முழுநிலவு நாளில் ஓநாயாக மாறினார்களா மனிதர்கள்? புனைவுகளும் உண்மையும் என்ன?

நிலவின் வளர்பிறை மற்றும் தேய்பிறை கட்டங்கள் பண்டைய காலம் முதலே நேரத்தைக் கணிக்க பயன்படுகின்றன.

மேலே உள்ள படத்தில் இருக்கும் இஷாங்கோ எலும்பு, நவீன கால காங்கோ ஜனநாயக குடியரசு நாட்டில் 1957ம் ஆண்டு கண்டுபிடிக்கப்பட்டது

பபூன் குரங்கின் தாடையிலிருந்து எடுக்கப்பட்டிருக்கலாம் என நம்பப்படும் இந்த எலும்பானது, சுமார் 20,000 ஆண்டுகளுக்கு முன்னது என கணக்கிடப்பட்டுள்ளது. நாட்காட்டியின் ஆரம்ப வடிவமாக இது இருக்கலாம் என நம்பப்படுகிறது.

பெல்ஜியம் நாட்டைச் சேர்ந்த புவியியலாளரால் தோண்டி எடுக்கப்பட்ட இந்த எலும்பின் மீது தனித்துவமான செதுக்கல் வேலைப்பாடுகள் உள்ளன. இவற்றில் சில ஒளி வட்டங்களின் வடிவிலும், இருள் வட்டங்களாகவும் அல்லது பகுதியளவு வட்டங்களாகவும் உள்ளன.

ஹார்வர்டு பல்கலைக் கழக தொல்பொருள் ஆய்வாளர் அலெக்சாண்டர் மார்ஷாக் இவை நிலவின் வெவ்வேறு கட்டங்களைக் குறிக்கலாம் என கருதினார், மேலும் இந்த எலும்பானது ஆறுமாதங்களைக் கொண்ட சந்திர நாட்காட்டியாக பயன்படுத்தப்பட்டிருக்கலாம் எனவும் அவர் கூறினார்

இலையுதிர்க்கால சம இரவு பகலுக்கு அருகில் (செப்டம்பர் பிற்பகுதி அல்லது அக்டோபரின் முற்பகுதி) நிகழும் முழுநிலவுக்கு அறுவடை நிலவு என பெயரிடப்பட்டுள்ளது.

வருடத்தின் இந்த நேரத்தில் சூரியன் மறைந்த உடனேயே நிலவு உதிக்கும். அதாவது அறுவடை செய்யப்பட்ட பயிர்களை சேகரிக்கும் விவசாயிகள் சூரியன் மறைந்த பின்னரும் பின் மாலைப் பொழுதுகளில் நிலவொளியில் தங்களின் பணியைத் தொடர முடிந்தது. தற்போதுதான் தெருவிளக்குகளின் பயன்பாடு வந்துள்ளது.

சீனாவில் இலையுதிர்க்காலத்தின் நடுப்பகுதியில் ஜோங்க்கி ஜீ விழா (நிலவு விழா) கொண்டாடப்படுகிறது. அறுவடை நிலவு நாளன்று நடைபெறும் இதற்காக பொது விடுமுறையும் விடப்படுகிறது. 3000 ஆண்டுகள் பழமையான இந்த விழா நிறைவான அறுவடையை எதிர்நோக்கி கொண்டாடப்படுகிறது.

இதே போன்று கொரியாவில் சுசியோக் அறுவடை நிலவுடன் சேர்த்து கொண்டாடப்படும் மூன்று நாள் நிகழ்வாகும். அறுவடையைக் கொண்டாடுவதற்காகவும், முன்னோர்களை வணங்குவதற்காகவும் குடும்பங்கள் ஒன்று கூடுகின்றன.

இந்து கலாச்சாரத்தில் பூர்ணிமா என அழைக்கப்படும் முழுநிலவு நாட்கள் விரதத்திற்காகவும், பிரார்த்தனைக்காகவும் அறியப்படுகின்றன. இந்து நாட்காட்டியில் புனித மாதமாக கருதப்படும் நவம்பரில் கார்த்திகை பவுர்ணமி கொண்டாடப்படுகிறது. இது திரிபுராசுரனை சிவன் வென்றதையும், மகா விஷ்ணுவின் முதல் அவதாரமான மச்சாவதாரதத்தையும் குறிக்கிறது. ஆறுகளில் நீராடுவது, அகல் விளக்குகளை ஏற்றுவது ஆகியவை இம்மாதத்திற்கான சடங்குகளாகும்.

முழுநிலவு நாளில் தொடங்கும் கும்பமேளா பன்னிரண்டு ஆண்டுகளுக்கு ஒருமுறை நிகழ்கிறது.

2,500 ஆண்டுகளுக்கு முன்னர் முழுநிலவு நாளில் புத்தர் பிறந்ததாக புத்த மதத்தினர் நம்புகின்றனர். புத்தர் ஞானம் பெற்றதும், மறைந்ததும் முழுநிலவு நாளில்தான் என்பது அவர்களின் நம்பிக்கையாக உள்ளது. இந்த நிகழ்வுகள் புத்த பூர்ணிமா என்று பெயரிடப்பட்டு, ஏப்ரல் அல்லது மே மாதத்தின் முழு நிலவு நாளில் நடைபெறுகின்றன.

இலங்கையில் அனைத்து மாதங்களின் முழுநிலவு நாளும் பொது விடுமுறை அறிவிக்கப்பட்டுள்ளது. போயா என பெயரிடப்பட்டுள்ள இந்நாட்களில் மது மற்றும் இறைச்சி விற்பனை தடை செய்யப்பட்டுள்ளது.

பாலி தீவில் முழுநிலவு நாள் பூர்ணமா என குறிப்பிடப்படுகிறது, அன்றைய நாளில் ஆண், பெண் தெய்வங்கள் பூமிக்கு இறங்கி வந்து தங்கள் ஆசீர்வாதங்களை வழங்குவார்கள் என நம்பப்படுகிறது. இந்த நாள் பிரார்த்தனை, தெய்வங்களுக்கான காணிக்கை செலுத்துதல் மற்றும் தோட்டங்களில் பழ மரங்களை நடுவதற்கான நேரமாக கருதப்படுகிறது.

முஸ்லிம்கள் முழுநிலவின் போது மூன்று நாட்கள் நோன்பிருக்க ஊக்குவிக்கப்படுகின்றனர். இந்நாட்கள் வெண்மை நாட்கள் அல்லது அல்-அய்யாம் அல்-பித் என்று அறியப்படுகின்றன. இருண்ட இரவுகளை ஒளிரச் செய்ததற்காக அல்லாவுக்கு நன்றி தெரிவிக்க நபிகள் நாயகம் இந்த நாட்களில் நோன்பிருந்ததாக கூறப்படுகிறது.

கிறிஸ்தவ மதத்தில் வசந்த காலத்தின் சம இரவு நாளுக்குப் (Spring Equinox) பின் வரும் முதல் ஞாயிற்றுக்கிழமை ஈஸ்டர் கொண்டாடப்படுகிறது.

மெக்ஸிகோ மற்றும் வேறு சில லத்தீன் அமெரிக்க நாடுகளில் பூர்வீக அமெரிக்கர்களின் “நிலவு நடனம்” மீண்டும் புத்துயிர் பெற்றுள்ளது. இதில் பெண்கள் முழுநிலவில் ஒன்று கூடி மூன்று நாட்கள் நடைபெறும் திருவிழாவில் நடனமாடி வழிபாடு நடத்துகின்றனர்.