகமது ஷமியை தவிர்த்து இதர பவுலர்கள் நேர்த்தியாகவே பந்துவீசினார். ஹர்திக் பாண்டியா 5 பவுலர்களை மட்டுமே பயன்படுத்தினார். அனைவருமே தங்கள் பங்கிற்கு விக்கெட் வீழ்த்தினர்.

154 ரன்கள் எடுத்தால் வெற்றி எனும் இலக்குடன் களமிறங்கியது குஜராத். சாஹா – கில் ஜோடி துவக்கம் முதலே அதிரடியாக ஆடியது. சாஹா 19 பந்துகளில் 5 பவுண்டரியுடன் 30 ரன்கள் எடுத்திருந்தபோது ஆட்டமிழந்தார். அடுத்து வந்த சாய் சுதர்சன் 19, கேப்டன் ஹர்திக் பாண்டியா 8 ரன்களில் விடைபெற்றனர்.

மறுமுனையில் சிறப்பாக ஆடிய சுப்மன் கில் 49 பந்துகளில் 1 சிக்சர், 7 பவுண்டரிகளுடன் 67 ரன்கள் விளாசினார். கடைசி ஓவர் வரை விளையாடிய சுப்மன் கில் முக்கியமான தருணத்தில் சாம் கரண் பந்துவீச்சில் விக்கெட்டை பறிகொடுத்தார்.

குஜராத்தின் வெற்றிக்கு கடைசி ஓவரில் 7 ரன்கள் தேவைப்பட்டன. சாம் கரண் பந்துவீசினார். முதல் பந்தில் சிங்கில் எடுத்து நன்றாக ஆடிக்கொண்டிருந்த கில்லுக்கு ஸ்டிரைக் கொடுத்தார் டேவிட் மில்லர். சாம் கரணின் 2வது பந்தை எதிர்கொள்ள ஆயத்தமானார் கில். வேகமாக வந்த பந்து, கில்லின் பேட்டையும் கடந்து ஸ்டம்புகளை பதம்பார்க்க, ஆட்டம் சூடுபிடித்தது.

ஏமாற்றத்துடன் சுப்மன் கில் பெவிலியன் திரும்ப, ராகுல் தேவாட்டியா களத்திற்குள் வந்தார். 3வது பந்தில் 1 சிங்கில். 4வது பந்தில் யார்க்கர் வீசினார் சாம் கரண். அடிக்கத் தடுமாறிய மில்லர், ரன் ஓட முயற்சிக்க, ரன் அவுட் வாய்ப்பை தவறவிட்டார் பஞ்சாப் அணியின் விக்கெட் கீப்பர் ஜிதேஷ் சர்மா.

2 பந்துகளில் 4 ரன்கள் தேவைப்பட்ட நிலையில் சாம் கரண் வீசிய 5வது பந்தை சாமர்த்தியமாக எதிர்கொண்ட தேவாட்டியா, பவுண்டரியுடன் ஆட்டத்தை முடித்து வைத்தார். இதன் மூலம் குஜராத் அணி 1 பந்து மீதமிருந்த நிலையில் 6 விக்கெட் வித்தியாசத்தில் வெற்றிபெற்றது. புள்ளிப்பட்டியலில் 3வது இடத்திற்கு குஜராத் முன்னேறியுள்ளது.