அமெரிக்கா, ஜெர்மனியில் மாறும் நிலைமை: 2025-ஆம் ஆண்டில் மக்களின் புலப்பெயர்வு எப்படி இருக்கும்?

சிரியாவில் அசத் ஆட்சி வீழ்ச்சி அடைந்துள்ள நிலையில், உலகம் முழுவதும் உள்ள 60 லட்சம் சிரிய மக்கள் தங்களின் சொந்த நாடுகளுக்கு திரும்புவதற்கான வாய்ப்புகள் உள்ளது.

சிரிய அதிபர் பஷர் அல்-அசத் ரஷ்யாவில் தஞ்சம் புகுந்த பின், துருக்கி எல்லையில் சிரிய மக்கள் நீண்ட வரிசையில் தங்களின் வீடுகளுக்கு திரும்ப காத்திருக்கின்றனர்.

சிரியாவில் பாதுகாப்பு விவகாரங்கள் எப்படியாக மாறும்? நிச்சயமற்ற சூழலைக் கொண்டுள்ள சிரியாவில் ஆட்சி அதிகாரம் எதிர்காலத்தில் எப்படி இருக்கும் என்ற கேள்வியும் எழுவதால் இந்த போக்கு இப்படியே தொடருமா என்பதை உறுதியாகக் கூற இயலாது.

டொனால்ட் டிரம்ப் மற்றும் அவரின் கட்சியினருக்கு புலம் பெயர்தல் என்பது மிகவும் முக்கியமான ஒரு பிரச்னையாக உள்ளது.

உலக அரங்கில் அமெரிக்கா, புலம்பெயரும் மக்களின் முக்கிய இலக்காக உள்ளளது. இந்த புலம் பெயர் விவகாரமே 2016-ஆம் ஆண்டு அமெரிக்க அதிபர் தேர்தலில் முக்கிய பங்கு வகித்தது.

டிரம்பின் பேரணிகளில், ‘சுவர்கள் கட்டி எழுப்பப்படும்’ என்ற முழக்கம் கேட்ட வண்ணம் இருந்தது. சட்டத்திற்கு புறம்பாக மெக்ஸிகோவில் இருந்து அமெரிக்காவுக்கு மக்கள் வருவதை தடை செய்வதற்காக எல்லையில் சுவர் கட்டப்படும் என்பதை குறிக்கும் வகையில் அந்த கோஷம் எழுப்பப்பட்டது.

தன்னுடைய முதல் ஆட்சியின் போது அந்த சுவரின் நீளத்தை டிரம்பால் அதிகரிக்க இயலவில்லை. ஆனால் புலம்பெயர்வில் மாற்றங்களை ஏற்படுத்தும் வகையில் பல நடவடிக்கைகளை அவர் மேற்கொண்டார்.

அதில் முதலாவது, அவர் 2017-ஆம் ஆண்டு அதிபரான பிறகு 7 நாடுகளில் இருந்து மக்கள் அமெரிக்கா வருவதற்கு பயணத்தடை விதித்தார். இரான், இராக், லிபியா, சோமாலியா, சூடான், சிரியா, மற்றும் ஏமன் ஆகிய அந்த 7 நாடுகளும் இஸ்லாமியர்களை பெரும்பான்மையைக் கொண்ட நாடுகளாக உள்ளன. அந்த முடிவு, ‘இஸ்லாமியர்களுக்கு தடை’ என்று பல்வேறு விமர்சனங்களைப் பெற்றது.

இந்த உத்தரவில் டொனால்ட் டிரம்ப் கையெழுத்திட்ட போது, இந்த நாடுகளில் இருந்து அமெரிக்காவுக்கு வந்த 2 ஆயிரம் பேர், விமானங்களில் இருந்து இறங்கிய போது அமெரிக்காவில் தடுத்து நிறுத்தப்பட்டனர்.

அடுத்த கொள்கை ரீதியான மாற்றம், டைவர்சிட்டி இமிகிரண்ட் விசா திட்டத்தை ரத்து செய்தது. ஆண்டுக்கு ஒரு முறை குலுக்கல் முறையில் தேர்ந்தெடுக்கப்படும் நபர்களுக்கு அமெரிக்காவில் வாழவும் பணியாற்றவும் உரிமையை வழங்கிய திட்டம் இது.

கொரோனா பெருந்தொற்று சமயத்தில், அமெரிக்காவின் வேலையாட்கள் சந்தையை (protecting the US labour market) பாதுகாக்கும் பொருட்டு இத்தகைய முடிவை மேற்கொண்டதாக தன்னுடைய ஆட்சியின் இறுதி ஆண்டில் அவர் தெரிவித்தார்.

ஆனால், குலுக்கல் முறையில் தேர்வு செய்யப்பட்டு அமெரிக்காவில் வாழ காத்திருந்த ஆயிரக்கணக்கான மக்களுக்கு பேரடியாக அமைந்தது இந்த முடிவு.

இந்த குலுக்கலில் பங்கேற்க என்னுடைய பெயரை 2019-ஆம் ஆண்டு கொடுத்தேன். முடிவுகள் 2020-ஆம் ஆண்டு ஜூன் மாதம் வெளியிடப்பட்டது. நான் அதில் வெற்றி பெற்றேன் என்று கூறுகிறார் 27 வயதான இர்மக். அவர் துருக்கியைச் சேர்ந்தவர். (பாதுகாப்பு காரணங்களுக்காக அவர் பெயர் மாற்றப்பட்டுள்ளது).

“இருபாலின ஈர்ப்பு கொண்ட, கடவுள் நம்பிக்கையற்ற பெண்ணான நான், என்னுடைய நாட்டில் இயல்பாக இருப்பதும் பேசுவதும் பாதுகாப்பானதாக தோன்றவில்லை. அமெரிக்காவில் எனக்கு பிடித்தது என்னவென்றால் தனியுரிமைக்கு அங்கே இடம் உண்டு. மரியாதை உண்டு. அமெரிக்காவில் என்னுடைய வாழ்க்கை எளிமையானதாக இருக்கும் என்று நான் நினைத்தேன்” என்று கூறுகிறார் இர்மக்.

அமெரிக்காவின் இந்த முடிவுக்கு எதிர்ப்பு தெரிவித்து சட்ட ரீதியாக போராடிய மக்களோடு இணைந்து தன்னுடைய போராட்டத்தை துவங்கினார் இர்மக். ஆனால் நீதிமன்றத்தில் அந்த வழக்கு தோல்வியை தழுவ, அமெரிக்காவுக்கு வர வேண்டும் என்ற பலரின் கனவு பொய்த்துப் போனது.

டிரம்ப் நிர்வாகம் ஒரு பொது சுகாதார நடவடிக்கை போல் தோன்றும் ஒரு சர்ச்சைக்குரிய சட்டத்தை செயல்படுத்தியது. இது புகலிடம் கேட்டு விண்ணப்பித்தவர்கள் உட்பட பலரையும் அந்த நாட்டில் இருந்து விரைவாக வெளியேற்ற அமெரிக்க அதிகாரிகளை அனுமதிக்கிறது.

கிட்டத்தட்ட 4,00,000 பேர் தடுத்து வைக்கப்பட்டனர். இந்த திட்டம் செயல்படுத்தப்பட்டு, டொனால்ட் டிரம்ப் ஆட்சி நிறைவடைந்த காலகட்டத்தில் 4 லட்சம் பேர் தடுத்து வைக்கப்பட்டு பிறகு அமெரிக்காவில் இருந்து வெளியேற்றப்பட்டனர்.