ட்விட்டரில் ப்ளூ டிக் இழக்கும் பிரபலங்கள் – குளறுபடிகளால் ட்விட்டருக்கு ஈலோன் மஸ்க் முடிவுரை எழுதுகிறாரா?

முற்றிலும் புதிய ட்விட்டரை நாம் பார்த்துக் கொண்டிருக்கிறோம். இனி ட்விட்டரில் ப்ளூ டிக் என்பது அந்த கணக்கு குறிப்பிட்ட நபருடைய உண்மையான கணக்கு என்பதற்கானதாக இருக்கப் போவதில்லை. அவை எல்லாமே மாதச் சந்தை செலுத்தப்படுபவை.

பணம் செலுத்தப்படும் போது குறிப்பிட்ட கணக்கை சரிபார்க்கும் நடைமுறை இருந்தாலும், பெரும் அந்தஸ்துடைய தனி நபர்கள், நிறுவனங்களின் பெயரில் போலி கணக்குகள் பணம் செலுத்தி ப்ளூ டிக் வைத்திருப்பதை காண முடிகிறது.

இம்மாத தொடக்கத்தில் தனிநபர் நிதி நிபுணர் மார்ட்டின் லீவிஸ் தன்னுடைய பெயரில் ப்ளூ டிக் கொண்ட ஒரு கணக்கில் ஆயிரக்கணக்கான ஃபாலோயர்களுக்கு கிரிப்டோகரன்சி விளம்பரப்படுத்தப்பட்டதைக் கண்டு அதிரச்சியடைந்தார். ஏனெனில், அது அவரது உண்மையான கணக்கு அல்ல என்பதை சொல்லித் தெரிய வேண்டியதில்லை.

ட்விட்டரில் இன்றைய நிலையில் பயனர்களால் தேர்வு செய்யப்படும் நபர்களைக் காட்டிலும் பணம் செலுத்தும் நபரே அந்த தளம் முழுவதும் தெரியவரக் கூடிய நபராக இருக்கிறார்.

அதனால், இனி வரும் நாட்களில் நம்மிடம் வந்து சேரும் புதிய ட்விட்டர் கணக்குகள் உண்மையில் யாருடையவை என்பதை நாம் காண விருக்கிறோம்.

ஈலோன் மஸ்க் வசமாகும் முன்பு, ட்விட்டரில் யார்யார் முக்கியமானவர்கள் என்பதை தீர்மானிக்கும் முறை சரியானதாக இல்லை என்று அவர் கூறியிருந்தார். அவரது கூற்று ஓரளவு சரியாகவும் இருந்தது.

இன்று அவரது நேரடி மேற்பார்வையின் கீழ் சிலருக்கு மட்டும் ப்ளூ டிக் சரிபார்ப்பு இலவசமாக வழங்கப்படுவதாக தகவல்கள் கூறுகின்றன. புலனாய்வு தளமான பெல்லிங்கேட் நிறுவனர் தன்னுடைய நிறுவனமும் அவ்வாறு சரிபார்ப்பு உறுதி செய்யப்பட்ட ஒன்று என்று என்னிடம் உறுதி செய்தார்.

ட்விட்டரின் மாத சந்தா திட்டத்தை விமர்சிக்கும் ஸ்டீபன் கிங், லெப்ரான் ஜேம்ஸ், வில்லியம்ஸ் ஷாட்னர் ஆகியோருக்கு தனிப்பட்ட முறையில் தாமே பணம் செலுத்தி இருப்பதாக ஈலோன் மஸ்க் தெரிவித்துள்ளார்.

வர்த்தகத்தைப் பொருத்தவரை, சரிபார்க்கப்பட்ட கணக்குகளில் மட்டுமே விளம்பரம் செய்ய அனுமதிக்கப்படும், இல்லாவிட்டால் மாதத்திற்கு 1,000 அமெரிக்க டாலர்களுக்கு மேல் பணம் செலுத்த வேண்டியிருக்கும் என்றும் ட்விட்டர் நிறுவனம் கூறியுள்ளது.

டிஜிட்டல் விளம்பர வருவாயைப் பொருத்தவரை, பெருநிறுவனங்களைக் காட்டிலும் சிறிய, தொடர்ச்சியாக விளம்பரம் செய்யும் நிறுவனங்களின் கூட்டுத்தொகையே அதிகம் என்று நமக்கு தெரியவருகிறது.

தன்னை பேச்சுரிமைக்கான காவலராக பறைசாற்றிக் கொள்ளும் ஈலோன் மஸ்க் தலைமையிலான ட்விட்டர், அதனை உறுதி செய்யும் வகையில் அனைவருக்கும் சம வாய்ப்பு வழங்குகிறதா என்பதை மேற்கூறியவை கேள்விக்குள்ளாக்குகின்றன.

மக்கள் பொதுவாக சமூகத்தை விட்டு விலகியிருக்க விரும்ப மாட்டார்கள். ட்விட்டர் மிகச்சிறியதாக, குழப்பமான ஒன்றாக இருந்தாலும் சமூகத்தில் செல்வாக்கும் செலுத்தும் ஒன்றாகவே பார்க்கப்படுகிறது.

