வரிக்கு பதிலடியாக வரி – டிரம்ப் நிர்வாகத்தின் பரஸ்பர வரி விதிப்பால் இந்தியாவில் என்ன மாற்றம் நிகழும்?

ஒரு நாடு வேறு நாட்டிலிருந்து இறக்குமதி செய்யப்படும் பொருட்களுக்கு விதிக்கும் வரிகளே சுங்க வரி எனப்படும். இது, அரசுக்கு வருவாயை அதிகரிப்பதோடு, அதை ஒத்த உள்ளூர் பொருட்களுக்கு சந்தையில் நன்மை பயக்கின்றன.

இந்தியாவை “வரிகளின் மன்னன்” என டிரம்ப் தொடர்ந்து கூறிவருகிறார். அமெரிக்காவின் பரஸ்பர வரிவிதிப்பால் இந்தியாவின் இறக்குமதிகள் மற்றும் பொருளாதாரத்தில் என்ன மாதிரியான தாக்கம் ஏற்படும் என்பதை இந்த விளக்கப் படங்கள் சுட்டிக்காட்டுகின்றன.

கடந்த பிப்ரவரி மாதம் 13-ம் தேதி அமெரிக்க அதிபர் டொனால்ட் டிரம்பை இந்திய பிரதமர் நரேந்திர மோதி வெள்ளை மாளிகையில் சந்தித்தார். அப்போது, இந்திய பிரதமர் நரேந்திர மோதியுடனான செய்தியாளர் சந்திப்பில், “இந்தியா என்ன வரி விதிக்கிறதோ அதையே அமெரிக்காவும் விதிக்கும்,” என்று டிரம்ப் தெரிவித்திருந்தார்.

உலகளவில் ஒப்பீட்டளவில் இந்தியா இறக்குமதி பொருட்கள் மீது அதிக வரி விதிக்கிறது. இறக்குமதி பொருட்கள் மீது இந்தியா 17% வரி விதிக்கும் நிலையில், அமெரிக்கா 3.3% வரி விதிக்கிறது என உலக வர்த்தக மையம் தரவுகள் கூறுகின்றன.

அமெரிக்காவின் வர்த்தகப் பற்றாக்குறை சீனாவுடன் அதிகமாக உள்ளது. சீனாவுடனான அமெரிக்காவின் வர்த்தக பற்றாக்குறை 24.7 சதவிகிதமாகவும், கனடாவுடன் 5.6 சதவிகிதமாகவும் உள்ளது. ஆனால் இந்தியாவுடனான அமெரிக்காவின் வர்த்தகப் பற்றாக்குறை 3.8 சதவிகிதம் மட்டுமே. அமெரிக்காவுடனான வர்த்தகப் பற்றாக்குறை விஷயத்தில் இந்தியா ஒன்பதாவது இடத்தில் உள்ளது.

அமெரிக்காவுக்கு இந்தியாவில் இருந்து அதிகளவில் மருந்துகள் இறக்குமதி செய்யப்படுகின்றன. 24% வர்த்தக பற்றாக்குறைக்கு மருந்துகளே காரணம்.

பிரதமர் மோதி மற்றும் அமெரிக்க அதிபர் டொனால்ட் டிரம்புக்கு இடையே ஜனவரி மாதம் நடந்த தொலைபேசி உரையாடலில், அமெரிக்காவிடமிருந்து அதிகளவிலான பாதுகாப்பு உபகரணங்களை இந்தியா வாங்க வேண்டும் என்று பிரதமர் மோதிக்கு டொனால்ட் டிரம்ப் கோரிக்கை விடுத்திருந்தார்.

மேலும் அமெரிக்காவுக்கும் இந்தியாவுக்கும் இடையிலான இரு தரப்பு வர்த்தகம் முறையாக நடைபெற வேண்டும் என்றும் டிரம்ப் தெரிவித்துள்ளார்.

அதாவது, அமெரிக்காவுக்கு வர்த்தக பற்றாக்குறை ஏற்படக்கூடாது என டிரம்ப் விரும்புகிறார்.

– இது, பிபிசிக்காக கலெக்டிவ் நியூஸ்ரூம் வெளியீடு