எங்கேயாவது அடிபட்டுக் கொண்டாலும் சீக்கிரம் சரியாகாது. இந்தப் பிரச்னை உள்ளவர்களில் பலரும் வாய் வழியே மூச்சு விடுவார்கள். இவர்களுக்கு சுவை உணரும் தன்மையிலும் மாற்றங்கள் இருக்கும். பற்களில் எனாமல் வளர்ச்சியும் சரியாக இருக்காது. ஈறுகளின் ஆரோக்கியமும் மோசமாக இருக்கும். சிலருக்கு பற்களின் வடிவம் மாறியிருக்கலாம்.
இன்னும் சிலருக்கு உமிழ்நீர் சுரப்பிகள் வீங்கியிருக்கும். ஹைப்போ தைராய்டிசம் பாதிப்புள்ளவர்கள், பற்களுக்கான சிகிச்சைகள் எடுக்கும்போது அந்தப் புண்கள் ஆறுவதற்கு கொஞ்சம் தாமதம் ஆகலாம். ஹைப்போ தைராய்டிசம் பாதிப்புள்ளவர்களுக்கு பல் சிகிச்சைகள் கொடுப்பது பல் மருத்துவர்களுக்கும் சற்று சவாலான விஷயம்தான். வாய் சுகாதாரத்தில் இத்தனை சவால்கள் இருக்கும் நிலையில் இவர்களுக்கு வாய் துர்நாற்றம் என்பதும் இருக்கும்.
தைராய்டுக்கு சிகிச்சை எடுக்கும் மருத்துவரிடம் இது குறித்துச் சொல்லவும். அவர் பரிந்துரைக்கும் மருந்துகளைத் தவறாமல் எடுத்துக்கொள்ளவும். இருமுறை பல் துலக்குவது, சாப்பிட்டதும் வாய்க் கொப்பளிப்பது என வாய் சுகாதாரத்தில் கூடுதல் அக்கறை காட்ட வேண்டியதும் அவசியம்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
