இந்தியா வழியாக சரக்குகளை ஏற்றுமதி செய்ய வங்கதேசத்துக்கு மறுப்பு – இந்த முடிவால் இந்தியாவுக்கு நஷ்டமா?

இந்தியா ஏன் இதைச் செய்கிறது? இதனால் என்ன பலன் கிடைக்கும் என்பது புரிந்துகொள்ள முடியாத ஒன்று என வங்கதேசத்தின் முன்னணி பொருளாதார நிபுணர் ஜாஹித் உசேன் கூறினார்.

வங்கதேசத்தின் ஆங்கில செய்தித்தாளான டெய்லி ஸ்டாரிடம் பேசிய ஜாஹித் உசேன், “சில நெறிமுறைகள் மற்றும் சில ராஜ்ஜீய நடைமுறைகள் பின்பற்றப்பட வேண்டும். ஆனால் இது தொடர்பாக அறிவிப்பு வெளியாவதற்கு முன்பு எந்த அறிகுறியும் அளிக்கப்படவில்லை. பிரதமர் மோதியுடன் சமீபத்தில் நடந்த சந்திப்பில் உறவுகள் மேம்பட்டதாக நாங்கள் உணர்ந்தோம். இப்போது அது குறைந்துவிட்டதாக தெரிகிறது” என்றார்.

மேலும், ” இந்தியா உட்பட முழு உலகமும் அமெரிக்காவின் வரிகளை எதிர்கொண்டுள்ள நிலையில், இந்த நடவடிக்கை தேவையற்றது” என்றும் அவர் கூறினார்.

வங்கதேசத்தின் மற்றொரு செய்தித்தாளான தி பிசினஸ் ஸ்டாண்டர்டுக்கு அளித்த பேட்டியில், வங்கதேச சரக்குகளை இந்தியாவில் இருந்து வேறு நாடுகளுக்கு ஏற்றுமதி செய்யும் வசதியை திரும்பப் பெறுவதன் மூலம், இந்தியா சுங்க கட்டணங்களை இழக்க நேரிடும் என்று சில நிபுணர்கள் தெரிவித்தனர்.

வங்கதேச ஆடை உற்பத்தியாளர்கள் மற்றும் ஏற்றுமதியாளர்கள் சங்கத்தின் முன்னாள் மூத்த துணைத் தலைவர் அப்துல்லா ஹில் ரகிப் இதுகுறித்து கூறுகையில், “இது எங்களது வணிகத்தைப் பாதிக்காது என்று நாங்கள் நம்புகிறோம். இந்தியா வருவாயில் இழப்பைச் சந்திக்கும்” என்றார்.

“எங்களது உபரி சரக்குகள் இந்திய விமான நிலையங்கள் வழியாக அனுப்பப்பட்டதால், ஆரம்பத்தில் இது அழுத்தத்தை உருவாக்கும். இருப்பினும், உள்நாட்டு விமான நிலையங்களில் இதை நிர்வகிக்க முடியும்,” என்று வங்கதேச சரக்கு அனுப்புநர்கள் சங்கத்தின் (BAFA) தலைவர் கபீர் அகமது கூறினார்.

தலைநகர் டாக்காவில் உள்ள ஹஸ்ரத் ஷாஜலால் விமான நிலையத்தின் திறனை அதிகரிக்க வேண்டிய அவசியம் ஏற்படும் என்றும், தேவைப்பட்டால் இலங்கை மற்றும் மாலத்தீவில் உள்ள விமான நிலையங்களையும் பயன்படுத்தலாம் என்றும் அவர் குறிப்பிட்டார்.

இந்த நடவடிக்கைகளின் மூலம், இந்தியாவிற்கு செலுத்த வேண்டிய கட்டணங்களில் இருந்து வங்கதேசத்தை காப்பாற்ற முடியும் என்று கபீர் அகமது கூறுகிறார்.

இதுகுறித்து வங்கதேச அரசிடம் இருந்து எந்த அதிகாரப்பூர்வ கருத்தும் இதுவரை வரவில்லை என்றாலும், வங்கதேச அரசியல் வட்டாரங்களில் இந்தியாவின் முடிவு குறித்து விவாதம் நடந்து வருகிறது.

இந்தியாவின் திடீர் முடிவு எதிர்மறையான செய்தி என்று முன்னாள் மூத்த வங்கதேச தூதரக அதிகாரி எம். ஹுமாயூன் கபீர் கூறுகிறார்.

“பதிலடி நடவடிக்கை என்ற பேச்சுக்கே இடமில்லை. சூழலைப் புரிந்துகொண்டு அதற்கேற்ப முடிவுகளை எடுப்போம்” என்று அவர் கூறினார் .