ஆந்திரா, தெலங்கானா வெள்ளத்தில் பாதிக்கப்பட்ட மக்களின் நிலை என்ன? அவர்கள் கூறுவது என்ன?- பிபிசி கள நிலவரம்

கடந்த வெள்ளிக் கிழமைக்குள் வெள்ளம் குறைந்தது. எனவே ஆந்திர அரசு நிவாரணப் பணிகளை தீவிரப்படுத்தியுள்ளது. சுமார் 1,200 வாகனங்களில் அரிசி மற்றும் அத்தியாவசிய பொருட்களை கொண்டு வந்து வெள்ளத்தால் பாதிக்கப்பட்ட மக்களுக்கு விநியோகம் செய்தனர்.

தீயணைப்பு வீரர்கள் 150 பேரை கொண்டு தெருக்களை சுத்தம் செய்யும் பணி மேற்கொள்ளப்பட்டது. குப்பை அகற்றும் பணியும், கொசு மருந்து அடிக்கும் பணியும் நடந்தது.

பிரகாசம் தடுப்பணையில் சேதமடைந்த கதவுகளை அதிகாரிகள் சீரமைத்தனர். கிருஷ்ணா நதியிலும் வெள்ளம் குறைந்துள்ளது.

தெலங்கானா மாநிலம் கம்மத்தில் உள்ள வெங்கடேஸ்வரா நகருக்கு செப்டம்பர் 2-ஆம் தேதி பிபிசி சென்றது.

முன்னேறு ஆற்றில் இருந்து 200 மீட்டர் தொலைவில் இது அமைந்துள்ளது. அங்கு ஒரு தெருவில் நடந்து சென்றபோது, ​​ரேக்லாவின் வீட்டின் மேல் ஒரு ஐஸ்கிரீம் வண்டி காணப்பட்டது.

முன்னேறு வெள்ளப்பெருக்கு எந்த அளவிற்கு இருந்திருக்கும் என்பதற்கு இதுவே நேரடி உதாரணம். இங்கு இரண்டு மாடி வீடுகள் கூட நீரில் மூழ்கியதாக பாதிக்கப்பட்டவர்கள் தெரிவித்தனர்.

வீட்டில் இருந்த பொருட்களை எல்லாம் முற்றிலுமாக தண்ணீரில் நனைந்து, சேறும் சகதியுமாக இருந்ததால் அவற்றை ரோட்டில் வீசினர்.

அரிசி, டி.வி., ஃப்ரிட்ஜ், வாஷிங் மெஷின், கூலர், படுக்கை, மெத்தை, சான்றிதழ், புத்தகம் போன்றவற்றில் தொடங்கி, அனைத்தையும் இழந்து நிற்கின்றனர்.

“இனி எங்களுக்கென்று ஒன்றுமே இல்லை. எல்லாம் தண்ணீரில் நனைந்துவிட்டது. 16 அடி வீடு நீரில் மூழ்கியது. பொருள்கள் மட்டுமின்றி உயிர்களும் பலியாகின. இதில் இருந்து மீண்டு வர நான்கைந்து ஆண்டுகள் ஆகும்” என்கிறார் வெங்கடேஸ்வரா நகரைச் சேர்ந்த பாலகிருஷ்ணா.

அங்கிருந்து அருகே உள்ள ரங்கநாயகுலா குட்டா சாலை மற்றும் மோதிநகர் பகுதிகளுக்கும் பிபிசி சென்றது.

அங்குள்ள தெரு முழுவதும் வெள்ளத்தில் அடித்துச் செல்லப்பட்ட பெரிய மரக்கட்டைகளால் நிறைந்திருந்தது. அங்கு வசிக்கும் மக்கள் சேற்றை அகற்றி வீட்டில் உள்ள ஈரமான பொருட்களை ஒவ்வொன்றாக வெளியே கொண்டு வருகின்றனர்.

“திடீரென்று தண்ணீர் வந்தது. அனைத்து பொருட்களும் அடித்து செல்லப்பட்டன. எல்லாம் சரியாகும் என நாங்கள் உறுதியுடன் இருக்கிறோம்” என்று மோதி நகரைச் சேர்ந்த ஷேக் பர்சானா கூறினார்.

கடந்த சில ஆண்டுகளில் முன்னெப்போதும் இல்லாத அளவில் முன்னேறு ஆறு பாய்கிறது.

2022ல், அதிகபட்சமாக 30.5 அடி உயரத்தை எட்டிய முன்னேறு, தற்போது 36 அடி உயரத்தில் பாய்கிறது. இந்த தண்ணீர் அனைத்தும் கிருஷ்ணா நதியில் சென்று கலப்பதால், பிரகாசம் தடுப்பணையில் வெள்ளம் பெருக்கெடுத்து ஓடியது.

முன்னேறு-வின் பாதிப்பு கம்மம் நகரத்தில் மட்டுமின்றி ஆந்திராவின் மகாபூபாபாத் மற்றும் என்டிஆர் மாவட்டங்களிலும் இருந்தது.

விஜயவாடா – ஹைதராபாத் தேசிய நெடுஞ்சாலையில் நந்திகம் அருகே ஐதாவரம் என்ற இடத்தில் முன்னேறு ஆற்று வெள்ளத்தில் கார்கள் அடித்துச் செல்லப்பட்டன. வாகனத்தில் இருந்த அனைவரும் பத்திரமாக தப்பினர். சில வாகனங்கள் சுமார் 500 மீட்டர் தூரம் அடித்து செல்லப்பட்டு வயல்வெளிகளில் சிக்கின.

கனமழை காரணமாக பாலேறு நீர்த்தேக்கம் நிரம்பியது. நீர்த்தேக்கத்தின் கொள்ளவு 2.5 டிஎம்சியை தாண்டியதால் அணையில் இருந்து நீர் நிரம்பி வழிந்தது.

இதனால் கூசுமஞ்சி-நாயக்கன் குடேம் இடையே கடந்த செப்டம்பர் 1-ம் தேதி வெள்ளப்பெருக்கு ஏற்பட்டது. இந்த வெள்ளத்தில்தான் யாகூப்பின் குடும்பம் அடித்து செல்லப்பட்டது.

நாயக்கன் குடேமில் உள்ள பெட்ரோல் பம்ப் வெள்ளத்தில் மூழ்கியதால் அது இருந்த தடயமே இல்லாமல் இருந்தது.

‘‘எங்களுடைய நாலு ஏக்கரில் நெல் நடவு செய்தேன். வெள்ளத்தில் சகதிகள் அடித்து வரப்பட்டு நிலங்களில் குவிந்தது” என்று கம்மம் மாவட்டம் நாயக்கன் குடேமை சேர்ந்த வெங்கடேஸ்வரலு பிபிசியிடம் கூறினார்.

விளைநிலங்களில் சேறுடன் சகதிகள் அடித்து வரப்பட்டதால், அதை அகற்றுவது விவசாயிகளுக்கு சவாலாக உள்ளது.

அரசின் முதற்கட்ட மதிப்பீட்டின்படி, தெலங்கானாவில் சுமார் 4.15 லட்சம் ஏக்கரில் பயிர் இழப்பு ஏற்பட்டுள்ளது.

பயிர்களை இழந்தவர்களுக்கு ஏக்கருக்கு ரூ.10,000 இழப்பீடு வழங்கப்படும் என்று முதல்வர் ரேவந்த் ரெட்டி அறிவித்தார்.