திருப்பூர்: பட்டியல் சாதி திருமணங்களுக்கு மண்டபங்கள் மறுக்கப்படுகிறதா? பிபிசி கள ஆய்வு

சிவன்மலையைச் சேர்ந்த பெயர் கூற விரும்பாத பட்டியலின இளைஞர் ஒருவர், ”இந்த 2 திருமண மண்டபங்கள் தவிர, வேறு எதிலும் பட்டியலின மக்களுக்குத் தரப்படுவதில்லை. அதேபோன்று காங்கேயத்திலும் ஒன்றிரண்டு மண்டபங்கள் தவிர மற்றவை, பட்டியல் சாதியினருக்குத் தரப்படுவதில்லை. அந்த மண்டபங்கள் கிடைக்காவிட்டால் தேதியை மாற்றி வைத்துக் கொள்வோம். அல்லது வீட்டிற்கு முன்பாகப் பந்தல் போட்டு சாப்பாடு பரிமாறிக் கொள்வோம்” என்றார்.

பட்டியலினத்தைச் சேர்ந்த அரசு அலுவலர்கள் சிலருக்கும், இங்கே இருக்கும் மண்டபங்கள் தர மறுக்கப்பட்டதாக சில உதாரணங்களை அவர் குறிப்பிட்டார்.

ஆனால் சிவன்மலை கோவிலில் திருமணம் செய்யும் பட்டியலின மக்கள், பெரும்பாலும் மண்டபங்களை வாடகைக்கு எடுக்கும் வசதி இல்லாமல்தான் வீடுகளில் நிகழ்ச்சிகளை நடத்துவதாக ஒரு மண்டப உரிமையாளர் தெரிவித்தார். மேலும் அவர், இப்போது சிலர் பணத்திற்காக மண்டப உரிமையாளர்கள் மீது இதுபோன்ற புகாரைத் தெரிவிப்பதாகவும் குற்றம் சாட்டினார்.

இதை மறுக்கும் காங்கேயத்தைச் சேர்ந்த சமூக செயற்பாட்டாளர் குழந்தைசாமி, ”பணம் பிரச்னையில்லை. வசதியுள்ள பட்டியலின மக்கள், அரசு அலுவலர்கள் கேட்டாலும் மண்டபம் தருவதில்லை. சிவன்மலை கிராம ஊராட்சி சார்பில் ஒரு திருமண மண்டபம் கட்டி அனைவருக்கும் வாடகைக்குத் தர வேண்டுமெனக் கோரிக்கை வைத்தோம். அதுவும் ஏற்கப்படவில்லை” என்றார்.

”அறநிலையத்துறை சார்பில் மண்டபம் கட்டுவதாகச் சொல்கிறார்கள். ஆனால் அதற்கு எந்த முயற்சியும் எடுக்கப்படுவது போலத் தெரியவில்லை. பட்டியலினத்தவர்க்கு தரப்படும் 2 மண்டபங்களின் நிலை என்ன என்பதை அதிகாரிகள் ஆய்வு செய்ய வேண்டும்” என்றார்.

ஆனால் இந்த புகார் குறித்து இதுவரை மாநில ஆதி திராவிடர் மற்றும் பழங்குடியினர் ஆணையத்திற்கு எந்தப் புகாரும் வந்தது இல்லை என்கிறார் ஆணையத்தின் உறுப்பினரான செல்வகுமார். அதோடு புகார் வரும்பட்சத்தில் ஆணையத்தின் தலைவரும் நீதியரசருமான தமிழ்வாணன் தலைமையில் விசாரணை மேற்கொள்ளப்பட்டு, நிச்சயமாக நடவடிக்கை எடுக்கப்படும் என்றும் அவர் பிபிசி தமிழிடம் தெரிவித்தார்.

தேசிய தாழ்த்தப்பட்டோர் ஆணையத்தின் இயக்குநர் ரவிவர்மனும், “ஆணையத்திற்கு இதுதொடர்பாக இதுவரை எந்தப் புகாரும் வரவில்லை, வந்தால் விசாரிக்கப்படும்” என்று பதிலளித்தார்.

ஆதித் தமிழர் முன்னேற்றக் கழகத்தின் திருப்பூர் மாவட்ட செயலாளர் காளிமுத்து, ”நாங்கள் தேசிய, மாநில தாழ்த்தப்பட்டோர் ஆணையங்களுக்கு புகார் அளித்துள்ளோம். இதை வெளிப்படுத்தி, விசாரணையை கோரிய பிறகு, எல்லோருக்கும் மண்டபம் தருவதாகச் சொல்கிறார்கள், எழுதிக் கொடுக்கிறார்கள். ஆனால் நாங்கள் கேட்டபோது தர மறுத்தனர். எங்களுக்கு மறுத்தவர்கள் மீது வன்கொடுமை தடுப்புச் சட்டத்தின்படி நடவடிக்கை எடுக்க வேண்டும்” என்று பிபிசி தமிழிடம் கூறினார்.

குறிப்பிட்ட சில மண்டபங்களின் மீது புகார் கொடுப்பதற்கு, பணம் கேட்டுத் தர மறுத்ததே காரணமென்று கூறப்படும் குற்றச்சாட்டு குறித்து காளிமுத்துவிடம் கேட்டபோது, ”பட்டியலின மக்கள் சார்பில் யாராவது புகார் தெரிவித்தால் இப்படியொரு குற்றச்சாட்டை முன் வைப்பது வாடிக்கையாகிவிட்டது” என்றார்.

மேலும், “இந்தக் காரணத்தால்தான் அங்குள்ள அருந்ததியர் சமுதாயத்தைச் சேர்ந்த 200 குடும்பங்களில் யாருமே பயத்தில் புகார் தெரிவிக்காமல், வெளியூரில் இருந்து நாங்கள் வந்து புகார் தர வேண்டிய கட்டாயம் ஏற்பட்டுள்ளது” எனவும் குறிப்பிட்டார்.