கோடையில் வேப்பம் பூ ரசம் சாப்பிடாமல் இருக்க முடியுமா..? இதோ ரெசிபி..!

கோடையில்தான் வேப்ப மரத்தில் பூக்கள் பூத்து உதிர்க்கத் துவங்கும். அவற்றை குப்பை என பெருக்கி ஒதுக்கிவிடாமல் அவற்றை சேமித்து இப்படி ரசம் வைத்து சாப்பிடுங்கள். முடிந்தால் வெயிலில் காய வைத்து பின் ஸ்டோர் செய்து அவ்வப்போது டீ போட்டு குடியுங்கள். இவ்வாறு செய்ய கோடைக்கால நோய்களிலிருந்து தப்பிக்கலாம். சரி இந்த பதிவில் வேப்பம் பூ ரசம் எப்படி செய்வது என்று பார்க்கலாம்.

தேவையான பொருட்கள்:

புளி – 1 எலுமிச்சை அளவு

துவரம் பருப்பு – 1/2 கப்

மிளகு – 1 டீஸ்பூன்

சீரகம் – 1 டீஸ்பூன்

வர மிளகாய் – 2

மல்லி – 1 டீஸ்பூன்

தக்காளி – 1 (நன்கு கனிந்தது)

கொத்தமல்லி – சிறிது

பெருங்காயத் தூள் – 1 சிட்டிகை

மஞ்சள் தூள் – 1 சிட்டிகை

எண்ணெய் – 1 டீஸ்பூன்

கடுகு – 1/2 டீஸ்பூன்

உப்பு – தேவையான அளவு

வேப்பம்பூ – 1 டீஸ்பூன்

நெய் – 1 டீஸ்பூன்

செய்முறை:

1. முதலில் வாணலியை அடுப்பில் வைத்து, அதில் நெய் ஊற்றி காய்ந்ததும், வேப்பம்பூவை போட்டு வறுத்து தனியாக வைத்துக் கொள்ள வேண்டும்.

2. பின் புளியை தண்ணீரில் போட்டு ஊற வைத்து, பின் நீரை முற்றிலும் வடித்து தனியாக வைத்துக் கொள்ள வேண்டும்.

3. அடுத்து துவரம் பருப்பை குக்கரில் போட்டு, தண்ணீர் ஊற்றி, குக்கரை மூடி 3 விசில் விட்டு இறக்கி குளிர வைக்க வேண்டும்.

4. இப்போது குக்கரை திறந்து, பருப்பை நன்கு மசித்துக் கொள்ள வேண்டும். பின்பு மிக்ஸியில் மிளகு, சீரகம், வர மிளகாய் மற்றும மல்லி சேர்த்து அரைத்து பொடி செய்து கொள்ள வேண்டும்.

5. அடுத்து ஒரு வாணலியை அடுப்பில் வைத்து, அதில் மசித்து வைத்துள்ள துவரம் பருப்பு, புளி தண்ணீர், அரைத்து வைத்துள்ள பொடி, மஞ்சள் தூள் சேர்த்து, தேவையான அளவு தண்ணீர் ஊற்றி கொதிக்க விட வேண்டும்.

6.பிறகு தக்காளி சேர்த்து கொதிக்க விடவும். கலவையானது கொதிக்க ஆரம்பித்ததும், அதில்வறுத்து வைத்துள்ள வேப்பம்பூ மற்றும் கொத்தமல்லியை தூவி இறக்கி விட வேண்டும்.

7. பின்னர் அதில் 1/2 கப் தண்ணீர் ஊற்ற வேண்டும். இதனால் வேப்பம்பூவில் உள்ள கசப்பு அதிகமாக இறங்காமல் இருக்கும்.

8. இறுதியில் கடுகு மற்றும் பெருங்காயத் தூள் சேர்த்து தாளித்தால் சுவையான வேப்பம்பூ ரசம் ரெடி.