வைபவ் சூர்யவன்ஷி: ஐபிஎல் ஏலத்தில் ரூ 1 கோடிக்கு வாங்கப்பட்ட 13 வயது சிறுவன் – ராஜஸ்தான் அணி வாங்கியது ஏன்?

ராஜஸ்தான் ராயல்ஸ் அணியின் தலைமை செயல் அதிகாரி ஜேக் லஷ் மெக்கல்லம்,” நாக்பூரில் உள்ள எங்கள் உயர் செயல்திறன் மையத்திற்கு வைபவ் வந்திருந்தார். அவரை அங்கு சோதனை செய்தோம். அவர் எங்கள் அனைவரையும் கவர்ந்தார். அவரிடம் திறன் மற்றும் ஐபிஎலில் விளையாட தேவையான அளவு நம்பிக்கை உள்ளது.” என்றார்

வைபவின் தந்தை சஞ்சீவும் ஒரு கிரிக்கெட் வீரர். இருப்பினும், அவரின் நிதி நிலைமை காரணமாக, அவரால் உயர் மட்ட கிரிக்கெட் விளையாட முடியவில்லை என்கிறது கிரிக்இன்ஃபோ.

“நான் பேச்சற்று இருக்கிறேன். எனக்கு என்ன சொல்வதென்றே தெரியவில்லை. இது எங்கள் குடும்பத்திற்கு ஒரு பெரிய விஷயம். அவன் தேர்வு செய்யப்படுவான் என்று நினைத்தேன், ஆனால் இவ்வளவு போட்டி இருக்கும் என்று நான் நினைக்கவில்லை”என்கிறார் வைபவின் தந்தை சஞ்சீவ் சூர்யவன்ஷி

மேலும் அவர், “எனக்கு இப்போதும் எல்லாம் நினைவிருக்கிறது. நானும் கிரிக்கெட்டில் ஆர்வமாக இருந்தேன். ஆனால் 19 வயதில், நான் மும்பைக்குச் செல்ல வேண்டியிருந்தது. நான் அங்கு நிறைய விஷயங்களைச் செய்தேன். நான் நைட் கிளப்பில் பவுன்சராகவும் பணியாற்றினேன்.” என்கிறார்

”என் அதிர்ஷ்டம் எப்போது மாறும் என்று அடிக்கடி யோசித்தேன். ஆனால் இப்போது என் மகன் அதை சாத்தியமாக்கியுள்ளான். எதிர்காலத்தில் என்ன நடக்கும் என்று எனக்குத் தெரியவில்லை, ஆனால் குறைந்தபட்சம் இப்போது நான் அவனது கிரிக்கெட்டுக்காக யாரிடமும் கைகளை நீட்ட வேண்டியதில்லை “என்று கூறினார் சஞ்சீவ் சூர்யவன்ஷி.

ராஜஸ்தான் ராயல்ஸ் குறித்து சஞ்சீவ் கூறுகையில், “ராஜஸ்தான் ராயல்ஸ் பல இளம் வீரர்களை உருவாக்கியுள்ளது. சஞ்சு சாம்சன், துருவ் ஜுரெல் போன்ற வீரர்களை ராஜஸ்தான் உருவாக்கியது” என்றார்

வைபவ் இதுவரை ஐந்து ரஞ்சி போட்டிகளில் விளையாடியுள்ளார். இருப்பினும், அவர் இன்னும் ரஞ்சியில் ஒரு பெரிய ஆட்டம் ஆடவில்லை.

இந்த ஐந்து போட்டிகளில் மத்தியப் பிரதேசத்திற்கு எதிராக, 41 ரன்கள் குவித்தது உட்பட, மொத்தமாக 100 ரன்களை மட்டுமே அவர் எடுத்துள்ளார்.

கடந்த சனிக்கிழமை (நவம்பர் 23) ராஜ்கோட்டில் சையத் முஷ்டாக் அலி தொடரில் அறிமுகமான அவர் ராஜஸ்தான் இடது கை வேகப்பந்து வீச்சாளர் அனிகேத் செளத்ரி பந்தில் இரண்டு சிக்ஸர்களை அடித்து, ஆறு பந்துகளில் 13 ரன்களுக்கு ஆட்டமிழந்தார்.