அது மிகவும் மோசமாக நடத்தப்படுகிறது. மற்ற தளங்களைப் போலவே அதன் நிதியும் இக்கட்டான நிலையில் இருந்தது. துஷ்பிரயோகம் மற்றும் தவறான தகவல்களைக் கட்டுக்குள் வைத்திருக்க அது போராடியது.

ஈலோன் மஸ்க் பெரும் பணக்காரர் என்பதுடன், ஏராளமான பின்தொடர்வோரையும் கொண்ட ஒரு புத்திசாலியான தொழிலதிபர்.

ட்விட்டரில் அவர் செய்த மாற்றங்களின் விளைவாக ட்வீட் செய்வதை நிறுத்திய செய்தி நிறுவனங்களில் கனடியன் பிராட்காஸ்டிங் கார்ப்பரேஷன் மற்றும் NPR ஆகியவை முக்கியமானவை. பாடகர் எல்டன் ஜான், நகைச்சுவை நடிகர் ஸ்டீபன் ஃப்ரை மற்றும் மாடல் ஜிகி ஹடிட் போன்ற பிரபலங்கள் ட்விட்டரை மஸ்க் கையகப்படுத்திய பிறகு ட்விட்டரை விட்டு வெளியேறி விட்டனர்.

ட்விட்டர் நிறுவனம், ஏற்கனவே அறிவித்தபடி, மாதச் சந்தா செலுத்தாத பிரபலங்களின் கணக்கில் இருந்த சரிபார்ப்பு அடையாளக் குறியான ப்ளூ டிக்கை நீக்கும் நடவடிக்கையை கடந்த வியாழக்கிழமை தொடங்கியுள்து.

அதன்படி ஆயிரக்கணக்கான கணக்குகளில் இருந்த ப்ளூ டிக் நீக்கப்பட்டுள்ளது. கால்பந்து நட்சத்திரம் கிறிஸ்டியானோ ரொனால்டோ, பியான்ஸே ஆகியோரும் அவர்களில் அடங்குவர்.

ட்விட்டரில் கணக்கு சரிபார்ப்புக்கு பணம் செலுத்த மாட்டோம் என்று கூறும் பிபிசி, ஒரு செய்தி நிறுவனமாக சரிபார்ப்பதில் ஏற்கெனவே “தங்க” நிற டிக்கை இழந்துவிட்டது. பிபிசி நியூஸ் ட்விட்டர் கணக்கு என்னைப் போன்ற தனிப்பட்ட பத்திரிகையாளர்களைப் பின்தொடரத் தொடங்கியது, நம்பகத்தன்மைக்கு எதிரானதாக உள்ளது.

ப்ளூ டிக்கை இழந்ததால் ஏராளமானோர் மகிழ்ந்துள்ளனர்.

“புளூ டிக்கை இழந்ததை கொண்டாடும் அனைவருக்கும் மகிழ்ச்சி,” என்று எனது நண்பர் ஒருவர் வியாழக்கிழமை குழு ஒன்றில் பதிவிட்டார். மற்றவர்கள் “டிக்ட் ஆஃப்” என்று கேலி செய்தார்கள்.

பலரைப் போலவே நானும், ஒரு வேலை மற்றும் சமூகத் தளம் என்ற அடிப்படையில் ட்விட்டர் எடுக்கும் புதிய திசையை நான் உன்னிப்பாகக் கவனித்து வருகிறேன்.

ட்விட்டரை உருவாக்கிய ஜாக் டோர்சி, ப்ளூஸ்கை என்ற புதிய தளத்தை தொடங்குகிறார். அதன் வடிவமைப்பு கிட்டத்தட்ட ட்விட்டரைப் போன்றே இருக்கிறது.

இது மிகவும் சிறியது, அழைப்பின் பேரில் மட்டுமே இணைய முடியும். ஆனால் இது ஒரு பெரிய உற்சாகத்தை உருவாக்குகிறது. ஏனெனில் இது எதிர்காலத்தில் இயங்கக்கூடியதாக இருக்கும் என்று உறுதியளிக்கிறது. அதாவது மற்ற தளங்களுடன் அது இணக்கமானது. நானும் அதில் இருக்கிறேன். தற்போது நாம் அனைவரும் ஒரு விருந்துக்கு வந்து, அலங்காரத்தை ரசிப்பது போல் உணர்கிறேன்.

ஆனால் ஒரு புதிய, சிறிய ஆனால் செல்வாக்கு மிக்க இடத்திற்கான வாசல் இருக்கலாம்.

அது புளூஸ்கையாக இருக்கவும் வாய்ப்பு உள்ளது. ட்விட்டரை விற்றதிலிருந்து ஒரு வணிகத்தை நடத்துவது பற்றி ஒன்றிரண்டு விஷயங்களை டோர்சி கற்றுக் கொண்டார் என்று நம்புவோம்.

சமூக ஊடகங்களில் பிபிசி தமிழ்: