அகில்யாபாய் ஹோல்கர்: உடன்கட்டை மரணத்திற்கு தயாரான மால்வாவின் ராணி – முடிவை மாற்றி போர்க்களங்களை வென்றது எப்படி?

மால்வாவின் தலைநகரை மகேஷ்வருக்கு மாற்றிய பிறகு, நிர்வாக சீர்திருத்தங்களுக்கு அகில்யாபாய் முன்னுரிமை அளித்தார். திருடர்களிடமிருந்தும் கொள்ளையர்களிடமிருந்தும் குடிமக்களைப் பாதுகாக்கும் வகையில் சில கடினமான முடிவுகளையும் எடுக்க அவர் முடிவு செய்தார்.

தனது ஆலோசகர்களின் கூட்டத்தைக் கூட்டிய ராணி அகில்யாபாய், தனது குடிமக்களை திருடர்களிடமிருந்தும் கொள்ளையர்களிடமிருந்தும் விடுவிப்பவருக்கு தனது மகளை திருமணம் செய்து வைப்பதாக அறிவித்தார்.

வித்தியாசமான ஆனால் துணிச்சலான இந்த அறிவிப்பைக் கேட்டதும், யஷ்வந்த்ராவ் பான்ஸே என்ற இளைஞன் தன் இருக்கையிலிருந்து எழுந்தான். அனைத்து விதத்திலும் அரசு முழு ஆதரவு கொடுத்தால், ‘இந்த சவாலை ஏற்றுக்கொள்கிறேன்’ என்று அவர் கூறினார்.

திருடர்களையும் கொள்ளையர்களையும் ஒழிக்கும் பணி முடுக்கிவிடப்பட்டு, குறுகிய காலத்துக்குள் சமஸ்தானம் பாதுகாப்பானதாக மாறியது. தனது வாக்குறுதியை நிறைவேற்றிய அகில்யாபாய், தனது மகள் முக்தாபாயை யஷ்வந்த் ராவுக்கு திருமணம் செய்து வைத்தார்.

அந்த சமயத்தில், ராஜபுத் அரசர்களுக்கிடையே ராணி அகில்யாபாய்க்கு எதிராக கிளர்ச்சி உருவாகிக் கொண்டிருந்தது. அகில்யாபாயின் ஆதரவாளரான மகாத்ஜி சிந்தியா லால்செதோ போரில் தோற்கடிக்கப்பட்டார், அவரது வீரர்கள் ராஜஸ்தானிலிருந்து தப்பி ஓடிவிட்டனர்.

இதன் எதிரொலியாக ராஜஸ்தானில் மராத்தாக்களின் செல்வாக்கு குறையத் தொடங்கியது. இதைப் பயன்படுத்திக் கொண்ட ராஜ்புத் படைகள், மராத்தாக்களுக்கு எதிராக அணிதிரளத் தொடங்கின.

கிளர்ச்சி தொடர்பான செய்திகள் கிடைத்தவுடன், ராணி தனது படையுடன் சென்று ராஜ்புத் படைகளைத் தாக்கினார்.

அரவிந்த் ஜாவ்லேகர் எழுதுகிறார், “கிளர்ச்சித் தலைவர் சௌபாக் சிங் சந்திராவத் தப்பி ஓடி, ஒரு கோட்டையில் தஞ்சம் புகுந்தார். அகில்யாபாயின் ராணுவம் கோட்டையை எல்லா பக்கங்களிலிருந்தும் சுற்றி வளைத்தது. அவர்களிடம் இருந்த ‘ஜ்வாலா’ என்ற மிகவும் சக்திவாய்ந்த பீரங்கியில் இருந்து வெளியேறிய குண்டுகள் கோட்டையை அழித்தன. இறுதியாக, கிளர்ச்சித் தலைவர் சௌபாக் சிங் சந்திராவத் பிடிக்கப்பட்டு ராணியின் முன் கொண்டுவரப்பட்டார். ராணி அவரை பீரங்கியின் வாயில் கட்டி, சுட்டுக் கொல்ல உத்தரவிட்டார்.”

சந்திராவத்தின் மரணத்துக்குப் பிறகு கிளர்ச்சியாளர்கள் அனைவரும் சரணடைந்தனர். நான்கு ஆண்டுகளுக்குப் பிறகு நடந்த மற்றொரு கலகத்தில், அகில்யாபாய் நேரடியாக களத்துக்கு சென்று கிளர்ச்சியை நசுக்கினார்.

அகில்யாபாய் கருப்பாக இருப்பார். நடுத்தர உயரமுள்ள பெண், அவருடைய கூந்தல் மிகவும் அடர்த்தியாக இருந்தது. அந்தக் காலத்தில் பர்தா அணியும் வழக்கம் இருந்தபோதிலும், முற்போக்கு சிந்தனை கொண்டிருந்த அகில்யாபாய் அதை ஒருபோதும் அணிந்ததில்லை.

ராணி உணவு உண்ணும்போதே அவருடைய உதவியாளர்களும் அவருடன் உணவு உண்பது வழக்கம். குவாலியரின் மகாராஜா மகாத்ஜி சிந்தியா மீது அவருக்கு மிகுந்த மரியாதை இருந்தது. மகாராஜா மகாத்ஜி சிந்தியாவும், அகில்யாபாயை ‘மாதோஸ்ரீ’ என்றே அழைப்பார்.

“நாள்தோறும் சூரிய உதயத்துக்கு ஒரு மணி நேரத்துக்கு முன்பே துயிலெழும் வழக்கம் கொண்ட அகில்யாபாய், நர்மதா நதிக்கரைக்குச் சென்று குளிப்பார். அதன் பிறகு அவர் ராமாயணம், மகாபாரதம் மற்றும் வேதங்களின் பாராயணத்தைக் கேட்பார். அதன் பிறகு, பிச்சைக்காரர்களுக்கும் மாற்றுத்திறனாளிகளுக்கும் தானியங்கள், உடைகள் மற்றும் பணத்தை தானம் செய்வார். அகில்யாபாயின் குடும்பத்தில் அசைவ உணவு உண்ணும் பாரம்பரியம் இருந்தபோதிலும், அவர் சைவ உணவையே சாப்பிட்டார். ஒரு நாளைக்கு ஒரு முறை மட்டுமே சாப்பிடும் வழக்கம் வைத்திருந்த ராணி அகில்யாபாய் இரவு ஒரு மணி வரை விழித்திருந்து அரசு வேலைகளை செய்து முடிப்பார்” என்று அரவிந்த் ஜாவ்லேகர் எழுதுகிறார்.